萬利小食店

營業中

休息中

住得喺大埔就一定知道萬利小食店。呢間小食店夜晚仲開住，係消夜嘅好地方。簡單一個車仔麵，都只係$20-＄30，配菜有魚蛋，豬紅，牛腩，蘿蔔，大腸等等。豬紅好滑，魚蛋都夠彈牙，而我最鍾意嘅就係蘿蔔，因為蘿蔔能夠索晒啲湯汁。唔想食湯麵嘅仲可以有腸粉，燒賣嘅選擇。小食店座位大約有六七張枱，落單方式以自助形式為主，自己同阿姐講想食啲咩，然後俾錢，佢就會送過黎。叫面嘅時候記得叫阿姐加辣汁，因為個辣汁真係好正，味道超級濃郁。

啱啱呢個月搬番大埔，都唔知附近仲有啲乜好食。個日係谷度問中學同學有乜平靚正好介紹，十個有八個都介紹呢間小食店俾我，今日收工就去食下宵夜先。小食店係自助形式，先選好野食就可以同姐姐講，記得腸粉同車仔麵係分開嗌架。腸粉好滑，都好彈牙我叫左紅腸釀豆卜河粉，舊豆卜係釀魚肉，小店應該仲有煎過，好香口，索埋啲多腩汁既湯好鬼好味。河粉係我鍾意食既口感，滑同厚身，唔好食落似漿，有口感，nice.男友叫左豬大腸，豬大腸滷得好入味而且無腥臭味最緊要係我收工佢都仲開緊工，呢個會係我最近經常食宵夜既好地方

做得大埔人就一定唔會唔識萬利。佢嘅車仔麵、腸粉、豬皮、燒賣，基本上就係陪住我大。最好就係佢收得夠夜！尋晚兩點鐘男朋友落去都仲可以買到嘢食，簡直係夜鬼福音呀！男朋友就買咗蘿蔔，豬大腸，魚蛋，牛柏葉，釀豆腐卜同埋豬皮，六個剩餸總共五十一蚊。蘿蔔冇渣，豬大腸入味。魚蛋係舊式嘅陳皮魚蛋，彈牙又有層次。豬皮，牛柏葉爽口，豆腐卜上邊魚肉雖然就冇乜魚味，不過都夠大件。男朋友住開九龍就話佢d車仔餸普通。咁當然大埔嘅選擇唔夠嗰邊多，佢嘅餸亦都唔係好有特色。不過食咗咁多年，就好似食返媽咪煮既餸咁，食嘅係以前感覺嚟嘅

最鍾意呢度嘅腩汁同埋辣醬，每次我叫都係食蘿蔔同埋豬紅配河粉，雙拼成為＄22，加＄5就有杯凍豆漿，不是太甜，不錯。記住一定要加呢度嘅辣醬，少少已經好辣。不過呢度唔可以坐得耐，食完佢都即刻幫你收走啲碗碟，不過有時空檔食個快速面都OK嘅。

以前住大埔.係萬利常客，不嬲都知有個肥姐態度較差，自從搬左去第度，食少左萬利，估唔到咁耐都唔食一次都瀨野……話說排隊買野食，已見舀餸個肥姐慢吞吞，唔緊要，咪等下囉！點知到我前面個男仔買，個男仔無要求，佢就勁大方舀成三次腩汁畀佢，到我買嗰陣，佢只係係咁意舀少少，叫佢舀多啲，佢就好晦氣話“舀左喇！”大佬，我食萬利就係為佢啲腩汁，你畀個清湯我，我駛鬼食你咩！連辣醬都1剩係畀得少少！次次叫佢地舀多啲腩汁好似乞佢咁！畀錢買氣受，以後都唔食！

一串牛丸，7蚊三粒，去到下午都算多人，大家都排隊買腸粉，所以有d慢，到我自己買牛丸就很快，係鍋入面拎起一串牛丸，然後問我辣唔辣，我話辣，跟住佢快遞點沙爹醬擺係盤度等我自己拎，然後佢繼續問下一位客人要d咩，動作算快，但買腸粉真係有d慢，前面兩個客，差d等到我無耐心牛丸有三粒，沙爹醬很濃，點得有d多，所以很鹹很辣，牛丸三粒都算大，一口咬落去很滿足，但應該有加過除牛肉以外既其他肉，彈性都算ok，因為有很多肉所以總體都算滿足，但下次我建議點少d醬或唔點醬，試下原味，先可以嚐到牛丸既真功夫

如果要食得舒服，又或者想同朋友傾下計嘅話，呢度一定唔會係選擇。地方小，逼逼貢，不過味道超超超好味！必食推介，陳皮魚旦，好香好實細細粒，辣醬更加係全店嘅靈魂，配埋湯底會令人久唔久就想返去食碗麵。佢嘅腸粉好滑又好彈牙，個腸粉醬料都係超好味。出面有啲腸粉，就係因為用咗唔掂嘅甜醬麻醬而完全失色！由落order到食完起身拜拜，15分鐘就醫飽個肚喇！

萬利小食價錢同出面小食店都差唔多，但吸引之處係多款牛柏葉牛丸車仔麵麵款式都多，而萬利對比其他小食黎講佢既魚蛋真係幾好味，萬利魚蛋賣點係入味，起碼食落唔會無味啦，唔係大粒但係叫做有咬口，人人口味唔同啦，我最怕食長洲個隻大魚蛋得個大粒但無味既，不過萬利坐落係唔舒服同感覺係但求要人食完快手快腳走，但真係小食黎講選擇多，好入味牙魚蛋，不過今時今日食三串小食食左$17（腸仔加魚蛋加燒賣）都真係唔夠飽牙。我諗要食飽埋單都要幾十蚊了。

今晚踢完波臨上巴士食碗車仔麵醫下五臟廟。鳳爪炆到無牙都食到， 豬皮爽脆魚蛋彈牙。 自家辣醬更是精髓。近年政府大力支持好多年輕人創業，硬件及資金都提供很多機會。創業難守業更難，此小食店能於大埔超過十年，車仔麵易學難精，門檻雖低但要製作出色的餸絕對要花功夫。更重要係，埋單講緊都唔駛四十蚊。全舖坐位不超過廿，但唔會以著名牛奶炒蛋既速度翻枱不特止，仲要有西餐廳的服務。這，大概就是守業的關鍵吧!

午餐時間，想食個車仔麵就走去好耐未去過既萬利先， 叫咗個公仔麵 加 通菜 豬紅 鳳爪同腸仔， 公仔麵煮得剛剛好唔會太淋， 豬紅煮得好入味， 腸仔就普普通通啦， 通菜好新鮮非常之爽口， 兩大隻鳳爪煮得非常之入味及好淋好容易就食到， 好耐冇嚟食，現在都好好食保持水準

下午三點三經過大埔好出名既萬利小食店， 買個腸粉食下午茶先，8蚊4條腸粉，還叫左鳳爪，比較貴既牛腩同雞翼尖，腸粉蒸得剛剛好，唔會太淋重好滑，撈埋牛腩汁一齊食非常，鳳爪有兩大隻(係全隻架，好多地方都係半隻半隻比)，煮得非常之淋好入味重有少少辣，感覺老闆好細心，煮之前都張每隻鳳爪鬆左骨，所以好容易就食到，牛腩一樣煮得好入味同好淋，最重要係唔痴牙

自小已經喜歡食車仔麵，更懷念站在街邊立食的日子，真是充滿了回憶。而事實上，似乎每區都有一間出色的車仔麵店，上水的成記、元朗的永年都是經常出現人龍的食店。至於大埔，自己慣常光顧的，就一定是萬利了。可能是中午飯後時間，絲毫不用等位。豬腸韮菜豬皮米豬腸炆得夠稔及入味，但油脂未去得清，豬皮未浸得透，雖然爽口，但實在無味，加點店方的辣醬，果然夠澎湃，一時大意，吃了一啖辣醬，即時眼水直標。

住係大埔，聽話萬利口碑唔錯，今日先有機會試下，雖然門口寫住自助形式，但我都係好迷茫😂好彩阿姐都幾有耐性，問我要d咩，加咩汁，要唔要芝麻。唔係很肚餓，於是僅叫左腸粉同牛腩腸粉有小小油，但係好大份😂腩汁好好味，我很鍾意喇牛腩：牛腩正！好入味，同埋好腍，雖然9蚊份量唔係咁多，但係我都可以接受，因為味道好好！下次有機會再去試試其它，又搵到一間可以成日都去既舖頭好開心！！

放工同個同事想食宵夜，就去巴士總站旁萬利食過車仔麵先，今日叫左碗公仔麵， 餸就叫左牛丸 豬紅 雞翼尖同鳳爪。公仔麵煮得剛剛好唔會太淋， 牛丸係用牛筋丸好有咬口， 豬紅同雞翼尖煮得好入味好滑， 兩大隻鳳爪用秘製小辣汁加上每隻都幫你鬆左d骨非常入味同好淋必食。同事就一定要秘製勁辣沙爹汁，佢話今日靚姐好好人俾左兩大羹佢， 見佢食到標晒汗非常興奮， 鍾意食辣既一定要離呢間到食。

下午差不多4點，帶囝囝睇完醫生，竟然彈出句未食午飯，攪乜鬼，原來想儲錢買智能電話，即時激到暈左一半，有時候小朋友既想法真係難以置信。即時拉去附近食碗麵。萬利在大埔多年，門口賣報紙雜誌，車仔麵一向味道不錯，自己都經常光顧。望望牆上水牌，點了油麵底，另加豬腸、菜心及豬皮，已經要$28，今時今日，食碗車仔麵的價錢頂得上一餐包飲品既套餐。油麵略嫌有鹼水味，但不嚴重，豬腸炆得夠腍及入味，要推薦，豬皮夠爽口，原因是未炆得夠時間。囝囝倒吃得開心，梗係，飯由老豆請，錢就自己袋，激死。