芝麻綠豆甜品屋

營業中

休息中

夜晚紅磡嘅糖水店一向都多人，呢間亦都唔例外。我地等左30幾分鐘先有位，因為我地都係第一次來食，所以我地三個都點左呢度出名嘅蛋白燉鮮奶，叫左一碗原味蛋白燉鮮奶，芝麻蛋白燉鮮奶同核桃蛋白燉鮮奶。我叫左原味蛋白燉鮮奶，一開始食落覺得確係幾滑，但味道好一般，幾甜，頭個幾啖覺得還可接受，但係越食就越覺得好怪，可能係太膩啦，食到仲有d想嘔，最後我無食完就走。兩個朋友食完芝麻蛋白燉鮮奶同核桃蛋白燉鮮奶後都話覺得麻麻，唔係太特別。

叫左合桃糊同招牌豆花芝麻糊，合桃糊味道濃，味道足，食得出用心製作，芝麻糊好有層次感，食完面果層豆花再撈埋芝麻糊，一流👍🏻👍🏻👍🏻👍🏻細細個已經食佢，成10年，味道都keep到👍🏻👍🏻可惜店舖有啲細，少少迫

同朋友食完晚餐當然要食番個糖水咁先至夠圓滿,朋友話呢間糖水店好出名,所以我都急不及待要試一下,好彩我哋食晚餐比較早,所以嚟到就可以立即有位,踏入門口第一步已經聞到一陣陣嘅薑味,我就諗點解會咁大陣薑味,打開menu我就估到原因,因為佢哋嘅招牌係濃薑麻蓉湯圓,既然佢嘅招牌係呢個,我就決定試下!朋友就揀咗濃薑辣辣蕃薯糖水同埋喳咋我嘅濃薑麻蓉湯圓一碗有8粒,我立即一啖湯圓一啖糖水,"嘩"咗一聲,真係好有薑味同埋好辣!!搞到我飲唔哂成碗糖水!!雖然薑味好重但真係幾好味另外兩個糖水我嘅朋友都有讚無彈啊! 鍾意食薑嘅朋友超級鍾意濃薑辣辣蕃薯糖水,完全飲曬成碗糖水都面不改容

或許是兒時的情意結，我超中意食芒果西米露，但亦感覺近年的芒果西米露又貴又唔足料，已經無小時候的味道了。直到讀大學時食到芝麻綠豆的芒果西米露（芒果椰汁西米冰 $25），就愛上這間店。這裡的糖水又平又好味，雖則人多時總有點壓逼感，食得比較趕。早前路過又忍不住吃了，本來沒打算為它寫食評，但太想推廣這裡的芒果西米露，所以吃了幾口後還是幫它拍個照。芒果肉又甜又夠多，西米露不黏也不硬。面頭有一堆碎冰，冰凍透心涼之餘又有多一重口感。最重要的是它的芒果汁底真的無花無假好好味，比起純椰汁西米露我更愛芒果汁西米露。而且廿幾蚊實在太抵食了！💕💕

#中伏二連發 繼清溪川之後諗住去食個糖水啦，就去到一間叫芝麻綠豆既甜品店，店內都不算太多人。地方環境衛生OK，但服務態度真係麻麻地。友人叫左呢個呢間店首創既【櫻桃小丸子】＄28係用櫻桃打成冰再加湯丸係上面，望落張圖片都幾開胃，點知一食落，成陣藥水味不單止！！仲要係神級酸！！個酸度係仲酸過7仔買開既激酸糖，仲要完全無甜味，食左一淡就頂唔順😫😫 其餘都由友人頂硬處理左。中伏指數：8/10推介程度：0/10打卡指數： 1/10性價比： 1/10

晚上和友人相約吃拉麵，吃罷後走著走著，經過一輪血併，肚子雖然不餓，卻累得很。走到這家遠近馳名的糖水店，加油兼歇腳。方一坐下，便看到比餐牌更吸引的，原來牆上掛滿了不少明星相片作招徠。憑他們的外型衣著，看出了這些照片該已有些年紀 😅。餐牌選擇多，價錢是出乎預料的低。最便宜的中式糖水，二十元有交易。我叫了蛋白杏仁茶$32， 朋友則點了芝麻糊湯丸$25。來的時候人不多，但轉眼食客又湧入了。此時店員要求我們坐一邊，好讓其他人拼坐。要求合情合理，但他的語氣卻是命令式的......這不是待客之道吧？雖為芝麻綠豆事，卻令人心裏閃過一絲不爽。甜品來了，蛋白杏仁茶，保留了杏仁的香，又沒有杏仁的澀。粉也真磨得夠細，啖啖幼滑。反而蛋白太碎，質地太實，口感不算好。而且份量比想像中少。大約只有平常甜品店的三份之二吧。性價比沒有想像的高，但尚算可以接受。朋友吃的是芝麻糊湯丸，這次我沒偷吃，不知道味道如何，但看他吃得津津有味，似乎是不俗的。人多擠迫，我們很快便吃完，又不想久留。收銀環節，店員亦是沒正眼，沒表情。甜品很暖，但人情卻是冷的。

近年百物騰貴，晚飯動輒過百已經不是新聞，想飯後食碗普通甜品都起碼40-50一位埋單...駕車人士都比較愛到紅磡搵食，最近連地鐵都伸延至黃埔，更令紅磡這美食臥虎藏龍之地，有更多人進駐！想找一家在市區性價比極高的甜品店，首選黃埔站附近的芝麻綠豆。小弟N年前以前讀理工、住宿舍已經經常幫襯，有誰想到多年後的今日，這裏的價錢只是稍微上升10-15%呢？一直最令我心動的是自選冰，尤其是夏天當造的蜜瓜+綠豆茸+椰子底，透心涼之餘亦香口無比，而且只盛惠$23...肯定市區沒有很多地方比這店便宜，而且我保證質素令你滿意！除此之外，老婆愛吃熱食，這店的蛋白杏仁茶亦十分吸引，又滑又香，如果愛吃杏仁的你必定要試，相信$32很難在其他地方找到。當然，這店招牌甜品亦有黑白，即芝麻糊燉蛋白、芝麻糊、西瓜芒果冰等等...不用等得太久；門口成條街都可以泊車；行2分鐘就有地鐵...地利優勢的確吸引！

食完晚飯時間尚早，又未食飽，一於食個糖水！ 芝麻綠豆好耐無食啦，今日因爲早所以唔需要等位。正常款式的糖水都有。喳咋 ($24)，好足料，有湯丸。薏米銀杏腐竹糖水加雞蛋($25)，我覺得太甜。芝麻蛋白燉鮮奶($24)，鮮奶好滑，芝麻糊份量只係少少。呢間野的招牌甜品。楊枝甘露($28)，芒果夠甜，不過不失。西瓜涼粉沙冰糖不甩 ($18)奇異小丸子($32)，呢款最有驚喜，奇異果沙冰，透心涼！ 食落有d奇異果籽的鞋口感覺，朋友不太欣賞但我幾喜歡，仲有好多粒湯丸。

明明糖水又甜又親民，為何變高傲呢？只是一碗糖就是因親民，以令全家致富，致富後就要裝高檔，裝排隊，裝留座❓🤣太諷刺吧.沒有客人在那種狹小之店內吃糖水，會想坐幾小時，阻生意? 人手不足，安排不當，全店留座，必須排隊為店做勢，否則就可能被拍枱，黑面！店內品質是合理，只是競爭對手弱，可能令人自我變強了😅🙈但生意態度就不敢認同了. 本是平民食店，硬走高檔，不淪不類，算了吧.人的自傲真的會令人走上不歸路. 老闆，發財要立品就生意興隆

是日相約友人係紅磡傾計談心，於是搵左一間比較岀名既糖水鋪坐底邊食邊傾可能係平日夜晚唔使等就有位直接入得。睇左一陣menu問佢是日湯圓係咩，個店員好似唔太識廣東話於是隔離個店員就幫佢最後我指左杏仁茶湯圓，友人就腐竹薏米糖水點知一黎就黎左碗合桃露既物體，我就同佢講係咪黎錯佢就話我係叫合桃露幾經波折終於換番俾我杏仁茶好濃杏仁味好有真正手磨既味道芝麻湯圓就無咩特別腐竹薏米糖水就好足料唔太甜整體兩碗糖水都岀色只係服務有待改善

今晚打完個牛牛邊爐個心都好似覺得仲係差咁一D 野, 我朋友一語道破就係一個甜品. 黃埔附近甜品店好多, 間間都做唔同的甜品, 今晚我地決定去支持傳統既糖水. 我地都排左好耐先有２位, 由於佢地出餐都叫快所以平均每個客人都唔會坐多過２０分鐘就會出黎. 真係實在太多人我地等左都有成２５分鐘呢碗渣咋加湯丸椰漿味好濃豆都好多不過係略為有Ｄ甜, 甜到牙都有小小唔舒服. 唔知係椰味太勁定係個糖水底. 係香不過真心太甜呢個芒果紫米露糖水, 同樣地香滑不過太甜. 紫米仲有點硬好似生米咁... 只可以講一句名過於實!

在附近吃晚飯，吃完飯有點意猶未盡，係時候尋找甜的快樂，附近就是這店芝麻綠豆，見到門口的雜誌廣告是多年前的，在這裏屹立不倒多時，應該也不是太差，所以就入去試試。門面及坐位充足，見到很多名星相在店內牆上。(忘記影店內環境)原來門前的企牌，已經是全店所有款式的甜品。當坐低時，打算點甜品，才知道可以點的款式有限... 但已經坐下，就繼續吧…因為想吃熱甜品，所以點了紅豆沙加湯圓。誰不知中伏了！這個質量，簡直是酒樓送的甜品級數，是敷衍的水平。最後只吃了三粒湯圓及三份一碗紅豆沙，因為不想浪費健康Quota, 沒有紅豆，只有紅豆衣及「糖」水，稀到不行，不吃也罷。愛人點了這個香蕉船，這個味道還可以。點了榴槤味雪糕及3.6牛乳雪糕，榴槤味算是濃郁可口，而3.6牛乳雪糕有點像雪糕車賣的雪糕味道，也不錯。附有半隻香蕉丶兩塊餅乾丶一粒士多啤梨及一點粟米脆脆。味道是可以，但這個要＄39，性價比很低。如沒有其他原因，也不會再encore此店了。

成日聽老人家講芝麻糊如果唔係用石磨親手磨嘅一定唔夠香滑不過石磨咁大座磨芝麻真係好嘥時間就算係甜品店都唔會用通常用攪拌機代替芝麻粒就唔夠幼細呢間就係芝麻打出名堂嘅小店出名芝麻蛋白燉鮮奶秘製石磨芝麻糊今次試左兩款石磨芝麻糊芝麻合桃糊湯丸芝麻合桃糊$24( +蔴蓉湯丸3粒$5)石磨正糊香濃細滑可口甜度剛剛好蔴蓉湯丸較細粒皮薄但餡料略嫌較少石磨芝麻糊$20食得出石磨幻滑嘅感覺烏黑油亮搭配順滑無比口感帶有一絲絲甜夠熱夠香特別暖胃

芝麻綠豆係公司附近好出名既甜品店，基本上同事叫親甜品都係叫呢間，所以都食過好多次，之前食過佢既石磨芝麻糊加湯圓、石磨合桃糊、金銀芋椰汁西米露同埋雪耳杏仁露加湯圓。芝麻糊同合桃糊都係好滑身唔死甜，質地唔稀剛剛好﹔雪耳杏仁露加湯圓都好正，杏仁露都係好滑身唔死甜，雪耳份量好多，食完覺得好補﹔金銀芋椰汁西米露就相對差啲，金銀芋即係蕃薯同芋頭，份量好少，連西米露都少得可憐﹔我今次食既係 " 點指冰冰 " - 即係彩虹蒟蒻冰加芒果 (配椰汁、花奶及芒果汁)啲芒果多到震，切到四四方方，又大粒又甜，蒟蒻都好多好有咬口，係食到尾段糖水比較甜，不過呢個真係好好食同抵食。食過咁多次，我覺得佢糊類既甜品做得比較出色，不過下次都會再試下佢其他甜品。以價錢黎講，其實都真係幾合理，因為佢比其他出左名既甜品店平。外賣最低消費$100，外賣每碗加$1。

平時食開芝麻糊燉蛋白，今次見到有新產品，就叫左個蛋白杏仁茶。其實都唔算好平，$32一碗，同埋都唔係大碗。食落去幾香，質地都幾杰，食多幾啖會膩。試過新野，下次都係會想叫返芝麻燉蛋白。