華園餃子館

營業中

休息中

十級難食，十級伏，真心想問點解會有好評睇menu嗰陣樣樣想食，最後嗌左十三么，秘製唔知乜鵝撈麵，擔擔麵呢個就係嗰秘制唔制乜油麵，成七十幾麵，個油睇名以為會好香，點知乜味都冇，淨係好油好油。其實即係蝦籽麵，兩下食哂，蝦籽冇味。真心想講粗口，點解咁都賣得岀七十幾蚊？未食過冇花生味既擔擔麵，唔知自己食緊乜。擔擔麵正路唔係應該跟上海麵？我食左個好似劣食拉麵既麵底，好好好很難食。招牌十三么，除左同其中一個好評所講的的骰骰外，冇一個形容係match,睇賣相都見到幾厚粉，材料隻隻食落差唔多，因為用料劣!!!!!!超市一包包餃子仲好食過佢食完呢間野真心好好好嬲，絕對係人生食過最難食既其中一餐!!!!唔係要求好食，但真係勁難食!!!!!!!!!!!

蕃茄鮮肉水餃麵($39)個水餃無咩蕃茄味, 咬開水餃一半, 見到小小蕃茄😢但整體嚟講, 無咩蕃茄味, 覺得同普通水餃無分別, 對水餃比較失望, 不過每隻餃子好多汁,肉餡多,餃子皮頗厚❤湯底唔錯,食曬成碗水餃麵都算飽肚☺香煎小籠包(4隻$39)小籠包個底煎得好香, 咬落多汁👍 味道唔錯😍肉餡和味道都普通, 唔算太特別☺除了餃子, 仲有好多唔同款式可以選擇, 例如麻醬拌麵, 炒麵等等 有興趣可以試下, 不過價錢唔算好平😔

昨天下午5點幾，落樓下求其搵間舖頭食晚餐， 見好耐冇食呢間餃子舖， 而且客人不多就入去坐低。叫左南瓜鮮肉蒸餃，麻醬撈一丁，一杯熱的粟米鬚薏米水。 餃子皮煙煙韌韌有咬口，我喜歡厚厚的餃子皮。 麻醬一丁拌有一些青瓜絲 ， 醬汁有啲膩不夠清爽。呢間舖頭嘅食物還可以，有時候想食餃子也會來一趟。

一向覺得這裡的食物賣得偏貴。無疑餐牌內有蠻多的特色麵食以及餃子款式，用的食材醬料也是有心思且是屬貴價嘢的，這亦是她的出品價格偏高的原因....價錢貴而份量偏少，對最近要奉行節儉路線的我們一家，吸引力自是不大....不過今天小兒說一句想吃，我這慈父就心軟了，就決定破例再入去一趟吧....太太放棄了吃餃，轉而點了她少見會叫的擔擔麵....這個擔擔麵妙在竟是加了XO醬在內。入口既有XO醬的鹹惹辣亦兼備擔擔的麻醬香，味道頗見有趣的....只可惜白麵條質地處理得太淰了，進口黏黏軟軟的不是我的那杯茶....而我呢，就揀選了穩陣一點的東西，那當然是湯餃子了....餃子主要餡料用了較少用的蕃薯葉，感覺挺特別的。儘管淥的時間有點太OVER但肉餡仍是夠甜夠多汁；皮厚薄對我來講算是適中的；麵條於我而言只是用來填肚子的，沒有太大的吃頭....額外點的小食雞絲粉皮，粉皮是太軟身了；雞絲倒是真的手撕的；麻醬的甜與香混進粉皮中，令本頗為失色的它挽回了些分數....吃畢後，肚子只是半飽....但若在此再叫的話，又心有不甘....還是回家再找"口笠濕"吃好了....

有次因為要帶狗狗去太平道看醫生的關係而發現這間小店。為了迅速醫肚，我同朋友就選擇在這裡吃個簡單晚餐。※ 芥味仿鮑拌貢耳 ※ 木耳味道幾好有芥末及芝麻香配有少量青瓜絲，但仿鮑少到食唔出。※ 麻醬拌麵 ※ 放在麵頂的麻醬太稠，碗也太細，未能完全拌勻。※ 蒜茸時菜 ※ 炒得剛好但菜老了一點。※ 津白鮮肉淨水餃 ※ 沒有放湯的水餃本是要吃內裡豬肉的香及菜的鮮，可是咬下去感受不到肉汁的香味，津白不是清甜而是無味。完全不好吃！※ 頂級爆汁智利黑豚肉腸 ※ 雖知道這腸仔平時可在大型超市買回家煎，個我那刻很想吃就點了。腸仔當然好吃，皮脆肉嫩兼爆汁，但 HKD45 四條實在太少，還有點解用那麽小的碗子而不是碟子去盛載食物？※ 京都屈大腸 ※ 這是要久等的小食，等完食完會後悔的。京蔥太老有渣，腸完全唔脆，無味兼太薄，沒有咬口。況且腸不能把京蔥包實在裡面。份量也的確很少，加上用這小碗盛載完全與相片不同，有點過分。看見豐富的菜牌本來很開胃也想每樣都試，但食物的質素及分量令我大感失望！

晌呢頭買少少嘢，咁就去咗附近間華園餃子館食晚餐。時間尚早，坐低時只有我同朋友，之後就愈來愈多人。佢哋牆上貼滿菜式嘅照片，似係另類牆紙咁。麻辣豬肚絲，爽口辣味適中，底下仲有啲青瓜絲。拍青瓜就用咗蒜蓉等調味，爭咗啲酸味，味道較為單調。麻辣拌涼麵，佢哋晌涼麵灑上蒜蓉同蔥，配料比想像中單薄，麵條煮得彈牙，不過我明明揀咗中辣，食落卻一啲都唔辣，反而甜豉油嘅甜味更突出，綜合嚟講感覺一般。十三么淨水餃，呢個係佢哋嘅馳名之物。一碟十四隻，可以一次過食晒佢哋十三款水餃，其中一款就隨機重複。款式為津白鮮肉、韭菜鮮肉、白菜馬蹄鮮肉、金玉滿堂鮮肉、香芹鮮肉、番茄鮮肉、西洋菜鮮肉、番薯苗鮮肉、南瓜鮮肉、茴香鮮肉、韭黃鮮蝦鮮肉、京蔥羊肉同青素水餃。原本想逐一影相，咬開後發現其中幾款餡料嘅外觀分別唔大，所以隨意咁影吓就算。佢哋嘅餃子皮算薄，蔬菜同肉類比例大概係一半半，當中以津白鮮肉肉汁最豐富、白菜馬蹄鮮肉較清新、南瓜鮮肉甜甜哋、香芹鮮肉較爽口、韭菜鮮肉味濃、青素水餃內有木耳粟米胡蘿蔔等。而韭黃鮮蝦鮮肉蝦味唔突出、西洋菜鮮肉過於苦澀，其他嘅就印象唔深。感覺上某啲菜式味道算可以，某啲就一般般。

今晚我們去咗何文田勝利道嘅「華園餃子館」食晚飯！我們叫咗蠔豉鴨腎菜乾豬骨粥、家鄉上海炒麵、韭菜鮮肉水餃麵、黑椒牛根丸辛辣麵同馳名十三么淨水餃！蠔豉鴨腎菜乾豬骨粥一上碟嗰陣就見到放咗喺粥面上有小妹好喜愛嘅薄脆片，薄脆片好香脆，粥底煲得都幾綿，但所有材料都切得好細粒，無乜口感！家鄉上海炒麵同韭菜鮮肉水餃麵嘅麵質比較粗身同腍身，口感一啲都唔煙韌彈牙，炒麵嘅炒得唔係好乾身！黑椒牛根丸辛辣麵嘅麵質好爽口彈牙，黑椒牛根丸比平日食開嘅細粒，香辣嘅黑椒味，令到味道好惹味！馳名十三么淨水餃係由十三款唔同餡料嘅水餃組成，就咁睇表面唔係好分得出邊隻係咩味，所以小妹就將所有水餃切開晒一半，水餃皮都幾薄身，肉質都幾鮮味多汁！

經過幾次見都幾多人食，決定同媽媽試，點知都幾失望。津白豬肉水餃—不過不失，但北京餃子園一定好食過佢！香炸雞翼—加上椒鹽粉，幾香口但味道只係皮有，肉就好淡冇味酸辣雲吞—得3粒雲吞，細粒得來皮又厚...好彩個湯幾好味，先至加啲分上海炒麵—其實姐係上海粗炒，但呢個真係要劣評。因為麵明顯煮得太耐，過淋！而且成個炒麵都係無味，要知道上粗炒冇味其實味其實係好難，所以真係失望！而且所有菜式定價都唔平，我估我唔會再來了！

炒麵同伴麵 都好難食！！ 完全係垃圾！餃子soso 但係個皮有少少厚 同超市買既灣仔碼頭差唔多， 又唔平 兩細碗麵+ 韭菜豬肉煎餃，竟然114蚊。雖然係街坊、但絕對唔會再來！

勝利道有不同大小的食店，華園餃子館不單只食餃子，食物種類多不唔知食咩好。店內四圍貼滿食物相片，環境較迫。點了西洋菜鮮肉水餃$39，有10粒，水餃皮較厚身，肉的調味很好，肉餡多汁，肉多過菜。粟米鬚水$20，有啖啖的粟米味，沒有加糖，有新鮮的粟米粒及薏米，粟米粒不是罐頭，這是一杯很健康的飲品。

三年前黎食過佢地既餃子，水準唔錯！佢地雖然名為餃子店，但係有好多古靈精怪小食，今次故地重遊，又試下佢地餃子以外既食物…一如以往，舖頭食物相片太多，花多眼亂，唔知食咩好…點左﹕蠔豉鴨腎菜乾豬骨粥﹕好難食到好既菜乾粥啦，呢間小店估佢會做得好，蠔豉粥都係我喜好…上枱份量唔少，有簿脆片係上面，夠香口。粥底幾好，似係煲出黎，菜乾亦無沙，但係菜乾份量同菜乾味唔夠，蠔豉切得太細粒，成碗計都唔知有冇半粒蠔豉比你，鴨腎份量亦唔多，蠔豉鴨腎 D味基本上欠奉，豬骨都好少，反而碎骨好多，差D唔覺咬到隻牙，有少少失望。羊肉酥餅﹕一直諗住係麵皮包住D肉餡，原來唔係，真係太天真。係一餅煎香左既酥餅加D炒香左既羊肉粒係面，自已卷黎食。酥餅只有外層酥香，入面D油同麵粉已經融為一體，起唔到酥，當然係來貨唔係自己做架啦！好彩羊肉配左好多香蔥蒜等配料，好香口惹味，就係配料既香已經蓋過左羊肉味！整體黎講兩樣既都唔係好得，尤其個粥係極失望…而且佢地D少食唔平，個粥收35蚊，足料就40蚊都扺，佢地蠔豉鴨腎咁少，30蚊都比多佢！下次都係食番餃子穩陣！

正所謂，民以食為天；辛苦工作，只求兩餐溫飽。尤其是已經夜晚九點，出面又涷，我梗係想食碗水餃暖身。今晚我有雅興，想食埋蔥油餅，好，準備叫野！咦，場內八成爆，但點等都冇人幫我落order。好，再等一會我按捺不住了，我話「阿姐寫野！」她「好」了一聲，就很快地忘記了我。我等了一會，再叫「我想食野啊，寫野好唔好！」終於有人寫野！但惡夢才剛開始！為了一碗麵和一塊餅，你可以等到幾盡？我足足等左30分鐘！在這段悠長時間內，外賣嘅，已攞走左。堂食嘅，已開始食。仲要已經整左13么水餃三底！我碗麵得五隻，點解世界噤唔公平！好，我的熱麵終於在三十分鐘後抵達我面前。我趕緊狼吞虎嚥，但隨即發現，我的餃呢？我問「小姐，餃呢？」「你揭開啲麵就有㗎喇！」我將成碗麵夾起，再問「餃呢？」「噢，攞左碗淨麵俾你咩？」好！入正題！說實在, 他們的餃子真是很好吃的。我這次點的是韭菜餃和蔥油餅。先來的竟然是新鮮炸起的蔥油餅。這餅不油不膩,餅很香很脆。水餃亦大小適中。以勝利道來說, 30多元一碗麵很超值。可是, 我以後不會再來了。很失望的服務！如此失人心，真係唔知點講好了。

雖然佢係餃子店，但有好多選擇唔同小食同面類。有個鵝油拌麵，冇餸睇圖份量唔大但要成70蚊; 另一個豆乳撈丁都係冇餸但4x蚊，一於試個平少少先。份量真係好少…但散發住極香濃既腐乳味道! 面質彈牙加上腐乳又幾夾喎! 食完一個面係唔會飽…想再叫多個，哈哈! 不過既然佢係餃子店，當然要一試佢既餃子既。蕃茄餃子，餃皮唔厚，唔會一陣粉味; 而蕃茄就普通肉味唔突出…總括唔太特別，味道不過不失。

絕非餃子店咁簡單 - 華園餃子館店位於何文田，名為餃子館，食物選擇卻極多，非只餃子咁簡單。除餃子、鍋貼等外，亦有大量小食、醉雞醉腳筋，仲有不同方法煮的撈丁撈麵、煎酥餅，亦有燉魚湯等等等，我估種類有六七十種咁多，花多眼亂唔識揀。點了醉香豬腳筋，醃得入味，腳筋極有咬口爽脆，很好吃；豆腐乳甜酒撈丁麵，腐乳味濃鮮香，配上灼得岩岩好的丁麵，香滑，很新鮮的配搭呢；在場見人人點酸辣湯，一試下的確是名物，既鮮且辣亦夠酸，非坊間做到結遢遢的，豬肚、菇及筍絲下得多，夠辣岩哂我地，正！反觀韭菜煎餃菜下得不夠多，只普通。整體很滿意，多選擇美味好，係價錢比較貴份量亦偏少但小食多滋味下仍值得一試呢！FB專頁: smallsmallsmalllin

又黎勝利道搵朋友食lunch, 今次食水餃。門口貼滿Ｄ食物既圖片，都幾多選擇。本來對蕃茄蛋拌麵幾有興趣，後來見到十三么水餃，好吸引，有14粒唔同餡既水餃。都唔記得食左咩味，茴香鮮肉水餃好香，南瓜就偏甜。重有粟米，青素，蝦米等等，每食一粒都似考緊自己既味覺咁，好有趣。水餃皮偏厚，少少硬，但個人覺得唔錯，冇咁易穿，增添份煙韌 麻醬撈麵都唔錯，上海粗麵彈牙，麻醬好香 　份量就細左少少。可以再黎，重有好多野未試。