一葉小廚 (已結業)

第一次來這𥚃食下午茶，見D餐也幾吸引，有飯、湯麵、三文治、炒意粉，選擇也算多元化，重點係餐飲可以不用加錢有蜂蜜紅茶，唔洗餐餐成日檸茶、檸水、咖啡果D，感覺好似比較無咁悶🤪又比較滋陰養身咁，叫了幾個餐，當中有五香豬排煎雙蛋米及鹽酥雞拼台灣腸加香菇肉燥米，本人覺得前者大份夾抵食啲，豬排有兩塊、蛋兩隻，米粉份量也不少，仲有杯野飲也是$32 ，價錢今時今日尚算抵食，豬排夠淋，易入咬，入味，至於鹽酥雞個餐相比之下無咁抵，要$42，但碗米粉係細碗好多，鹽酥雞也不太惹味，乾身，腸仔切到比較薄，食唔到平時食台灣腸，比較多汁的感覺，D香菇肉燥也比較少，這個餐有幾大的進步空間·

一到左假日，就會想食個靚早餐，有一個good morning, 之前有朋友推介過一葉既早餐，於是就去試下啦一葉吾係第一次幫襯，之前有食過佢地既午餐，都覺得幾好，幾有台式風味，今次食早餐吾知會有咩驚喜。我選左豬仔包配餐肉蛋，加沙嗲牛新竹米粉。新竹米粉係本人至愛，就算佢侵湯一段時間都依然保持到個質感，每次去台灣都會食。等左一陣就有得食la，第一時間趁熱食個豬仔包先，牛油香，包軟熟，好味之後再食米粉，米粉吸收晒沙嗲牛既味，質地又吾會太淋，果然冇令我失望。炒蛋同餐肉就係正常餐廳質素，下次想食新竹米粉一定會再黎幫襯

非常欣賞新冠肺炎抗疫設施：每張檯相隔距離理想，客人用餐時都可以安心及感覺舒適。無論是外賣或堂食都為每個入內客人量體溫，一絲不苟。食物美味，點了自選兩餸午餐，肉燥軟糯入味，豬軟骨及蝦條都好食。雖然等了10分鐘才有位入座，但覺值得！

間中都想出街食下lunch抖下氣，是日又黎左一葉，貪佢個午餐幾大份夠哂飽。午餐牌成年都無轉過，今日試下蛋餅同炒米先，飲品依然係不用加錢的蜜蜂紅茶。香葉菜圃肉碎蛋餅配滷肉飯，呢度$49，真係幾抵食㗎。即叫即煎嘅關係等左都好耐嘅，食晏得一個鐘有啲趕，但因為即整所以熱辣辣，蛋餅煎得鬆軟，加了九層塔好香口，有四大塊好飽肚。滷肉飯多醬，半肥瘦調味對胃，旁邊嘅豆角就無乜味啦，當係有啲蔬菜點綴下，半熟蛋流心有蛋汁好味，加埋珍珠米真係幾正。同事叫嘅台式咖哩炒米，其實即係香港嘅星洲炒米，哈哈，大同小異啦。味道正正常常，有咖哩香但不辣，米粉幼身彈牙，足料大碟，$52同樣抵食。試過轉珍珠奶茶但麻麻地，都係飲返蜜蜂紅茶好了，冰涼解渴，有茶香又不過甜，不錯呀。大件夾抵食，唔怪得要等位嘅。

粉嶺祥華村商場新裝修後，都係第一次去，整個商場都翻新了，感覺新了很多。但係就淨番哂Ｄ連鎖店，以前Ｄ小店都無得留低了。呢間台灣餐廳裝修都係好新，感覺好乾淨。平日放工夜晚去食，氣氛都唔錯，唔會好嘈好趕咁。全部都係街坊，好多係一家大細，Ｄ食物有Ｄ都適合小朋友，而且座位都分都好開，放ＢＢ車都好方便。食物Ｄ選擇都係好街坊菜，價錢又好親民。今次係叫左魯肉飯鹵水三拼，仲有淮山炒牛肉。魯肉飯加蛋同埋豆，好似營養會平衡Ｄ，幾好味呀。好有食屋企飯既感覺。辛辛苦苦工作了一天，可以住低食一口熱飯，感覺很溫曖。

成日經過祥華邨呢個商場都見到呢間台灣野 見人流唔算多以為麻麻哋好食點知入去試吓真係有驚喜之後個個星期都去幫襯😂啱晒我呢個鍾意食台灣野嘅人肉燥飯真係食唔厭 份量適中仲可以叫多幾個小食我覺得呢度嘅鹽酥雞 或者其他炸物都做得好好 全部熱辣辣又唔會油膩 仲可以自己狂加調味粉平時係街邊食炸雞扒炸雞會嫌人哋落得唔夠多辣粉今次可以盡情落🤣熱辣辣真係即叫即炸 不過唔知係咪其他分店都系咁不過食物夠熱真係好加分 冇得成日去台灣唯有多啲去食過吓癮🥺

今日又同一大班同事去食飯，今次黎到一葉大約12點幾，但位置好多，唔洗等位。今次我就食左個高雄肉排配台式肉藻飯。肉排味道唔錯，但就有少少油。另外個肉x飯就一般，正正常常，但飯面就有豆角，如果唔鐘意食豆角既人，記得要走豆角！！！之後，我都有問番同事覺得今餐點，但大多數feedback都係味道太淡，尤其係隻蛋，完全係「原味」，仲有蕃茄湯無蕃茄味等等。總結以上，我都唔太推薦大家黎，但價錢平都可以黎試試既。

同事生日，出左黎祥華邨的一葉食飯，午市好多人，等左15分鐘先有枱，店員明白午飯時間短，一早落定單，有枱就即刻上菜超有效率。一人叫一份午餐，自己要左份鹽酥雞扒配滷肉飯，包埋餐飲都係$52，今時今日呢個價位已經算係好抵食，至少夠大份夠飽肚。凍蜂蜜紅茶同事話試過加錢要珍珠奶茶，但味道不行，咁就乖乖地要返普通的台飲蜂蜜紅茶算了，無冰唔夠凍外，微甜茶香都ok嘅。肉燥飯細細碗但都好飽肚的，珍珠米軟綿有飯香，滷肉半肥瘦夠入味，加埋流心蛋好正。鹽酥雞扒超大份的雞扒，炸粉好厚好脆，雞肉幾滑，飽肚之選。仲有調味粉可以落，重口味嘅我就三款都加晒，個人鍾意海苔味。台灣腸（$21）豪一下叫埋小食，小食價錢就偏貴啦，21蚊得一條腸薄切，甜甜地係幾好味嘅。煎餃子（$19）仲叫左餃子，呢樣又係麻麻地，餡料唔鮮味，又細隻又凍，唔抵食。總括黎講，午餐好味又抵，小食偏貴味道一般，口痕可以叫下，但唔推介。

粉嶺不嬲都係美食沙漠，大部份係連鎖餐廳，自從領匯佔領左祥華邨之後，進駐左一啲罕有啲嘅連鎖餐廳🤣呢一間就係啦，今次試一試。因為我品朋友趕時間嘅關係，一坐低就點左最簡單台式孖寶肉燥飯，每個飯都有兩款台式嘅小食可以點，我地揀咗糖醋雞片、黑醋豬軟骨、手搖脆雞翼。黑醋豬軟骨真係好好食，酸酸地又唔會太鹹同埋太濃味。手搖脆雞翼都好香脆，係單骨雞翼，切開兩邊，但係唔係太多份量，有啲唔夠喉🤣糖醋雞片都唔錯，不過味有啲太濃。跟餐有個飲品，可以叫蜂蜜紅茶，都係唔需要價錢嘅，出奇地好飲，下次大家可以試試。

當我掛念台灣時便會去粉嶺祥華邨「一葉小廚」食個炸雞扒，這裡的雞扒好有士林夜市風味如一。🥢鹽酥雞排 $50 香酥脆口超惹味，灑點我喜愛的海苔粉提升香氣， 不過今日火喉過了點。🥢高雄蔥香肉排 $49香酥嫩滑入味來形容件肉排一點也不誇張，混合薑片一同炸至香脆好食。肉燥飯比較淋有點失色。有咁上下厚度。😂👍+ $3 配無糖熱豆腐營養豐富有豆味。免+1每位$52 ，抵食喇！👍

果一晚同男朋友同埋佢既朋友一齊係粉嶺食，食完就上佢地屋企打機😂但粉嶺呢⋯⋯眾所周知，都係得大型連鎖店，除非出聯和墟啦，但又太遠😂所以就近近地去左祥華村商場。平時唔多食太濃味既我，就叫左個紅燒牛肉麵，牛肉都幾腍既，湯都算唔錯。面條方面，因為平時食開茶X既牛肉面面條，就覺呢間店既面條就普普通通了。之後都有試男朋友既三杯雞飯，比想像中既仲要好味！唔算太辣，但都幾香口，三色椒就更加開胃，比牛肉面更好食！埋單一個人都係$60-$70，仲有野飲，所以晚市黎講都真係唔算太貴。

台灣野唔算成日食，不過依家望落去幾大，環境唔錯，就入咗去試吓啦食咗一次下午茶，一次晚餐，發現佢嘅款式唔算多，但係勝在材料幾新鮮，而且我鍾意佢嘅客飯唔係白飯，係一碗碗有滷蛋嘅肉燥飯，夜晚同朋友嗌餸食飯，好有驚喜，而且佢可以加錢有小食，有台灣腸、鹽酥雞等，價錢加埋$80度就好多嘢食，真係唔錯㗎佢食物嘅質素都唔差，唔算係非常正宗嘅台灣嘢食，似港式口味嘅台灣野，但食材比較新鮮，食落去嘅口感都唔錯，性價比都高

粉嶺區， 這個屋苑感覺上有些老化， 不過商場自從被領展裝修後，煥然一新， 多了各類型的店舖，更便利居民購物及飲食。台式食店的裝修，清新及大自然嘅感覺！晚餐選擇亦不少。'台式孖寶肉燥飯 ， 有幾款配搭可揀其中兩款，我揀黑醋燻魚及黑醋豬軟骨， 另有半隻雞蛋， 肉燥 ，腐竹及蔬菜， 材料豐富。 古法生炒牛肉飯，碎牛及芫茜混合一起炒，香味四溢， 味道可口。蜂蜜紅茶， 調教味道得宜， 不會太甜， 茶夠熱。

今日約左朋友去粉嶺食飯.本來諗住食《定食8》果間.點知佢門口貼左內部裝修.之後我哋一轉身就見到隔離有間一葉小廚.之前上OpenRice睇過都好似幾好食.我哋兩個就入咗去試.入到去無咩客.可能時間尚早.我地就揀左兩款煲仔小菜套餐.一個小菜跟一碗肉燥飯同一杯野飲.果然兩款煲仔小菜都有驚喜..好好食.朋友都話值得再試.服務方面ok.侍應有禮貌.上菜速度都幾快👍👍👍

週末北上辦年貨前，先在粉嶺食個早餐。之前在一葉食過下午茶，覺得鹵水雞翼、蛋和豬肉等，珍珠奶茶同米粉都唔錯，今朝就試下佢的早餐。點了餐肉、腸仔、煎太陽雙蛋配豬仔包同肉燥米粉加奶茶。餐肉煎得微焦邊位帶脆，但有點細薄切的感覺 ; 腸仔是脆皮腸，豬仔包已切半和搽了牛油，鬆脆有牛油香; 肉燥米粉保持水準，新竹米粉爽滑，可惜肉燥份量較少。港式奶茶香濃，一葉的早餐每份都配搭多款食物，感覺豐富，但份量不多，食量大的朋友可能未能滿足。