肥媽屋

營業中

休息中

在荃灣香車街街市熟食檔經過這間車仔麵檔好多次今日決定要試下係咪傳聞中的好食我要了一個幼麵另外要了4個餸：豬皮 豬肉餃 蘿蔔 生菜再叫了一杯朱古力熱飲碗麵有好多豬皮 微辣的幾好食蘿蔔炆得夠腍甜幼麵都爽口呢餐總數係40蚊杯熱飲係13蚊 即係碗麵只需27蚊計起上嚟碗麵好抵 而飲品就偏貴了

原來荃灣有間幾抵食既車仔麵🌝我叫左個白菜餃+牛丸+蘿蔔+撈粗😋蘿蔔夠入味👍份量啱啱好埋單都係盛惠$19🤩佢哋響老闆娘雲南米線同一個街市😏不過佢地5pm就收工😂

諗番起，兒時很希望食車仔麵，但隨著時代發展，傳統嘅車仔麵檔愈來愈渺茫，咁近排又口痕心癢想食車仔麵。於是就做下資料搜集，咁搵到一間好傳統嘅車仔麵檔，仲用石油氣定gas爐打氣，咁就一嘗傳統特色的車仔麵啦。一於以往，車仔麵當然要飲支大可樂啦，講真新式麵檔好少有大支樽可樂，難得傳統地方仲有，一定要叫啦。除此之外，車仔麵先係主角，我就揀咗魚皮餃，豬紅，豬皮，魚蛋，粗麵加底。另一伴揀咗米線，通菜，墨魚丸，蘿蔔。我覺得好有特色風味，味道令我諗起兒時在街邊檔揀餸揀麵。雖則冇冷氣，但食物嘅味道，價錢，質素成正比。

去左肥媽屋幾次都無開 好擔心佢唔做我第五次再去睇下有冇開啦！終於有開瘋狂叫餸 share 黎食 叫左凍奶茶同五花茶兩人埋單$101 極度平價超滿足 超開心 超感動但好熱 27度都已經好熱 但唔記得帶風扇

呢個車仔麵檔，仲以為隨著歲月又被淘汰，誰不知原來早早轉移左陣地去左香車街街市扎根！實在太興奮細細個食已經覺得人間美食，仲有有玉泉汽水樽裝住自家菊花茶！真係久久也能回味魚蛋一份都仲係三蚊，魷魚係咬落好脆，豬紅係好滑嗰種...老公叫左三份餸加個2個麵，都係$30唔使；我就叫多份蘿蔔，又係$30唔使！而自家五花茶同大支裝可樂都係$8呢度食野要睇準時機，因為休息時間好飄忽，lunch hour 就好似相中咁「墟磡」好明顯係曾經中過伏啦⋯⋯

記憶中,肥媽屋只少有三十年!由大河道巷仔,兆和街到今日香車街街市,味道如ㄧ,唯ㄧ不同係以前下午五点開,而家收下午五点!車仔麵間間都差唔多,点解搬到去香車街都重咁好生意?除咗好味!還有數拾年嘅情懐.餸有平有貴:由$3猪红,咖哩魚蛋至拾幾蚊嘅牛腩,豬腸,ㄧ样咁好味!咁多年黎,必食幾样餸,咖哩魚蛋有咖哩味,又有魚蛋味!豬皮呢的平嘢,做唔好有"益"味!但呢到不單冇,而且做得非常入味.豆卜,加入豬肉再炆,超正!最正係鳳爪,炆得林的味刚刚好,加的蠔油同小小豬油,即時流晒囗水!唯ㄧ唔好係好多時都唔開,公眾假期外,暑假又唔開,記住打個电話去問吓開唔開先,否則摸門釘!

上星期去左肥媽屋兩次都無開，幾驚佢執左，不過好彩我夠為食，不屈不撓前兩日再去望下，有開啊開心晒......................黎到梗係食撈面啦我叫左：豬腸，介蘭，牛腩，釀豆卜，鳳瓜，粗面最緊要最緊要係...走蠔油要咖哩汁..............................我係分格線..............................重點推介：釀豆卜～真係好好味，一咬落去好多汁好實在，實在太好味，所以我叫左兩份7蚊有3粒，我食左6粒

【肥媽屋】– 故名思義有個肥媽坐陣, 每天負責密密地煮麵, 忙個不停。每位前來的食客, 都會自動波到檔前落單, 餸款由$3 - $14 蚊不等, 最低消費$15。嗌完要咩麵同俾錢之後, 就自己揾個位坐定定係度等食!呢度多數人揀撈麵, 跟大隊包無衰。今次我揀左 3 個餸, 咖喱魚蛋豬紅魷魚撈粗( $21) 加支細可樂($6)。今時今日三十蚊唔洗就醫飽你個肚 WO, 邊度揾?呢度無冷氣, 無卡位, 無挨 PAN 椅, 卻偏偏有種懷舊的風味, 吸引一群忠實食客支持。等了數分鐘, 哥哥仔就拎碗麵過黎, 正確 D 講, 係一個兜! 即係廿幾年前仲有街邊小販時代, 企住食豬腸粉個 D兜。每碗麵有會醒多條靚菜俾你, 靚相就唔錯喇, 好似幾好食咁! 我個碗係咖哩汁, 咖哩味唔濃亦唔辣, 如果辣番 D 仲好! 咖哩魚蛋($4)有 4 粒, 唔細粒嫁, $1 粒魚蛋唔細粒嫁, 無咩要求, 但每次會必叫! 豬紅($3) 雖然係懷舊嘅價錢, 但一 D 都唔孤寒, 有成 4-5 舊嫁! 魷魚 ($10) 相對地貴 D, 但係淥得夠爽口彈牙, 魷魚剪開一條條, 好方便食! 加多$6 有支冰凍 GE 細可樂, 夏日

還記得讀小學時（大概小三以前），街邊仍不乏乾撈的、放在碟上吃車仔麵，但時至今日卻變成十分稀有，但在荃灣香車街街市上面、在這區頗有名氣的「肥媽屋」仍可找到。每到午市此店例必出現排隊人潮，可見其有料到。我最愛吃其自家製釀豆卜及魷魚。特別是它的水魷充滿彈性，配搭粗麵，加埋佢帶點甜既獨門撈汁，是充滿懷舊風味的極品車仔麵也。不過呢間店卻勁有個性，天氣太熱唔開，心情唔好唔開，我都試過好多次摸門釘。至於大家食唔食到，就要看你有沒有食神保佑了。

香車熟食中心除了有長長人龍的老闆娘米線外肥媽屋的車仔麵又是另一番奇景這店雖不及老闆娘人多但亦一樣有人龍出現是日下午12:40到達已經有十幾人在排隊麵檔有一位哥哥在落單肥媽及另一位女士在淥麵但都等了半個鐘才到我落單後付款 然後自行找位置坐再等5分鐘左右 就有專人送上車仔麵肥媽屋車仔麵可選湯麵或撈麵今日叫了粗麵配釀豆卜、魷魚、豬腸（蠔油撈）另加凍檸茶，共$43釀豆卜($7) 有3粒，但淥過後配車仔麵有點不夾魷魚 ($10) 有6-7塊，是玻璃魷魚來的，由於是白烚，所以配上撈麵的蠔油汁味道就豐富了豬腸 ($14) 一樣有6-7塊，無臭味 清洗乾淨，不錯粗麵 ($4) 就是一般車仔麵的麵 所以無評價但蠔油汁稍為咸了些，下次要少汁就好凍檸茶是一般茶餐廳水準，但甜了些今天天氣有點熱，所以食完都立刻離開了而人龍依然不減若然天氣涼點 會再來吃

今日經過香車街街市...見到肥媽屋新去試下啦！排隊等左15分鐘左右先叫到野食...食物等既時間都幾耐！今日又好熱...😅等了又等...終於等到...撈粗味道不錯呀！足料既！佢既魷魚爽口，魚蛋都好味！唔錯既車仔麵！另外我覺得用舊式鐵兜裝住個麵好有特色！不過車仔麵唔係好快架咩...如果假日趕時間就不建議來，因為等都幾耐！佢以落單形式...唔同出面排隊即叫即做既！

今日lunch 去左香車街街市熟食市搵食，夏天就好炒去，因為冇冷氣卻丫嘛，近排冇咁熱就去搵肥媽屋食車仔麵，我本身係好鍾意食車仔麵既，因可以揀好多餸，豐儉由人，呵呵肥媽屋要早少少去，因為好多客仔去搵佢，我去到都要排一陣先可order ,今日點左豬紅，咖哩魚蛋，魷魚，豬腸同菜配米粉，呵呵，呢個午餐都幾豐盛！肥媽屋用料確實係靚野，豬腸用心製作，味道超得，難怪要$14， 但係值既！今日湯底就咸左少少，要注意下啦

15／7 （星期五）, 今日下午3：45在尖沙咀辦完事, 跟住要再去荃灣辦些事才回家， 3：45我仲未食午飯， 諗起食肥媽屋車仔麵， 半年前食過第一次，我知肥媽屋收下午5：00， 有諗過佢會唔會休息或者早D收舖， 所以我打電話去， 打左兩次， 但無人聽。 又諗 ： 唔知會唔會佢地唔得閒聽電話呢？既然都要去荃灣， 去到先算。 今日尖沙咀及佐敦一帶好塞車， 揸烈火戰車曬到甩皮， 焗到暈， 全身濕晒。 去到肥媽屋無開舖， 貼左紙寫 “天氣酷熱休息“！ 咁呢度無冷氣又真係好熱， 坐係度都流晒汗， 所以老闆娘都要避暑。 唔通我咁黑仔， 淨係今日休息？ 食唔到佢車仔麵， 好失望潻。

I ordered fine egg noodles with red chinese sausage, beef brisket, squid balls and choi sum. Food is pretty tasty especially the beef brisket and the portion is very good except the noodle base is only 2/3 as normal. Though there is no air condition, the super fan is good enough to cool off my heat. They are smart to recycle the soda bottle to carry their chinese drink but it might not fullfil my food health and safety criteria that I ordered cream soda instead. In general, it is a good plac

早前看報章得知香車街有間叫肥媽屋的車仔麵店, 老闆肥媽對選料同製作都認真, 於是lunch就和同事來朝拜。中午一點多來到, 排隊落order再加等麵來, 到一點四十五分才開始食, 食得頗急呢, 如果可以早一點點來會比較好。肥媽屋, 在陳設簡陋的街巿中, 仍有很多人排隊吃。車仔餸中牛腩和豬大腸比較貴, 其餘價錢都很相宜, 幼麵粗麵更只是$4一個。我叫了撈幼麵$4, 蘿蔔$4, 芥蘭$5,墨魚丸$4, 冬菇$5, 豬皮$6, 總共才$28, 已經大大碗, 每樣餸都份量頗多, 十分豐富。因為見價錢不貴, 就叫了四個餸, 女生來說有點多, 不過麵的份量偏少, 男生可能要叫兩個麵才夠。我第一次來這裡食, 眼見食客九成也叫撈麵, 所以也跟隨了, 之前報章說有秘製的沙爹撈麵醬汁, 不過今天只有蠔油或咖喱汁選擇, 就要了咖喱汁, 咖喱汁不算很濃, 淡淡的也夠味。蘿蔔清甜無渣, 芥蘭翠綠鮮嫩, 墨魚丸比較粉輕微墨魚味, 冬菇好大件炆到好淋入味, 豬皮較爽未夠淋。比較欣賞菜的份量好多, 對愛吃菜及需要菜的人來說, $5的菜很充足好抵食! 總結蘿蔔、芥蘭、冬菇值得再吃。同事叫的牛腩, 炆得軟淋, 腩汁好味,