百芳池上便當 (V City)

營業中

休息中

夜晚八點半一個人自己光顧，卻遇上非常不快之體驗。男店員1示意我搭枱，我進入店舖內後看到有三張四人枱都是空的，其中一張是空的，另外兩張係未執枱。由於店員要求我搭枱的該枱食客正在咳嗽，我已即時向男店員2查問是否可坐另一張，男店員2示意我坐空的四人枱。坐低唔夠一分鐘，正在看點餐紙之際，男店員1帶住3位食客行埋去我張枱，表示「我地有三位，麻煩你去返剛剛個張枱」。我嬲到即刻起身轉外賣。我明白一個人好多時候都要搭枱，我完全理解，但我光顧時是晚上八點半，並非繁忙時間，外面係無人排隊，同時仍有兩張空枱，只不過店員自己唔執枱，就強行要我搭枱，搭枱既食客仲要咳緊既。就呢次既體驗，我完全唔理解呢位男店員諗緊咩野，完全無同理心，亦都唔明白咩野叫顧客服務。網上面完全搵唔到呢間公司既投訴資料，我嬲到要上黎專登打篇咁既野

食物質素一向都麻麻地，只係佢作為VCity唯一間台灣嘢，要過下口癮都只能食佢。今次嗌咗三個餐同小食，又有湯又有面又飯又有炸雞又有小食，三個餐放晒落同一個袋，可想而知個袋有幾滿，個跟餐送咗嘢飲埋單嗰陣唔講要加一蚊買膠袋。整好個陣就就咁俾杯嘢飲拎走，又冇膠袋，好聲好氣問有冇袋，個侍應就喵嘴喵舌話你冇買膠袋要俾一蚊買膠袋，老實講買就唔係問題，埋單你地又無問，同埋就唔應該咁嘅態度囉，佢仲話你咪就咁擺落個袋度囉，個袋都裝到滿晒，擺到都拎唔到喇，同埋個袋又有炸嘢唔通要個客人擺落去整冧晒啲炸嘅小食？

Vcity尼間台灣飲吃，已經開左幾年，便當一直都高質素，價錢十分優惠，必須表揚下樓面同事，非常耐心講解以及帶位入座。重點在vcity食飯沒有加一收費，用餐體驗十分優質。非常推薦大家來。另外睇到有其他食客食評，想說當天我都嚮到，拒地無白飯銷售，甘我來買便當，我同員工溝通過五要白飯都可以，並非臺客描述甘店家賣左比我地，員工已經好耐心解釋左比我地聽，但是果晚我地真係肚餓，寧遠再出去買白飯。之後會繼續支持百芳Vcity店！

之前食過一次都正正常常，但食過今次之後唔會再光顧。首先係落單，原本坐低時服務員有講冇晒飯，只可以嗌麵餐，唔明白點解後來有四個客人入嚟嗌外賣，反而可以嗌到四個飯餐。坐低Order咗「滷雞扒肉燥乾拌麵」，麵質就中規中矩，本身比嘅汁已經唔多，撈起上嚟已經唔太好食。「滷雞扒」就簡直出晒事，可以話係食過最鹹嘅雞扒，可能係因為夜晚過去食，雞扒已經滷咗好耐，但都冇可能整到咁難食，得個鹹味。未食完當下，已經唔止一位服務員多次催促，其中一位更加直接用手指住我地，稱「佢地未走，點執嘢啊！」趕收工唔使咁樣掛😅用餐體驗極差，不會再光顧。

經常都外賣，第一次試堂食，套餐已包飲品，平均六十蚊左右有交易。先到收銀處下單付款，再等待送餐。店舖不大，座位不多。堂食不需另加一服務費。台灣鹽酥雞肉燥乾拌麵 $64麵線幼，好軟好滑，感覺不太合適作拌麵。說是肉燥，不如說是滷肉比較適合。拌勻後，麵線食落比較黏口，醬油味甜甜地，肉很淋，肥瘦均勻，不過整體份量不多。鹽酥雞有6件 ，粉漿脆，雞肉嫩，灑上椒鹽，有台灣的味道。另有半隻滷水蛋或一棵小唐菜。香酥炸雞腿便當 $68雞腿不算很大隻，但炸得很脆，肉很嫩。便當配有辣菜哺、粉絲、紅蘿蔔、椰菜、滷水蛋半隻。賣相拼色相當吸引，但飯不多，菜哺少烤辣，很惹味，拌勻食用口感豐富。附送茉香綠茶，少少甜，解膩不錯。

暫時係V city入邊唯一一間嘅台式餐廳✨所以基本上係冇得揀嘅情況之下，嗰日入到去食啦，仲記得啱啱開始嘅時候，佢嘅味道都真係幾似台灣嘅餐廳嘢食✨但係對上一次去食嘅時候，就覺得煮嘅人就冇乜個熱情啦，所有嘅麵都係發到脹晒，真係唔係好食✨其他嘅食物就中規中矩，真係唔知想點✨唯獨係飲品就冇乜特別啦咁就希望佢可以繼續進步啦🤝🏼

今日想食台式料理，咁啱商場有一間餐廳食台式料理嘅，又唔使排隊，所以就去咗呢間餐廳食。餐廳有唔同食物選擇有便當、湯麵同乾拌麵。今次就叫咗滷雞扒便當嚟食。雞扒非常之大塊，肉嫩多汁，非常入味！便當仲有好多配料有粟米、半隻滷水蛋、粉絲、菜脯同椰菜。飯嘅份量都非常之多，一定夠飽！滷水蛋都好入味，菜脯都唔會太鹹。所有配菜夾埋一齊食，真係好好食！便當價錢非常實惠，都幾抵食，性價比好高！下次再尼會想試吓佢嘅乾拌麵！

本來都偏好台灣菜，經過見到鋪頭幾開陽，價錢亦實惠就試一試啦！食過幾次後，總結到一個結論，就係配菜都好好食呀！😆（主菜就 ......)鹽酥雞／雞亦滷肉飯配菜：菜，肉碎，滷肉及粉絲都好食，特別係粉絲！如果有出淨粉絲就好了，真係好好味；滷肉質量都唔錯，送飯一流。主菜：鹽酥雞-炸粉太厚，而且無台灣嗰隻味道🥲；雞亦就係普通雞亦，無咩突出，亦無咩驚喜；豬扒滷肉麵配菜：菜，滷肉同麵嘅麵質都唔錯，滷肉加上麵，又係一流嘅配搭。主菜：豬扒，嗯～就比較乾，味道亦食唔出台灣嘅味道，就.......很普通呢間店仲有個優點，就係可以優惠加配台式飲品，所以台式飲品愛好者嘅我，都係1次又1次過嚟🤣。（免費嗰杯紅茶綠茶其實都唔錯）

在vcity 經過這裡看到這間的下午茶餐係最正常所以就揀咗食依間 估唔到5點幾客人都幾多下午茶餐⬇️·香酥雞腿・（半份）酥脆奶酥吐司餐普通嘅大大隻炸雞脾 第一次飲酥脆奶酥口味 很熟悉的味道 但又講唔岀係咩😂·滷雞扒•（半份）酥脆奶酥吐司餐都幾大塊雞扒 滷水都好入味👍🏻套餐仲包指定飲品 揀咗茉香綠茶 普通·夜市名物拼盤地瓜丸（5粒）、鹽酥雞、台灣古早味香腸估唔到地瓜丸裏面係實心嘅 所以食完兩粒都已經覺得有D漏 鹽酥雞炸得入味 香腸甜甜地都唔錯👍🏻

以前放工都會在這店買外賣，但因為之前試過幾次外賣飲品甜度攪錯，我已經少了在這兒買外賣，其實食物味道已經差咗，杯飲品又變細咗，佢只係勝在地點方便。可惜昨晚都係又出事，手機選了「無糖」飲品，回家飲了一口，甜的，再看杯的貼紙，是半糖！🤬🤬結果倒了！那個「便當」價值立時貴晒！！唉！佢哋咁多人企在前台幫手，卻冇人對單！沖飲品嘅人真係好唔小心！如果次次都靠個客去對單，自己唔守住第一步，呢間舖都經營不善了，真係冇下次！😡

年廿九下午去了產檢後、真的非常肚餓，趕緊去食個下午茶醫肚！ 到了這個台式店，發現有Tea set, 便點了一個炸雞翼及烤奶酪多士套餐，並附送了茉香綠茶！ 奶酪多士真的是十分出色！熱、香口及面包軟熟，是我少有吃多士味道那麼難忘的！ 十分推薦另外對我來說十分到位便是那杯熱茉香綠茶，真的是沒有糖份，因懷孕妊娠糖尿，沒有糖份的飲料真的對我十分重要，然而那個茶香還是挺夠的，不錯！最後有點少失望是炸雞翼、粉太厚、味道也略鹹，吃第三隻時已有點腻了，但總體來說還是可以的。

好耐都冇去過台灣啊🤩 唔知食乜好就試吓呢間台灣菜啦☺️ 其實餐牌上面好多嘢食揀，不過我唔記得咗影低同大家分享，尤其是嘢飲真係好多選擇😌同屋企人叫咗肉燥青菜，花枝丸，彈牙紅燒牛丸牛腩麵，滷雞扒肉燥乾拌麵。飲品方面叫咗金桔檸檬同埋芋頭豆乳。本身想叫皮蛋豆腐，但係店員話今日冇。😖咁就叫個青菜啦！呢個肉燥青菜有大約12舊小棠菜，上面淋上肉燥，啲菜都幾甜。😛兩個人食都夠分。☺️花枝丸發揮正常，上面灑上椒鹽，墨魚味重，非常彈牙。金桔檸檬酸酸甜甜，而芋頭豆乳的芋泥口感棉滑，無糖豆乳豆味香濃，本身芋泥都帶有甜度，豆乳無糖剛剛好。紅燒牛丸牛腩麵先到，麵條煙靭有咬口，軟硬適中，牛腩亦都夠腍，夠入味；牛丸方面咬開充滿牛肉汁，而且彈牙。滷雞扒肉燥乾拌麵肉燥頗多，不過麵條相對牛腩麵煮得比較腍，同牛腩麵係唔同嘅面底。雞扒滷得比較鹹，配合味淡的拌麵剛剛好。雖然雞扒切得比較大件，但都煮得比較腍，所以無傷大雅。總括而言，座位雖然唔闊落，但係shopping 唔買咁多嘢嘅話都夠坐；食物質素唔錯，飲品選擇多，而且好飲。😋

呢日屋企人係附近上堂，之後得返自己一個唔知去邊就嚟左百芳自己食午餐，好彩唔洗等位。（時間係12點左右未到午餐時間）叫左個慢滷豬手便當$63，跟餐嘢飲叫左凍茉香綠茶少甜少冰。個便當小菜有埋半隻蛋，粟米，粉絲，少少蘿蔔絲同娃娃菜。全部小菜都好岩我口味，夠晒台式😬而豬手方面就有5嚿到，最驚食豬手見到啲豬毛搞到無晒胃口，好彩呢間都啲毛都剃得算乾淨。而味道方面都算滷得夠入味，不過就唔太冧，應該可以再煮耐少少。嘢飲方面因為叫左少甜少冰，都仲飲到綠茶同埋茉莉花味，算係不過不失。同埋真係有少到甜，值得讚👍🏻最後環境方面，因為個鋪位都比較細，啲枱同凳排得有啲密，不平時見佢都多人等位，密啲入客量高啲都ok.

是日諗唔到食乜，我女話想試吓Vcity間台灣嘢，都開咗好耐，之前係小王牛肉麵就食過，改咗呢個就未食過。12點去到，尚早，都已經差唔多坐咗8成，座位都幾迫，但坐落又唔覺。嗌咗個百芳滷雞扒便當比老公$65，佢個餐有嘢飲，有三款茶：綠茶/紅茶/烏龍茶，叫阿薩姆紅茶（M)走甜少冰。個女就食香酥豬扒肉燥乾拌麵，茉香綠茶（M）微甜少冰$64，我就豐盛三品牛肉麵$75，改新竹米粉，我呢個冇嘢飲，但每個餐都有個海帶前菜。老公個台式雞扒飯都幾好食，份量都夠，雞扒大大件，有個海帶前菜。阿女個豬扒肉燥乾拌麵，豬扒都唔係話好乾，ok，但個麵就好冧，好一般。我個三品牛肉麵，係最貴，牛肉好冧，但係無論湯底或者係牛肉都沒有驚喜，有少少失望。埋單總共$204，唔使加一，不過不失。

前幾日去咗百芳池上食飯，整體而言，味道真係好好！特別要推薦佢哋嘅牛肉麵同肉燥飯便當，仲有珍珠奶茶同其他台式飲品。首先，講下牛肉麵。牛肉麵湯底鮮香濃郁，牛肉片軟嫩多汁，每一口都帶來滿滿嘅牛肉香。麵條煮得剛好，彈牙有嚼勁，配上牛肉湯，味道更加豐富。如果你鍾意牛肉麵，呢碗牛肉麵絕對係一個必試嘅選擇。仲有肉燥飯便當，真係好正呀！肉燥醬汁濃郁香濃，肉末軟嫩多汁，配上白飯，每一口都帶來滿足感。呢個肉燥飯便當係一個非常好嘅選擇，特別係你鍾意台灣小吃。百芳池上嘅珍珠奶茶同其他台式飲品亦都好好味。珍珠Q彈有嚼勁，奶茶香濃滑順，大大杯，每一口都帶來滿滿嘅茶香同奶香。而其他台式飲品，都係地道台灣味，值得一試。整體而言，百芳池上係一間非常值得推薦嘅餐廳。牛肉麵同肉燥飯便當味道出色，珍珠奶茶同其他台式飲品都好好味，令你嘅用餐體驗更加豐富。服務亦都好好，環境舒適。下次再去，一定會再試吓其他口味嘅台灣美食！