影片
電話號碼
36925288
營業時間
今日營業
06:30 - 22:30
星期一至日
06:30 - 22:30
以上資料只供參考, 請與餐廳確認詳情
食家推介
.近十年建既公屋 屋村商場都係連鎖餐廳🍴.難得大嶼山行山後 仲有啲時間.去逸東商場 食個靚 afternoon tea set.六十年代其他餐廳都 1430 開始食tea佢偏偏要 1400 開始好就選佢快速睇吓食評 麵包類輸出穩定.同朋友各點一個餐📲 掃QR code 手機落單再夾埋叫一個 蜜糖芥末雞翼1️⃣ 豬扒包 配 薯角 2️⃣ 炸雞髀 配 生果沙律🥗凍檸檬茶 & 樽仔桂圓紅棗茶飲品種類繁多.雞翼正常size 蜜糖芥末好重手但豬扒包 中間片蕃茄堅厚 沙律醬平均麵包有牛油 同 焗過 nice 👍🏻 .炸雞髀 都有手掌大 睇落偏乾 但食落唔油有卡位 坐得幾適服樽仔桂圓紅棗茶 小量生產物 都好有料 偏小甜.平均每人 消費$75.
繼續閱讀
今日入東涌行山，經過呢間餐廳，入去叫咗個A餐，葡汁雞皇焗飯，個汁一啖有味一啖冇味，個飯係完全冇味，撈啲蛋碎入去就扮係炒飯，然後個雞扒係白烚，完全冇味，完全唔知自己食緊啲乜
繼續閱讀
又前文提要吓啦，因為入咗東涌近鳳凰山山腳下村落中嘅民宿住番晚，唔包食，所以，早晚兩餐都要自己搞掂。今朝早，屋主就推介我哋去試吓晌「逸東邨」嘅「六十年代 」，所以，就過去試試，跟住，順道先去走訪馬灣涌村，探索昔日東涌嘅小漁村，然後再睇睇東涌炮台。 睇個名，就會估計店家喺玩懷舊，不過，入到去，整體裝修又無話大玩懷舊元素，至少牆身、地磚無搞咩花巧嘢；反而喺晌入門口位置，擺咗少少懷舊物品，如熱水壺、電視機、撥輪式電話，後生一代肯定未見過啦。 有別大多數茶記，餐具放晌暗格，反而放晒晌枱面，但有膠盒冚住，感覺衛生啲。然而，想要熱水洗洗餐具，就要自己出去拎，基本上，真喺零服務。早餐選擇兩頁餐牌睇晒，都喺茶記款式啦，定價$26-$48，食得簡單啲又得，豐富啲亦得。反而飲品有多幾款冬日選擇，都喺啲健康正氣啲嘅飲品，定價$26，但就有跟餐半價嘅優惠。依家好多餐廳都用二維碼落單，就算茶記都唔例外，不過，搞唔掂嘅一樣可以搵店員幫手，始終老一輩未必個個都識。早餐G $38 老婆乜都講健康，又特別鍾意蕃茄湯，所以，醒神系列中G餐嘅鮮茄雜菜濃湯扭扭粉就最啱佢喇，兩款配料仲要揀埋雜菌同素鮑片，夠晒健康，另外，轉咗米粉，一大碗，夠晒份量，肯定佢飽到上心口呀！所謂鮮茄雜菜湯，即喺蕃茄薯仔紅蘿蔔湯，都幾酸香鮮活，飲落醒神，但就唔屬於超濃郁嗰類；唯一挑剔，老婆話喺啲米粉煮得未夠透，仲差少少火喉。 早餐B $42 小弟就揀咗醒神系列中嘅B餐，因為喺沙嗲牛肉嘅忠粉，基本上就配衛星餐包，當然+$3轉丹麥多士啦，再選火腿煎蛋，仲有其他轉配選擇，例如轉轉西煎雙蛋、賜仔煎蛋，又或加錢轉菠蘿包、轉蕃茄湯、轉出前一丁，都幾多變化。 先分享碟火腿煎蛋、丹麥多士，外觀幾靚仔，蛋黃仲喺半生熟，多士烘得金黃，拼埋一齊食，蛋汁甘腴，多士唔止脆口，仲極有牛油香氣，比起一般方包做嘅多士喺唔同啲。 一向嚟講，茶記嘅沙嗲牛唔衰得去邊，雖然嘅牛肉唔算好多，但做得有水準，個沙嗲亦推得好香濃惹味，牛肉軟腍鬆化；湯底喺清湯，撈勻啲沙嗲就變沙嗲湯，香味好多，麵條就無轉喇，唔喺公仔麵，就大光麵啦，煮得亦叫做爽身，無話過腍都收貨。 熱奶茶、熱檸水呢個喺我同老婆落茶記嗌餐飲嘅慣性組合，佢唔喺嗌熱檸水，就喺熱好立克，啲檸檬落得足，又夠清香。而小弟去茶記，奶茶近乎喺必然之選，亦喺最穩膽嘅選擇。杯奶茶稱唔上好滑，但茶底算喺芳香，幽香醇厚，口感不俗。 幾十蚊食個早餐，唔使準備、唔使煮，食完走得，出發，繼續我哋嘅小旅行。題外話，茶記招呼就無乜架啦，不過，晌門口安排入座就幾亂，撳咗飛，但無人叫號碼，卻有唔少街坊客就唔撳飛，直入坐低！
繼續閱讀
只係簡單外賣自取一個小小麵餐，都可以搞到全錯，不知所謂！明明揀咗要煎熟雙蛋，就變咗最憎嘅炒蛋，明明揀咗要奶油脆豬，但又俾咗牛油多士。既然你哋中意俾咩就俾咩，咁不如唔好俾人揀仲好啦，等人好有心機慢慢揀完，最後又完全唔係嗰回事。而且以一個咁普通嘅公仔麵餐，居然咁膽收人五十幾蚊，性價比就更加低無可低！啲炒蛋炒到碎濕濕，完全夾唔起，望落成劈嘔吐物咁，見到都已經唔開胃；而炸豬排亦根本唔係炸豬排，只係一塊煎豬排，根本就違反商品說明條例；而呢個所謂麵餐根本就唔包嘢飲，連熱飲都要加錢，根本就搵笨！
繼續閱讀
今日去食午餐叫左個蒸肉餅，都知道蒸野要等耐d，等左15分鐘重未有得食，要個侍應問下，佢話蒸野要等15至20分鐘，唔知佢有冇幫我入廚房催之後又等左10幾分鐘，個侍應過黎依依哦哦，又話岩岩過左午市盛盛盛，我都唔知關我等左半個鐘重未有得食咩事嬲嬲地叫佢取消左個餐佢，去街市買個飯盒返屋企食算，最抵死係佢上左杯凍飲重要收返我全價20蚊，我都無野食，杯野飲淨係飲左幾啖，趕住買外買醫肚費事同佢計我重要係叫凍齋啡走甜，杯野黎到都係甜既份常餐份量好少呢d就唔多講喇～
繼續閱讀