茶理史 (已結業)

👑小王子生日呀👑推介指數 ❤️❤️❤️❤️❤️(superjunior加爆❤️)#小王子 #厲旭 生日應援團响灣仔茶理史有活動呀，唔係唔飲呀？而且飲開嘅都知咩料啦！多選擇囉～😉即係有人問你想飲咩，就算飲過但睇完menu都係揀一大輪😂冷泡茶、手調奶茶、地瓜小芋圓鮮乳、鮮萃果茶、蜂蜜系列、龍珠寒天、海鹽雲頂等等。🌼御用冷泡茶(限量供應)：原朵蜜絲大皇菊甜茶HKD26(固定糖)✨可以話係功能茶，大皇菊含有黃酮素，提高免疫力，降低血壓，清熱解毒。✨對得多電子產品啱飲，清肝明目，緩解眼睛疲勞。✨作為強抗氧化劑，能夠減緩衰老速度、改善血液的循環，降低膽固醇等，對於改善三高有幫助。✨幼高身樽裝，飲完可以再用！飲落菊花味濃，消暑解渴又潤喉、如果可以微糖就更好啦！🧋手調奶茶：琥珀白玉奶茶HKD20✨人氣之選，半糖半冰甜度剛好又飲到濃郁茶味，白玉煙韌有咬口。.··🏠 茶理史 (灣仔)📍灣仔軒尼詩道288號英皇集團中心地下G08號舖

呢間良心小店真係幾值得支持。一嚟店面好多好靚嘅裝飾，又有海報又有標語，每次幫襯都覺得充滿親切感。而且近年嚟珍珠奶茶真係賣得越嚟越貴，好多都三十蚊起跳，而茶理史好多飲品都係二十蚊就飲得起，間唔中飲下，年中都慳返唔少。白玉腐竹奶茶係市面上非常非常少見嘅手搖飲料（真心未喺其他舖頭見過），有種飲甜嘢嘅罪惡感當中加返少少健康嘅錯覺，算平衡返少少啦。飲得呢杯嘢我會揀熱嘅，半糖，甜度會有少少似腐竹糖水但變咗奶茶底。白玉其實同一般珍珠差唔多，都幾難得就算我嗌熱嘅啲白玉都唔會好淋唔好嚼。Overall味道我覺得都有中上㗎，$25物有所值！btw有免費杯套任攞，好warm好靚！

今次試左個芋頭鮮奶芋圓 首先店員態度好好 讚！ 另外野飲都好好飲 又唔甜 芋圓又食到一粒粒好有咬感 微甜，芋頭鮮奶飲到有粒粒芋頭 奶都係用外國奶 整體夾埋好好飲 絕對值得一試 建議大家飲呢個！

天時暑熱, 喺條街行左咁耐真係有啲煩躁, 好想飲一啖凍野解下渴🤤... 幸運的我就喺呢個時候遇見 - 查理史 🤩!!!一眼望埋餐牌度, 選擇都幾多, 第一次試多數都揀啲店主推介夠穩陣! 😤芋香鮮乳地瓜小芋圓 ($28)一向唔係芋粉嘅我, 飲咗一啖, 不得了真係好香 芋頭同芋圓嘅份量都唔少, 叫咗少甜都已經夠晒甜度, 正! 琥珀白玉奶茶 ($20)選擇咗呢一杯係見佢好平, 又係推介, 個顏色似泰茶, 白玉珍珠都幾好咬口, 叫咗少甜不過其實微甜應該都已經足夠.. 同頭先嗰杯地瓜小芋圓相比係有啲遜色

茶理史 - 木瓜鮮乳地瓜小芋圓 每次經過灣仔茶理史都會飲番杯，今次因為唔想飲凍飲所以飲熱飲，都係覺得凍飲好飲啲。啲護院都幾煙韌，有口感😋👍🏻 我去嘅時候有兩三個人等緊野飲，都唔算等得耐，5分鐘內就有得攞野飲。

某個weekend 諗住由灣仔行落銅鑼灣，行到一半，熱屎辣辣，去到呢頭，好想飲返杯drinks，諗過行多幾步飲一芳，但未試過呢間，今次就試下先。嗌咗菠蘿烏龍茶，無糖！菠蘿切碎晒，用枝大筒就啜到晒！菠蘿有𡁻頭，好好味！烏龍茶有茶味，唔gip，再濃返d就更好！😬坊間有d菠蘿係一塊塊上，仲要浸過糖水！😑其實喺條街到，點食塊菠蘿呢？呢杯嘢盛惠26蚊，份量又大杯！店員態度又好好，唯一唔好係舖頭冷氣不足！

🥤黃到震嘅台式飲品鋪💛 #黃店———————————#五一黃金週 黎啦 當然要每日一黃店post 啦今日就又去咗Cateyes 之後就行咗黎咗茶理史入面好多文宣 同memo紙黃到金 大家都勿忘初衷呀💛香港人加油💪🏻今次試咗熱嘅.🥤青檸松珀烏龍 ($26)飲杯熱飲補下身 揀咗烏龍茶底 茶底香濃 本身已經有青檸 結果今次揀咗微糖結果有少少酸同gip🤣🙈佢地嘅白玉同小芋圓都超正等我下次都加返先🤘🏻🤘🏻🎉🎉 聽日繼續 #黃色經濟圈 💛💪🏻———————————茶理史 灣仔軒尼詩道288號英皇集團中心地下G08號舖

茶理史係有名黃店，吸引左唔少人去大大力懲罰。所以店內貼滿唔少便利貼，充滿抗爭感。茶理史除左黃店之外，亦有環保意識，自携該店茶樽重用可以減$1, 鼓勵減廢👍。所以今次試原朵玫瑰🌹甜茶，玫瑰花茶味又香又甜，大大朵玫瑰花視覺效果又唔錯！價錢唔算太貴，尚可接受可以一試。原朵玫瑰花甜茶，視覺效覺唔錯，打卡呃like 一流。店內貼滿唔少香港人既訴求。寫返一張貼上去先😂。自携膠樽即減$1, 環保又可以平$1 ,支持💪🏻環保減廢。

茶理史肯定是每日我下班回家必經之路，每次經過都不入，非常不甘，因為店面黃到地震，而且聽聞飲料非常有質素，所以一直很想嘗試。今天終於有機會午餐買一杯試試，選擇了半糖少冰的芋泥小芋圓，味道絕對是剛柔並重，不會太甜又不會過淡。配料方面更是十足，飲到底仍然有大量芋泥，28元一杯台飲我覺得是物超所值，很適合不好珍豬的男性朋友。環境方面，值得一讚是杯蓋的黑白兩色，是我見過最特別的，細小的店面卻蘊含著無限的支持，令我有衝動想多多支持這家台飲店。希望各位手足不要停止懲罰！我給這杯飲品4.5分的上上好評！

【黃店推介 - 台式飲品店 - 茶理史🥤】🐷🐷 💭哈佬！開左呢個哎豬咁耐好似都冇同大家介紹過啲飲品店添～ 今日就同大家介紹呢間鋪頭痴滿哂連儂牆同文宣嘅米豬連認證黃店-茶理史！💛🐷🐷💬木瓜鮮乳地瓜小芋圓 $28宜家冬天（🐷🐷宜家叫冬天咩？？）最岩就係飲熱野養下身架喇🥰（🐷🐷哦原來飲甜野就係叫養生！！）今次叫呢杯野飲出奇地好飲！佢個木瓜味唔算好濃，但飲落都食到唔少木瓜/地瓜粒粒！啲芋圓都好重手，有成四份一杯咁多，咬落黏黏韌韌，又幾好食喎！😛 今次叫左半糖，對於我呢個平時飲開走甜嘅人黎講有少少甜，但又未至於接受唔到，下次可以試下微糖😝

茶理史一直係我好鍾意嘅一間手搖飲品之一！因為佢哋係仲興緊珍珠奶茶嘅時候推出芋圓取代珍珠，嗰種煙韌感真係一試難忘！·適逢今日振興黃色經濟圈，叫咗佢哋推介嘅芒果鮮乳地瓜小芋圓（半糖少冰），飲落真係冇揀錯😍 芒果汁唔artificial，同成三分一杯既芋圓好夾又有咬口！ 🥛·店內鋪左好多關於香港嘅海報，同埋黑警嘅暴力，我諗唔到唔撐佢哋嘅理由呀😤!- 芒果鮮乳地瓜小芋圓 ｜$36-茶理史灣仔軒尼詩道288號英皇集團中心地下G08號舖-

☺️☺️☺️喜歡飲珍珠奶茶嘅人，可以試吓呢間☺️☺️，就係灣仔小巷入面🙈，有時食完附近嘅餐廳都可以嚟飲杯嘢🙈，尤其呢排涼涼地，最啱揸住杯熱飲行下。當日叫咗海鹽抹茶，老實講抹茶味就爭啲，如果抹茶味再濃啲，帶點回甘就好了。杯嘢奶味比較重，不過奶蓋做得幾好幾滑。呢度仲有一樣抵讚，人情味好濃，老闆娘好好人，不斷同我地解釋，唔同飲品嘅特別之處，今次同行朋友唔舒服佢就推介佢飲某幾款茶，可惜朋友唔好台式飲品，但老闆娘都明白，好好人，下次想試佢啲冷泡茶！

今日一心要飲杯黃色台飲慶祝早收工, 見到附近有茶理史就走左過去. 舖頭入面貼有好多靚靚圖。間舖本身好多飲品簡, 款式多重類, 有茶, 有奶有果汁.簡左芉香鮮乳地瓜小芉圓. 本身杯野好靚, 去到見到張相就己經吸引左。加上市面上唔係好多台飲會有地瓜芉圓. 見到有當然要試試佢。 芉香味OK, 唔會得個甜字. 奶既比例都岩岩好, 唔會太多, 因為我好怕D奶類飲品太多奶, 飲到好滯, 個感覺會好差.地瓜芉圓有咬口, 不過過地瓜味再重D就更加好

 嚐一啖濃濃既醇茶，背後有一份摰真摰誠既故事。感覺到呢間店鋪就有一種對社會既責任，唔怪得之鋪面任何時侯都大排長龍啦！呢間「茶理史」 主打唔係普通既奶茶，佢地反而係以唔同既水果茶、冷泡茶、烏龍、花茶最受歡迎。而聽聞店主亦經常親身去到台灣揀選當地茶葉，咁品質自然有返咁上下啦！👇📌海鹽雲頂芒芒 - $32👉試左佢地最新推出既奶蓋水果茶，呢款奶蓋係無芝士調味，有驚喜既係改用左海鹽。食起上黎比較輕身，夠香夠滑，唔會太稀同容易溶化。份量亦都比到足，茶底味道清新，芒果味幾突出，唔會有果種死甜，值得一試！📌海鹽雲頂桃花 - $32👉而另一杯桃花係混合左草莓同埋桃味，表面既奶蓋同樣做到香滑不膩，份量亦都十足。海鹽既鹹香味加埋奶油既香又真係幾夾。茶味唔會比奶蓋搶左味，甜度亦都岩岩好，唔錯。

之前未試過，今日特登膽粗粗去試下原本諗住會同平時珍珠奶茶差不多味點知一飲，好怪味仲要奶味同茶味都冇唔知飲緊乜野，好失望白玉好明顯未煮熟，一半硬一半軟希望只係因為lunch時間太忙先會咁