定食8 (已結業)

𝒥𝒶𝓅𝒶𝓃𝑒𝓈𝑒 𝑅𝑒𝓈𝓉𝒶𝓊𝓇𝒶𝓃𝓉 𝒾𝓃 𝒯𝓈𝓊𝑒𝓃 𝒲𝒶𝓃本身叫左泡菜唐揚炸雞飯🐥同明太子薯條，點知隔左一陣話冇薯條🍟。好啦咁冇計，再隔左幾分鐘又過黎話冇泡菜，咁我問咁有咩取代泡菜，佢話而家冇呢個餐😅唯有轉左鰻魚丼，簡直係惡夢既開始。🌟迷你燒鰻魚丼 𝗠𝗶𝗻𝗶 𝗚𝗿𝗶𝗹𝗹𝗲𝗱 𝗘𝗲𝗹 𝗗𝗼𝗻𝗯𝘂𝗿𝗶 ($𝟯𝟴)本身都期待個鰻魚丼，等左15分鐘上枱比佢嚇到嘩一聲。 個飯真係堅！迷！你！仲要隻蛋打得超求其，同𝘮𝘦𝘯𝘶個樣差勁遠😨（雖然我影出黎好似ok)三四啖已經食完，佢既飯真係唔好味，有種係大陸食團餐既果種飯味。上次黎食都唔係咁🤕️🤕️🤕️食完好似食左陣風咁🌬，叫多左幾樣野食（天婦羅，炸豆腐同六件壽司）但味道都係麻麻，同埋已經冇心情影相🥲（好伏）📍 定食8 𝐓𝐞𝐢𝐬𝐡𝐨𝐤𝐮 𝟖𝘚𝘩𝘰𝘱 𝘎10, 𝘎/𝘍, 𝘗𝘢𝘯𝘥𝘢 𝘗𝘭𝘢𝘤𝘦, 3 𝘛𝘴𝘶𝘦𝘯 𝘞𝘢𝘩 𝘚𝘵𝘳𝘦𝘦𝘵, 𝘛𝘴𝘶𝘦𝘯 𝘞𝘢𝘯

𝒥𝒶𝓅𝒶𝓃𝑒𝓈𝑒 𝑅𝑒𝓈𝓉𝒶𝓊𝓇𝒶𝓃𝓉 𝒾𝓃 𝒯𝓈𝓊𝑒𝓃 𝒲𝒶𝓃• 豬軟骨烏冬 + 壽司 ＄５８ 🍜 🍥• 烏冬雖然話迷你，但其實都正常size, 有半隻流心蛋，D 豬軟骨好林好入味。仲有5舊壽司，個甜蝦好好味，帶子冇咩味😆其他都唔錯。-• 芝士滑蛋豬排丼 ＄４８ 🍛 🥠• 個滑蛋豬同個丼飯係分開上，個蛋略嫌有DD 老 😢，個芝士份量都多，食到好飽。每個主食都配一小菜同湯就小菜係海帶 🥗 ，不過冇咩味。個湯就一般 🥫 。-總體黎講CP 值好高同埋都好味。走果陣啱啱開始左下午茶，原來下午茶都好多野食，仲要好平，下次再試下先。😋😋😋

平日就跟孩子來個快閃下午茶吧，很久沒拜訪不知道餐牌有沒有轉了些什麼，可能因為疫情的關係，感覺附近餐廳都是冷冷清清的。下午茶選擇都幾豐富，小朋友就例牌來個兒童餐（有兩款可選）明顯被相片的泡芙吸引着，二話不說就點了這個雞唐揚兒童餐。大人就點了六貫壽司盛，追加兩份小食，分別是軟殼蟹手卷及蒜蓉帆立貝。除了蒜蓉帆立貝有點乾身之外，其餘都有驚喜，尤其是壽司，米飯的口感及魚生的新鮮程度不錯。當天只有一位樓面（連帶位）雖然只有幾枱客但見她來來回回走幾轉，連聲說道不好意思，挺有禮貌～

之前已經食過次，覺得都唔差CP值幾高，所以行過就再嚟多次呑拿魚四鮮丼$58我上次都係食呢個，覺得唔錯今次啲飯又黏、又有㓎up up地嘅臭味、個温度唔熱唔凍但又唔叫暖，真係好奇怪，所以我落咗好多豉油先遮到佢浸up味啲刺身就正常，不過呑拿魚蓉有啲失望，上次食起碼真係有啲魚味，今次我真係唔知自己食緊乜，冇味嘅一pat嘢不過前菜昆布幾好食，酸酸地幾開胃平又唔係真係特別平，呢個價錢我相信都食到俾佢好嘅質素重點係其實都幾自助式，唔明白個服務費收喺邊😂

我今日行過悅來坊商場定食8，想食日本東西，便入去幫襯。我叫咗個天婦羅定食，食物到檯時與 memu照片相似，份量不少，而且除了有些野菜外，還有整條鰻魚（尺碼比較細，不過是整條），二隻大蝦及一塊紫菜。除了主菜外，還有湯，前菜，烏冬或飯，全部只係$58元，我覺得好抵。全間店整潔衛生，但我覺得店員比較辛苦，只有二位店員，另外一位收銀及帶位，廚房出食物很快，店員服務速度都快，要落單，上食物，拾檯，我見她們很熟練，所以服務我都滿意。

農曆新年期間 , people mountain people sea, 人旺氣旺 , 好多食市都爆棚 , 唔理三七廿一 , 總之見到邊一間餐廳有位就衝入去食。就是這樣我們就入了 "定食8" 食台式和食 ~我點了 松葉蟹肉蟹膏三文魚丼飯 (附前菜&味噌湯) $58 : 味噌湯的味道是好一般 , 沒什麼好陳述 ; 前菜是 "海帶沙津" , 我向來喜歡食海帶 , 所以很合口味 ~松葉蟹肉蟹膏三文魚丼 : 看上去非常豐富 , 有松葉蟹肉、蟹膏、三文魚片(刺身)、小貝柱、多春魚籽 ; 松葉蟹肉都算有鮮味 (蟹有蟹味啦) , 蟹膏是香濃甘口 , 三文魚的味道正正常常 ; 把食物拌飯來吃 , 口感和味道層次都豐富 , OK 好味 , 性價比算很高 ~成個餐才 $58 .... 不能要求太多吧 ~本篇完 ~

星期六下午見沒有大排長龍，所以一於試試。之前在新蒲崗的定食8食過，食物質素高，價錢實惠，仲可以湯飯任添。現在來到荃灣這店已沒有任添了，但款式價錢都吸引，就一試吧！我們叫了壽司+迷你烏冬、芝士吉列豬扒飯、天婦羅定食、牛肉反卷。先講烏冬餐，個烏冬雖然話迷你，但搭的配菜卻是十分足料。有半隻流心蛋、日式豬扒和滿滿的烏冬，其實跟正常烏冬不太大分別，還伴著5件壽司，質素都不錯，件件各有特色。我叫了天婦羅定食，十分大份量，兩隻炸蝦、蕃薯、南瓜、兩條秋葵、一片長魚片、紫菜、兩小件軟殼蟹，自己真的食不下。一是份量大，二是粉厚了點，有點食滯。另外，還有芝士吉列豬飯，多多濃濃的芝士粒在豬扒面，豬扒既厚又大，不過都係粉太厚，影響了口感。講真，若不是對食物質表高要求的話，這店真的抵食。我們反而讚的就是昆布湯，先給你一碗，另外一碗不少的昆布，等你自己放一起來喝。或者下次試下不是炸粉的食物再評價。

放假同朋友去行悅來坊AEON，索性提議去樓上間定食8 Lunch ，食完就直接落底層行街夠晒方便。呢度既午市定食最貴個餐都係$58 ，送沙律同味噌湯。如果定食唔啱食或者唔想食咁多，亦都可以散叫小食同壽司～🍜迷你豬軟骨黑蒜烏冬升級五貫定食🍣一望餐牌我諗都唔諗就揀呢個，成個set有烏冬又有5款壽司，正！豬軟骨黑蒜烏冬係mini size，有半隻溏心蛋、豬軟骨、粟米粒，烏冬質地滑身。其實咁樣細細碗幾好，唔使驚太大碗再食埋壽司會太飽。海帶沙律加左少少醋做調味，味噌湯就一般五款壽司分別係柱貝、蟹膏蟹肉、甜蝦、三文魚、海鰻😍 成個set咁豐富都係$58真係抵食！

今日20-11-2020 (Fri)同老公放假落一落荃灣,我哋成日唔記得試呢間,今次終於記得喇,不過我唔係好肚餓,咁我食刺身就得啦.我哋睇完menu後,決定要$48.00嘅海景丼,要$18.00嘅菠蘿特飲,$42.00嘅四式刺身拼盤,用$10.00追加3片北寄貝刺身,同$16.00嘅蜂蜜蘆薈茶(熱).四式刺身拼盤牡丹蝦,帶子各1隻;三文魚,北寄貝各3件.牡丹蝦鮮甜同有粘嘅感覺;其他都正常不過.但wasabi豉油都幾鹹.北寄貝刺身唔使再講喇.海景丼三文魚3件,靈魚,北寄貝同熟蝦各3件,帶子1隻,蟹柳2件,再加一堆蟹籽.刺身質素同樣係一般正常,冇驚喜.飯就好食,因為醋嘅份量落得啱啱好,但原來飯都唔多.麵豉湯味道有啲奇,唔通因為有魚?沙律係海藻,但用咗柚子醋,都幾好食嘅.蜂蜜蘆薈茶(熱)我只飲到好似柚子嘅味道,飲到最底至飲到好甜,原因係蜂蜜蘆薈沉晒喺底,侍應完全冇放茶匙落嚟俾我攪勻嚟飲.菠蘿特飲睇見平平無奇,唔明點解要$18.00一杯,見到底下有金黃色嘅漿,係咩嚟?老公飲咗,話係菠蘿味嘅糖漿.咁怪雞.味道: 3.4分環境:都幾舒適嘅.衛生:枱凳好乾淨,但啲杯好似有問題,兩杯茶同我嘅蜂蜜蘆薈茶

今日又去左屋企附近間定食8食午餐，平時可能附近都冇乜日本料理食，經過時一般要排隊，今日好好彩，唔使等位。我同老公二人叫了兩個定食，加左一份反卷，連加一埋單$136，真係幾抵食。🍲豬軟骨烏冬+壽司定食-豬軟骨烏冬味道幾好食，豬軟骨夠淋，烏冬都夠滑，份量細細碗；五款壽司（海鰻，三文魚，甜蝦，蟹膏蟹肉，小柱子）除甜蝦有驚喜，其他一般🍛滑蛋豬朳丼-老公每次都會必點，豬朳炸得夠脆，係幾好食既，不過今次d蛋煮得有d過火，唔係滑蛋係老蛋🍳🍤炸蝦反卷-估唔到幾好食，又抵🍣價錢平民，食物都ok，相信我哋諗唔到食咩果陣，好快又會幫襯😂

同屋企人黎食 平平地 呢個係牛肉壽司卷 覺得幾抵食 同埋味道唔錯 牛肉都幾有味另外再叫左呢個小食，芝士帆立貝，都算多，味道正常發揮，芝士都夠，性價比算高。叫左呢個鰻魚蛋包飯定食，覺得呢個係超值，原條鰻魚，蛋都多，有芝士。女仔食應該會太飽，男士就應該ok。呢個壽司加豬軟骨烏冬啱晒我，所有壽司都係平日鍾意食嘅，有元貝仔壽司，鰻魚三文魚，甜蝦同埋蟹膏蟹肉壽司，幾特別。豬軟骨烏冬比較細碗，但豬軟骨夠軟夠淋，味道唔錯。仲有叫左蟹膏蟹肉飯，呢個味道正常，份量都OK。每個定食都包1碗湯，今次個湯味道偏鹹，之前好飲d。然後有個海帶小食，小小酸，係開胃菜。今次好彩唔多人唔洗等位。

中午去食，叫左個海鮮天婦羅烏冬，好難食...食完個人覺得反胃，睇下張單，竟然要加一。請問加一服務費，個服務去左邊。order野食，自己畫紙，賣單要企係cashier 一陣都無人理會..真係今時今日都有咁差的食肆..

其實係第二次嚟食了，第一次嘅時候就覺得唔錯，所以今次嚟寫番個食評。餐廳以日式西餐廳風格，裝修得簡約，可能係我喺啲偏門時間食，人唔多坐落幾舒服。餐牌款式選擇唔多(詳見附圖)，不過每樣都幾吸引(我)。落單係好似飲茶畫點心紙咁。對於如今晚餐來講，$70-$80左右唔算貴，一個set有主菜、湯、沙律，要飲品都係半價，唔叫自助吧都有熱茶同水供應，加一服務費。由於每個人口味都唔同，味道方面就唔太詳述。(詳見附圖)

晚飯時間見好多人排隊，以為有正野，等左大約20分鐘左右入座。定食款式都叫做幾多，我叫左個照燒雞腿定食，平就係平嘅，一個set有一大塊雞+中華沙律+三片三文魚+麵豉湯+泡芙，非常豐富。不過味道就平平無奇，d飯仲要超硬。食一次就夠，要排隊就真係免喇

每次去熊貓酒店個頭都會諗起呢間野，以前午餐有任添白飯及湯，而家無呢支歌仔唱lu，但係d食物依舊吾錯的，一個午餐50元左右有得食日式又好味既都少有，天婦羅真係脆，蟹膏亦好夠味，三文魚夠鮮甜，值得一試再試！