椰仔冰室 (麗港城商場)

營業中

休息中

今日同家人去呢間椰仔食下午茶 當時入座時間大概下午5點零鐘Order完食物之後 佢地個清潔姐姐開始用1:99漂白水拖地成地濕晒好污糟不特止 個個客，包括我自己，行路都要因住怕跣親 但一個告示牌都無最慘係漂白水大味到根本食唔落飯當時仲要成間餐廳都有7，8成客左右其實都好難理解點解會呢啲時間做清潔於是我地反應返 真係好臭 食唔到飯 問佢地會唔會另一邊餐廳（佢地餐廳分兩邊嘅）可以唔拖地住佢地侍應就好串咁話 「吓 梗係唔會啦」我地唯轉外賣佢地就又惡又串咁一句車埋黎「外賣要每樣食物加兩蚊 根本日日都呢啲時間拖地架啦」言下之意，覺得係個客唔知佢地清潔時間，唔知佢地臭到咁，係個客有問題，搞到佢地做多咗嘢，要轉單做外賣單一怒之下，我地取消咗張單個自稱老闆娘嘅金毛大陸女人見我地走咗，仲隔成條街咁鬧我地「你呢啲人以後唔好嚟 我地招呼唔到你」食物已經普通茶記質素，但啲服務態度趕客到咁，樓上仲要有其他茶記選擇，佢呢間嘢真係搵鬼去！

尋日11月26日早上約8:45 ，我同老公到麗港城商場的椰仔冰室食早餐，於8:50下單，點了兩個早餐，包括兩杯咖啡，等咗好耐都未有咖啡到，到9:15 ，所有食物已經食完，但咖啡仍然未到，於是向其中一名黃色衣服長攣頭髮紥起馬尾戴眼鏡身形略胖的侍應要求催促咖啡，但該侍應態度非常惡劣，不停大聲話咖啡係要磨要等，同埋好多人排緊隊，但因為已經等咗25分鐘，咖啡仍未到，實在非常不理想，要求侍應反映，但該名扎馬尾長攣髮戴眼鏡肥胖女侍應態度再次非常惡劣，大聲話係要等，同埋仲大聲對其他侍應講，以後同啲客講，若要點咖啡，話飲咖啡係要等，實際係說話俾客人聽，令客人非常唔好受。今時今日咁多香港人北上深圳消費，就係呢啲惡劣店員造成嘅，呢間公司應該好好反省一下同train吓啲侍應。

晚市去買外賣自取，收銀掛住吹水...見到客人想叫嘢當睇唔到繼續傾，要主動開聲問佢仲要好似阻住佢吹水咁！本身諗住外賣無服務都算拎走又唔係同佢做人世🤷🏻‍♀️叫左焗豬扒飯返去打開睇都心知瀨嘢架喇🤢個醬好深色，然後一食就爽喇....咸到要洗腎既程度🤮仲要有生米😑一路食勁咸一跟食到啲硬米😵焗豬都可以整到咁難食，見佢堂食都係得幾枱人終於知點解了😂😂😂仲要加埋咁既員工都係快啲執左佢把啦🤷🏻‍♀️

一送嚟就係咁，朝早9點零入去食，得三幾枱客。其實炒過兩隻太陽蛋唔駛幾多錢，花幾多時間。坐有收銀嗰區勁熱，同場有位該餐廳清潔姐姐坐喺長櫈休息緊，都唔得問題，但係開電話睇開到勁大聲，員工經過都冇提示佢較細聲個電話。坐佢隔離真係多謝佢

今日正式開學嘅日子💕N班女女9:00開學將佢帶咗去學校之後我哋就去咗食早餐啦近近地就去返麗港城商場裏面食一入到去就見到椰仔冰室有兩個鋪位都好多位，但都差唔多滿座😆一入到去就叫咗早餐食有沙嗲牛肉公仔麵，配腸仔蛋多士💕💕正宗嘅港式早餐❣️識落都有驚喜🫶🏻味道好好- 沙嗲牛肉公仔麵味道好濃郁，面都夠爽口。另外腸仔同埋蛋個味道都唔錯整體嚟講成個早餐都非常滿意！唯一係麗港城商場比較焗～就算喺餐廳裏面都依然覺得有啲焗🤭

今日陪朋友去麗港城商場買嘢見人少少就試吓呢度個下午茶餐呢間餐廳係分開兩邊嘅有卡位嗰邊張張枱都有人坐晒咁就過去對面有收銀枱嗰邊一入去一個客都冇只係見到個廚房大叔橫瞓咗喺度休息喺無人招呼嘅情況下唯有自己坐低睇吓有咩食本身收銀枱有三個呀姐喺度大聲講大聲笑但係見到我舉手叫落單就即刻走咗去對面侍應呀姐完全當客人透明最離譜係焗飯係凍嘅説好杯凍檸茶少冰點知原來都係三份二杯冰可能我咁唔好彩撞正係員工用膳時間啦但係一人坐一檯搞到客人都唔好意思坐低就真係幾大支嘢囉仲要男男女女都講咸野同講賭馬真係成餐飯都好反胃🤢

突然想食星洲炒米，見佢外賣40蚊平平地就買黎試下。另外再買多個男人的浪漫（豆腐火腩飯）。豆腐火腩飯的飯，乾爭爭唔夠水咁，撈埋d汁勉強可以嚥下。至於火腩，真係好鞋。星洲炒米稍為好吃，但只有2成似星洲炒米的味道，叉燒好鞋好硬。無下次了

椰仔冰室就係商場ground floor,大門口一入去，沿住左手邊7-11左轉入去就見到。都算幾大，佔2個鋪面位置。最近驚喜夜晚佢有個好抵既外賣餐，每款都係$40，不過外賣盒+$1，即係$41一個。唔止weekday,連星期日都有！落單個阿姐有d冒失，講左幾次，都依然係落錯單。叫左焗肉醬意粉，同焗魚柳飯。肉醬意粉味道不過不失， 肉醬略嫌有啲少，不過呢個價錢嚟講基本上都算合格，冇乜挑剔。焗魚柳飯就有啲失望，塊魚柳太咸。

椰仔大富貴炒飯（$78）☕️ 奶茶（跟餐+$14）賣相：🐧🐧🐧味道：🐧🐧🐧大富貴炒飯以普通膠盒裝載，份量約有2碗飯，十分飽肚。炒飯配料有蝦仁、小元貝、瑤柱碎和菜粒，配料份量一般合適。味道方面，炒飯調味、鹹度偏淡，必須配搭鹹香的瑤柱碎食用才稍為夠味。蝦仁一口大小，夠新鮮爽口彈牙。小元貝則只有青豆粒般的大小，入口質感因尺寸太小未能細嘗，味道淡淡的。菜粒新鮮爽甜，令炒飯口感更豐富。奶茶質素一般，不過不失。外賣等候時間：🐧🐧🐧在平日下午6點幾下單，約需時35 分鐘送達，與預定時間相約。🐧❤️結語：炒飯整體口味偏清淡，健康之選。

意想不到茶記早餐🌸沙嗲牛肉公仔麵配腸仔炒蛋牛油厚多士 $37⭐️⭐️⭐️☆☆沙嗲出奇地夠香，有花生醬味。公仔麵煮到剛好熟，放耐一點都不會變糊。腸仔偏鹽，不過有煎過。炒蛋過熟，牛油厚多士不夠脆也不熱🌸厚切午餐肉煎蛋公仔麵（轉出前一丁+$5）$41⭐️⭐️⭐️☆☆出前一丁湯粉及麻油要自行落，原切午餐肉煎得夠香，煎蛋來到時已穿破，蛋黃汁流晒出黎，麵就煮到剛好熟======詳情=======椰仔冰室 (麗港城商場) (藍田)地址：藍田茶果嶺道88號麗港城商場地下G28A-G28B, G29A-G33================#yummy #香港美食指南 #香港美食 #hkfoodie #hkfood #hkeat #吃貨 #吃貨日常 #RnT吃貨 #RnT茶餐廳 #茶餐廳 #茶記 #藍田#藍田好去處 #藍田美食 #美食 #公仔麵 #麗港城商場 #早餐 #多士 #午餐肉 #煎蛋 #蛋 #茶餐廳早餐

今早返工去了公司附近食早餐，之前並不是這名字，現在轉了椰仔，覺得很特別入去試吓。嘟嘟安心及量體溫後，便自己揀位，環境坐位舒適，休息一下是不錯選擇，因為其他快餐店太迫，但今日早了出門就可以慢慢食。叫了個A2醒晨早餐：沙嗲牛肉公仔麵配腸仔、炒滑蛋、牛油厚多士、飲熱奶茶。蛋夠滑，沙嗲公仔麵也很好，做早餐是最合適。