好彩海鮮酒家

營業中

休息中

都有2年幾無去過呢間好彩 , 諗著有下午茶時段喇....上到去原來是沒有的.... 只係有1張約10項點心的特價紙....個d就全部 8.80唔怪得無人等位喇...... 一來無特價茶 , 二來d 食物質素原來下降得咁緊要..... 真係試一次後... 下次唔會再黎落樓下京華下午 2:30 抵食好多....今天2個人叫了豉汁蒸鳳爪 ---- 呢個未食過d 口感咁"核凸" 的鳳爪... 淋就非常淋 ,但咬落似pat 膠漿... 好似腐晒咁... 一人試左舊....放棄了...蒸蘿蔔羔 ---- 呢個都係難食 .... 求其斬碎蘿蔔落個碗 + 稀稀的粉漿就咁蒸.... 蒸出黎用匙羹"筆"黎吃都水汪汪 .... 好失望...煎餃子 (8.80特價點心 , 最平呢個最好味呢個)---- 呢個算今餐中最好味.... 雖然唔係話好熱 , 但總算是味道還唔錯吧~~~蝦餃 ---- 呢味原來係好彩的重頭點心....但今次再叫真係超縮水... 細粒了而且味道也一般了 ...埋單2人共約 88.00招呼亦唔見得好好 , 只見經理就獨自落力 , 係咁幫客入廚房追單(今天經常見漏order) , 埋單又係等好

11月9日, 一行3人, 7PM唔洗等位, order咗:上湯龍蝦--汁好杰, 味精重, 以海鮮酒家計, 做得算差, 而且好貴, 龍蝦20蚊一兩。温公齌煲--即南乳齌, 好味。大斑兩味--即蒸頭腩+西蘭花炒斑片,中規中矩。脆蒜焗生蠔--其實係炸生蠔後,加D脆蒜,再放在蠔殼上, 烹調方法唔欣賞, 但隻蠔本身就好靚。花旗參山斑湯--湯唔夠清,而且幾味精。生炒糯米飯--ok啦。依個價錢去食咁嘅水平, 無必要囉

29號去咗好彩食晚飯(太子)，一向對這間酒家都好有信心，因公司每次食飯都會去這間，水準一向都唔差，但昨天的餸菜差到不能形容，我叫了一隻片皮鴨兩食，先講片皮,一大隻鴨片出來只夠一人一份,其中2,3個都可以食多片嘅，(少到吖),再講第二食~炒肉鬆，啲肉鬆用一啲類似春卷皮的東西盛載著，樣子還可以的，但當食落肚的時候，嘩!啲肉鬆淡而無味，失敗!另外叫咗一個鮑魚茹炆鴨掌，嘩!又一難食作品，鴨掌又係冇味，重要(稔姐姐)，唉!仲有最離譜就係個壽桃(包)，人家酒家啲壽桃包尾尖尖地，個面都有啲紅紅地嘅色呀，佢地嗰啲好似啲點心(蓮蓉包)咁，一啲壽桃嘅賣相都冇，唉!又失敗。最後啲飯一個字(硬)。

今天本來是去樓下京華的,因為約了女友,她說想試吓好彩的點心,就只有順佢\\\\\\\\\\\\\\\意啦.蝦餃....只是可以說ok蒸鳳爪....就幾好吃.牛肉球.......好像有點不熟其它的點心都可以收貨的招呼又幾好啊.但是就貴了少少都是京華便宜的.食物和招呼兩間都是差不多好.

星期三同男友一齊去旺角飲茶。兩點鐘上到二樓"京華"見到大排長龍，我見勢色唔對就即走。男友可能知我耐冇飲茶，於是就拖咗我上三樓間"好彩"。果然唔洗等位喎。一坐低就order 咗春卷、蝦腸、雞扎、燒賣、流沙飽和潮洲粉果。張紙啱啱比呀姐，轉頭佢竟然派下午茶點心紙。又冇攪錯，點解D呀姐唔話比人知有下午茶，咁變相咪貴咗。男友話算吧！十分鐘後D點心上枱，春卷好唔掂，好大陣油益味，失敗！蝦腸和雞扎都ok。潮洲粉果嗰皮好淋，一pat嘢咁。而個流沙飽都算唔錯。等咗好耐都唔見燒賣，叫呀姐追單，佢話:"你哋叫燒賣嘛，燒賣要蒸，係要耐D"。見佢埋去部機睇，之後返嚟又問:"碟腸粉未嚟呀！"。真係九唔搭八，明顯地之前呀姐擺明係呼衍我哋。再三解釋，呀姐再去check，最後佢話"漏單"。我跟手同呀姐話唔再要燒賣。再order男友鐘意食嘅馬拉糕和我想試嘅菠菜餃。馬拉糕比較深色，水準一般。菠菜餃同之前食嘅潮洲粉果分別不大，只不過內裹是菠菜。埋單$124。唔貴但食物和服務都一般，唔打算再幫趁。

有一日我地11個人去勢聯合廣場間食飯,間酒樓既服務真係鬼差既,大佬呀,叫左一鍋彿跳牆,短頭髮男侍應分湯可以一路分一路漏...大既五份之一既湯流哂落張枱佢\仲好似冇嘢咁喎,睇住佢\分湯真係嘆為觀止至於間酒樓既出品就普通啦,燒鵝太老肉太實條魚就蒸到好霉過哂火8,9個菜埋單4仟幾近5仟錢係預左要駛既,但呢間野既服務質量認真九流

去過咁多食店, 服務最差是這間.伙計用眼"怒啤"客人, 仲同客人吵架, 我和d fds 再也不去了.冷氣又凍, 唔環保.

貴賓廳有位胖女部長非常無禮貌. 話說我們叫碟肉絲炒麵, 我們不知佢的炒麵和肉絲是分碟上的. 阿嬸先端來一碟淨炒麵, 我們便問站在鄰桌的這位胖女部長, 我們叫的是肉絲炒麵, 但來了個淨炒麵. 這位胖女部長卻不行過來解釋, 只站在原地, 先怒“啤”了我們幾秒, 不開口, 再從脾視的眼光中帶不屑的語氣, 惡死能瞪的道: “來緊啦, 依家咪來囉”, 說罷, 又怒“啤”了我們幾秒. 始終不解釋“炒麵和肉絲是分碟上”這個原委. 如此公然怒“啤”客人, 前所未見, 當我們是乞丐嗎? 附近的食客也不屑它的作為. 我們食了半碟已經不想食了, 肚子有火. 當這位胖女部長再行經鄰桌時(它已經不敢行過來), 我向它說: 你好串wor. 它也並不道歉. 當然我想找經理來投訴, 但經理又如何, 當場用好彩酒樓的食客意見表, 寫篇投訴, 寄去總公司, 再在openrice 告誡大家, 別再去這店, 變相支持這種態度. 就算要去, 也不要坐貴賓廳.

象牙蚌$48 for 4 pieces after 8:30. fresh and tasty.tofu stuffed with meat: very oily.腐竹菜苖: so so.

與四位朋友,選了一個4人套餐.價錢698餐內有龍蝦,翅,魚,帶子,半只燒雞,以菜式而言應該覺得抵食.吃後卻覺物非所值.及後有另叫甜品,白飯等.不過環境及服務均不俗

無無聊入來飲茶最難忘件馬拉糕}人間有2層的奶皇糕但是件馬拉糕並無濕淋淋凍左一樣甘好味喜歡馬拉糕的你一定要試

昨天係黃金周首天, 亦係香港人既假期尾, 我就被男人家人邀請去此處飲茶....食lunch.由於佢地平日飲茶都吾多食野, 志在講野, 所以叫既點心數目並吾多....比起我平日同d同事出去食既份量實在係差天共地....以下係對此店既有關評語: -食物- 吾多得, 大部份食品落味精/ 鹽好重手1) 金錢肚, 有帶子粒既餃- 好咸, 無鮮味.2) 小籠包- 皮算薄, 不易夾爛, 仍保留肉汁...但味道都係偏咸...比起翡翠貨...差成條街呢!3) 蝦腸- 蝦係夠大, 但吾爽口, 無鮮味!4) 牛仔骨- 算吾錯, 都有好多肉可以食到. 味道ok, 吾太油. 不過都係咸左少少.5) 魚肉煎蓮藕餅- 睇賣相仲以為佢係普通煎綾魚餅, 不過男友告知係藕餅, 所以一試...味道都ok wor, 吾太油, 有蓮藕既爽口, 亦有魚肉既彈牙...合格.6) 煎馬碲糕- 幾油下. 不過都食到馬碲既"索索"聲..因太油, 所以感覺吾到佢既清甜. 只食到有d 甜甜地, 煙煙韌韌.7) 咸水角- 炸得燶左少少, 不過食味ok .8) 馬拉糕- 全餐最愛食item. 甜味arm arm好, 件糕又夠鬆, 可以用筷子夾到

好彩比一般酒家貴d，但食物用料的質素響返度。午飯的點心有水準，揚州窩麵用料夠得體，兩隻大冬菇，每隻大到cover住個豌仔，兩隻帶子，又有大蝦，加上其他料都好新鮮。乳豬飯的乳豬燒得好好，水準好穩定。油雞都好好味。BB鴿同胡椒豬肚就少得可憐，唔好叫。環境比一般酒樓乾淨，d樓面都算服務唔差。等位就少不免了。Ayu你講那個$638龍蝦套餐係唔抵食架，好似得4粒龍蝦肉同4粒大蝦，個羹又唔得大體，個炒飯又只用d龍蝦爪呀、腳呀炒出來(唔值錢的)。晚飯一係食貴d，一係食第間。食第間就落下一層京華，又抵食又好食。

2/10/05我同爸爸媽咪同2個親戚去好彩食晚飯叫左個$638的套餐,我地5個人叫個4人餐= =;;;;食完都唔係好飽..但係我係食得最多0個個架啦||||個上湯龍蝦球..食剩幾個球,我阿姨就叫我食埋佢..無意之中我夾起黎望下..點解..個形咁似普通蝦既..有身有尾架啵= =;;原來真係蝦黎既..只不過係比較大隻的普通蝦..佢地將龍蝦球混普通蝦球一齊上木台...呢D叫唔叫魚目混珠呢?不過最後既飯係將D個龍蝦頭呀,爪呀黎煮泡飯,又幾好食,D飯好有龍蝦味~^.^

禮拜6中午，完左個fieldtrip，幾個人同lecturer 去食lunch，極之多人，等位o既爆到出電梯，但係我地幾分鐘就有位... 因為個同學話d人唔坐吸煙區，我地等吸煙區就可以好快，不過好好彩，我地坐到埋去周圍都冇人食煙~~! 但係真係成間酒樓都好爆好嘈... 想去toilet，逼得埋去都仲有排等... 嗌左好多好多野食... 因為lecturer話驚d男仔唔夠飽... 好味ga~~ 尤其d腸粉，不過食剩唔少，同埋個油釀丸子真係唔得...一句講晒，有department最受歡迎o既lecturer請飲茶，咩野都好味ga啦!! p.s. 間野電梯附近果幾隻動物像，真係極odd...