中記

營業中

休息中

平時都無留意中記，無意中有次係OpenRice 落單外賣自取，居然發現中記而且仲要有一個40 蚊都唔洗就可以食到既炒粉麵飯包凍飲。今次試左瑞士汁牛河，味道唔算太鹹又唔會太油但份量夠。凍檸檬茶都有大排檔特色，茶底好濃。值得一試再試中記！

又係時候同舊同事聚下, 吹水飯局當然要搵個任坐唔趕嘅地方. 灣仔駱克道街市大排檔就最好 , 今日上左中記,7點到大把位任揀. 好勁嘅冷氣. 小菜選擇多, 我地叫椒鹽九肚魚, 豉椒炒鵝腸, 蒜蓉炒芥蘭.  仲有大排檔必有嘅啤酒小姐推介嘅啤酒. 1)椒鹽九肚魚- 好香脆, 唔會死咸....好正配啤酒一流. 2)豉椒炒鵝腸- 滿滿嘅鵝腸.份量超多 好惹味. 3) 蒜蓉炒芥蘭- 炒得好爽脆..食食下姐姐走埋黎問好唔好食...吹下水,有傾有講...呢餐晚餐非常好.雖然環境一般, 但都清潔. 但整個氛圍好好...一定會再來...太多菜式想試...

係灣仔食一餐，平均都要$50-$60。但係喺灣仔駱克道熟食中心就可以搵到$30一個即炒嘅下午茶！$30-32一個下午茶，真係喺香港好少地方搵到仲要即抄埋俾你就真係買少見少。但係落單阿姐就有啲怪怪哋，經常都十問九唔應，就唔好預咗有服務。落單睇你好唔好彩，如果多人落單嘅話可能都要等成三四個字先有得食好彩記得你一個叫嘅話就5分鐘左右就嚟到你面前。嘢食我差唔多次次都係叫XO肥牛炒公仔麵加杯熱奶茶。先講個熱奶茶，中規中矩，係奶味比較多茶味都幾算有，係一個合格嘅奶茶。個XO肥牛抄公，就比較重口味偏鹹，但乾身唔算太油，肥牛大概五至六嚿，食落去係啱我口味嗰種，所以我都幫襯咗好多次。

兩個男人收工 又想飲吓啤酒 行行吓朋友就介紹咗呢一間灣仔街市上邊嘅中記小炒 位於喺駱克道街市 河，方便搭電梯就可以直上 轉右第一間就係由於朋友係熟客嘅關係 今次決定等佢介紹！我哋兩個人就叫咗芝麻雞，椒鹽鮮魷同埋一個炒菜。大部份菜式都係$60-$70呢一個價位，以晚餐嚟講呢一個價錢真係好抵，港島區冇乜地方可以做到 啤酒就大概25蚊支，配上打卡一流既戰鬥碗，爽 好快就拎咗白飯同埋例湯俾我哋 出奇地 呢啲都唔使收費 可以任添 啱晒食量大嘅朋友，我就食唔到咁多 食物質素都係茶餐廳水平，不過不失！但係環境就比較嘈吵，如果對環境質素有要求嘅朋友可能就未必咁啱！overall 每人$100多啲，真係非常抵食

在灣仔食大排檔，上咗市政大廈上面的大排檔。6點上到去，大部份食肆都沒有客人，見到這一間最多食客。環境真係麻麻，坐低見到枱油油的，還有飯粒。但朋友話，大排檔預咗㗎喇。廚師推介價錢也不貴，非常便宜。還有串燒。廚師推介：蜜瓜炸脆奶 $68很少地方有炸奶，還算挺特別的，外脆內軟，但蜜瓜奶有少少香精的味道。廚師推介：野生椒七彩牛柳絲$88非常普通的一碟餸，牛柳絲好鹹，沒有白飯真係入唔到口德國鹹豬手$118豬手是微暖的，皮有一些是脆的，肉少少韌。真的非常普通。三個餸 $280，價錢是便宜的。見到午市套餐$36 ，的而且確是非常便宜的，但在進食的過程中，真的看見一隻很大的老鼠走過，馬上胃口也沒有了。可以理解，街市樓上是非常污糟，但老實說，當真的看見的時候，還是很難接受的。唯一可取，就是價錢便宜了。

平時老公踢完波都會同啲波友去中記到食飯，所以今晚決定都帶我去麻甩一下🤣今晚禮拜日都唔算太多人，一去到就有位唔使等。一坐低姐姐就拎咗碗筷同埋兜水俾我哋洗，老公大力推介中記嘅德國鹹豬手，我就揀咗個炸蜜瓜脆奶同埋細既蠔仔粥。見到佢仲有好多菜式好吸引，例如金沙涼瓜同埋士多啤梨骨，可惜都係得我哋兩個人真係食唔到咁多🥲地下比較油，但都可接受第一樣上菜嘅竟然係炸脆奶，心諗會唔會係炸定😳一啖咬落去吐都吐唔切，熱到出煙呀🤣外層炸漿好薄好脆，而且炸到好乾身，一啲油益味都冇，入邊嘅蜜瓜奶我相信都係X他牌子😏隻味一模一樣㗎，好彩唔會話好甜同漿口細蠔仔粥每人都可以分到兩碗，而且入邊嘅蠔仔係我見過咁多間蠔仔粥裏面最大既😳份量都好多，唔會因為佢大粒而比少啲不過味道就偏鹹，而且冬菜味好重，落少啲冬菜就好啦少少美中不足嘅就係冇芹菜碎同芫荽🙈德國鹹豬手嘅豬皮非常之香脆，而且肥膏唔算太多，豬手肉亦都非常之嫩口😻可以喺熟食市場食到個咁高質素嘅豬手真係好喜出望外埋單都係$234😻抵食到爛呀！！！！

椒鹽豬排飯 都算得上係大排檔/茶記餐牌既必基本配置 當灣仔區既椒鹽豬扒飯動不動都要$60左右既時間 今日手多多搵到間係駱克道熟食中心入面既《中記》有$30既椒鹽豬扒飯仲要配嘢飲 (下午茶)🤯 平到擦新我嘅三觀 決定會一會佢🤔椒鹽豬扒飯 (下午茶 $30) 炒底 (+$6) + 熱奶茶 + 外賣 (+$2) 佢既份量真係唔少 啲飯滿到個蓋都就黎冚唔實 豬扒都有五六件👍🏻 啲飯炒得粒粒分明 口感軟硬適中 鑊氣夠既 無咩調味 旦撈埋啲椒鹽配料 個味係啱啱好😉 豬扒味道正常發揮 唔會乾到咬唔到 亦唔會話好勁既鬆肉粉味始終都係外賣 十幾分鐘嘅路程 再脆既豬扒都會冧哂🥲奶茶入口都順滑 茶味同奶香都balance既 加一包糖甜度啱啱好 唔錯😋以$38蚊呢個價錢 唔會比其他賣緊60-70蚊嘅差 係灣仔區黎講 佢既CP值係爆哂燈🥰

晚上去了駱克道市政大廈吃晚餐，其實已餓了很久，因為美食展內不可飲食，只能偷吃一兩粒試食的零食，在肚餓下吃東西特別開心。我們選了中記，因為它小菜選擇多，而這裡吃飯都價錢實惠。黃金蝦，鹹蛋黃味夠香又不太油，蝦較細隻但都有少少鮮味。比較少見到有田雞菜式，所以選又勝瓜炒田雞，田雞份量幾多，夠味。蠔仔粥是最差的一個菜式，湯底只是鹹，毫無誠意，完全不想吃下去。豉椒炒蜆，有鑊氣，蜆都算大隻，朋友話有少少沙，我就唔太覺。人均百五，幾抵食。

香港嘅大排檔鑊氣小炒買少見少.可以話絕跡咁滯.想懷緬過去港人風味.受港府的條例管制.難上更難.遺失的港風的味道！今日我介紹一間係灣仔駱克道市政大廈熟食中心二樓嘅《中記》呢度賣嘅嘢全部都係過去港人熟悉的味道！今日我嚟到呢度係嘆佢哋超底嘅下午茶！我哋點餐如下：1. 馴名豬扒星洲米 X1 $30元 配餐飲：凍檸茶要加$3元2. 咖喱吉列豬扒飯 X1 $32元 炒飯底要加$6元 配餐飲：凍鴛鴦要加$3元馴名面豬扒星洲米.豬扒超多份量.件件大件肉厚.米粉係用幼身嗰種.咖喱炒得乾身.唔會成碟油.👍😋😋😋咖喱吉列豬扒飯.件豬扒大過我塊面.飯底要炒底.炒得剛剛好.唔會太濕或者太乾.粒粒飯還有蛋香味！👍😋😋😋

炸雞髀配炸薯條🍗$28成日諗唔到有咩食🤔結果又走咗去下午茶😂以港島區嚟講，呢度食嘢嘅價錢，真係無敵😚今次第一次食炸雞髀😆真係即叫即炸，新鮮熱辣辣😏雞髀好大隻，炸到好乾好脆😎薯條炸到金黃色，香脆可口☺️包埋熱飲，抵食，唔錯👍中記 (灣仔)灣仔軒尼詩道225號駱克道市政大廈街市熟食中心2樓 CF9-13 號舖

一間以平見稱而廣受歡迎的大排檔,發覺除了價錢平之外,其食物質素,服務,衛生可以用恐怖兩個字形容.一間位處熟食中心的食店,衛生一般是可預見的,但我從廚房門口望入去,眼見廚師不但食煙,更徒手將煮好的食物扒到碟上.食物柯打了超過三十分鐘,肯定是走了單,我親自到廚房口請侍應追單,廚師聽到話就出,佢地根本冇睇過,事實係連單都冇埋,佢哋係唔會煮的,最差是我一共追了三次,都係咁回應,最後只能埋單走人.講到食物亦非常不堪,免費送的白飯是石仔飯,香酥檸汁雞用雞球唔用原塊雞扒,肉質硬實,黑椒薯仔牛柳粒,牛肉又靱又硬,明顯煮過火,豆腐支竹火腩煲眼見比較順眼,但第一口的枝竹竟然是凍的.說實話,我覺得任何一間兩餸飯店都比呢間名店好得多.

好耐冇行灣仔，朋友介紹街市熟食市場入面有間叫中記既小炒，非常抵食，就一於去試吓啦。上到去坐位闊落，感覺上幾乾淨，餐牌亦都多元化，幾適合一班朋友黎食，重可以飲番幾杯🍺🍻咸蛋黃炒鮮魷，好好食，好夠鑊氣，真係唔錯。😋😋😋😋沙律骨夠入味，抵食大件，份量十足😋😋😋😋串燒就叫左雞翼、牛柳粒、雞軟骨同芝士丸。灑上七味粉孜然粉，十分惹味😋😋😋😋蒜蓉牛油焗秀珍菇，好香，好好食😋😋😋😋

打完羽毛球，見樓下街市有熟食檔，好鬼肚餓，嗱嗱臨去食個飯先🤣求其揀咗間，中記，因為見到好似最多人食，望落去大部分都係熟客仔，講真，我都幾年冇去街市食嘢，估唔到環境都好乾淨。同朋友仔叫咗個焗豬扒飯同焗肉醬意粉， $42一個餐包嘢飲，真係好抵，不過佢嘅下午茶仲抵，但係太肚餓，食個飯先🤣豬扒都幾大件，飯係炒底，芝士、蕃茄、菠蘿，全部都唔少，咁嘅價錢真係好有誠意。意粉啲肉醬都係，多到滿瀉。要推介金茶王，呢杯奶茶真係幾好飲，夠濃夠香，比普通茶餐廳好飲，值得一試👍🏻總括嚟講，真係平靚正。

街市既熟食中心雖然環境不討好，但其實隱藏左好多美食，今次就去左灣仔熟食中心尋寶，呢到既座位都幾闊落，冷氣都好夠凍。今次我地試左兩個下午茶餐，包括炸雞脾配炸薯條同招牌西多士，跟餐有飲品，我地就叫左凍奶茶要另+$3。炸雞脾火喉控制得宜，炸到外脆內嫩滑，仲要好juicy，配埋炸薯條，都只係$28。西多士內裡好鬆軟，仲搽左花生醬，夠曬正宗，而外面又吾會炸到過曬火好硬，好岩我口味，而價錢都只係$23。熟食中心租金比較便宜，所以相對價錢都比較經濟，不介意環境問題既可以去尋下寶，發掘更多美食。

一向都好小食大牌檔的我，聽朋友講話呢間芝士焗豬扒飯好正，心諗點正，今日咁啱又去灣仔政府大樓有D文件處理，擇日不如撞日，就同同事一齊去試吓睇吓有幾正先，一吃之下，果然真係名不虛傳，又真係做到唔錯，價錢又平，原來呢度嘅奶茶又係好出名，平日我都係飲咖啡☕️多，今日不妨試吓呢度出名嘅奶茶🧋😇————————————齊心抗疫午市特價套餐：鮮茄🍅焗豬扒飯$42：果然係望到就想食，賣相吸引➕足料份量➕食落出色=平靚正😋誘人的芝士😍…….足料的蔬菜、紅蘿蔔🥕蕃茄🍅青椒🫑南瓜🎃洋蔥🧅⋯⋯等等炒飯底炒得夠香👍呢個鮮茄🍅焗豬扒飯確實係做得出色好味道👍————————茄汁焗肉醬意粉🍝：又係非常足料的蔬菜，面頭的芝士焗得非常恰當，香氣撲鼻，一看就知道非常好吃😋足料的肉醬、意粉的軟硬度適中，味道更是出色👍—————————奶茶☕️：呢杯奶茶一飲就覺得好香濃香滑👍雖然我小喝奶茶，但也知道奶茶要如何冲出來才好喝，奶茶香滑一定要靠師傅沖出來的手勢，手勢好奶茶就會香滑，茶要適中，不可過濃，否則沖出來就會有苦澀的味道，掌握到沖出來恰當的時間，奶茶就夠香滑夠濃郁👍—————————-奶茶出色……焗飯意粉好好食😋其實開心🥳簡…單就