小食掂

營業中

休息中

之前聽人講呢個鬼地方開咗間小食店，咁啱去攞淘寶順便去試吓,買咗串牛柏葉同土魷，個老闆娘問我鍾唔鍾意食辣，佢有個秘製魔鬼辣汁，咁我即管試吓，真係好Q辣，但又真係幾惹味，跟住就打包埋個碗仔翅返屋企食又真係幾好味😋

今日要去浸會醫院探朋友，諗住買啲嘢俾佢食，因為都成夜晚九點，對面個商場得返間七仔一間日本嘢同一間小食店，咁就諗住簡簡單單睇吓小食店有啲咩可以買嚟同朋友一齊食，但係一望佢個餐牌一碗碗仔翅要$50 一碗生菜魚肉要$40，真係有啲貴，當我猶豫之際，老闆娘同我講啲生菜魚肉同碗仔翅全部都係自己親手整，而且係冇味精,最好笑係跟住個老闆突然走出嚟用一個非常之堅定嘅眼神望住我同我講你食過一定會返轉頭，我見過老闆咁有信心就即管每樣買一碗試下，我自己一直都好鍾意食碗仔翅，但自從尖沙咀棉登徑個車仔阿叔冇咗之後都未食過好食嘅碗仔翅，但呢度真係有驚喜，個碗仔翅湯好濃好多料啲冬菇好滑仲要有竹笙，而且佢真係有翅，不過係素翅唔係粉絲，最重要佢唔係好似漿糊咁，食到落最底都仲係有料，覺得佢真係真心做出嚟，最後全部食晒，生菜魚肉我朋友食佢都話啲魚肉好彈牙個湯底好清甜連湯都飲晒，個老闆真係冇吹水，我一定會再食，不過真係要去開附近先，個位真係有啲吊腳😅

叫左咖哩撈烏冬配魚蛋同燒賣，味道係唔錯嘅，咖哩汁辣辣地，最後食到啲甜味，不過就麻麻地咖哩有甜味。魚旦就係一般嘅陳皮魚蛋，反而個燒賣好好味，真係食到有魚肉嘅味，質地都彈牙，好好味。撈麵轉烏冬30蚊，烏冬嘅質地都幾彈牙，但成個餐就30蚊有啲貴而且細份，細食嘅女仔都吾名夠飽。加左串魷魚，15蚊。成個餐45，性價比一般。建議加啲錢食個正餐。

呢排lunch唔想食canteen，但係又太熱唔想行太遠呢間都開左有一排但係呢排先第一次去位置喺建新中心地下，店主態度好好碗仔翅真心好味，重點係個冬菇，極滑，唔食冬菇嘅人都會鍾意撈面撈烏冬腸粉都唔錯生腸&墨魚串保留口感嘅同時對牙力一般嘅人都友好，可以咬到🥹希望一直開落去

探朋友之前諗住喺浸會醫院附近求其食啲嘢，行到嗰間唔知咩商場😅見到有間小食店（小食掂）買咗個咖喱魚蛋同埋生菜魚肉。生菜魚肉個湯底食得出冇加味精，我成碗飲晒都唔覺口渴，魚肉好彈牙，足料，唔似出面嗰啲粉多過肉。 魚蛋係陳皮魚蛋😍😍😍 咖喱汁好出色見到間舖好乾淨，多口問句，原來開咗冇幾耐，老闆話會不定期推出粉仔，希望下次有緣可以食到啦。等嘢食期間見到好多人買碗仔翅，下次要留肚試埋碗仔翅燒賣腸粉同滷味⋯仲有個蒸飯，撈烏冬都好想食⋯

呢間小食掂我已幫襯超過三次以上我才會寫上食評✍🏻，每次食啲食物都可以保持高質素難得👍🏻，真正用心去做食物💗，真係會食得出嚟、我工作位置在九龍塘，平時午飯時間一係要行到落去九龍城、一係附近得一兩間普通到不得了茶餐廳選擇🤢，第一次幫襯呢間小店我心諗唔係呀，呢啲地方小食店會蝕個啵🤔，就試買咗返公司食，佢哋嗰個兩溝魚肉碗仔翅👍🏻，食得出係冇味精嘅(因為我係味精過敏)，用料落本竟然有竹笙，佢個咖喱陳皮魚蛋…..嘩….真係超正😋，我公司個秘書仔已俾咗個世一魚蛋俾佢、魚肉燒賣，我從來唔鍾意食，但呢度啲燒賣加上佢哋自己做嘅XO醬= 無敵💗，仲有佢哋嗰啲滷味、係新鮮製作，自己做滷味自己串、佢哋啲芥辣醬係自家調製超級好味，唔係買現成返嚟賣，現在已經成為我下午茶或home party必備伴酒之一🤟🏻🤟🏻，同埋原來個老闆有潔癖，唔怪之得佢間小食店咁鬼乾淨🤣🤣🤣