金滿園茶餐廳

營業中

休息中

平民飯堂！金滿園不嬲都有水準，叫個碟頭飯外賣自取都有9折，不過屋企長老生日（仲要淨係鐘意食中菜）。咁去金滿園實冇走雞！羊腩煲冬天唔會唔叫，但最絕嘅係椒鹽系列：椒鹽豆腐，椒鹽尤魚鬚，椒鹽九肚魚etc. 尤其係椒鹽豆腐，真係要現場食，勁正。

位於馬鞍山福安花園商場入面一間茶餐廳，長期都唔少人捧場，一於去試下有咩特別先入到去員工好友善，好有親切感，食客同餐廳員工好似老朋友對待，感覺唔錯見個個枱面碟碟都份量好夠，大大碟，大胃王一定好滿足嗌左個乾炒豬扒公仔麵，熱辣辣，鍋氣好夠，亦都唔係油浸個種，十分好食好推介乾炒豬扒公仔麵

金滿園重新裝修後雖然現在沒有晚市供應，但現推出早餐：早上0730～1115。$30起他們的早餐令我想中學時代金滿園初開業以低價早餐吸納客人雖然現在物價高漲但三十蚊起的早餐已經 好難再搵到咁平咁抵食咁好味今日我哋一家三口人均$37 食完早餐基本上 晏晝都可以唔使食因為實在太飽

呢排好多食肆都會早一啲關門，係啲新大型商場塭唔到食，唯有去啲舊式商場仔睇下，呢間小菜館係商場裏面，平時行開都唔太覺眼佢既存在。晚飯時間見佢爆哂場，啲人坐到出哂門口，所以就幫襯下，三個人本身唸住叫四人餐，因為有湯又有半隻雞真係好抵，不過最後叫左四個小菜，椒鹽九肚魚、西檸雞、鮮魷蒸肉餅、蠔仔煎蛋、鹹魚雞粒炒飯跟是日例湯。西檸雞 : 上枱時熱辣辣脆卜卜而且肉厚大件，重點係夠哂多汁食呢啲最怕就係唔夠汁，西檸汁味道唔太酸。👍🏻蠔仔煎蛋 : 蠔仔肥嘟嘟，最重要係冇落芫荽架 (唔鐘意芫荽味) 😍 啱哂我。椒鹽九肚魚 ($68) : 九肚魚外皮酥脆，魚肉軟軟嫩嫩，重點推介超級正。👍🏻鮮魷蒸肉餅 : 肉餅整得幾鬆化，不過嫌佢魷魚味唔夠濃郁，同埋唔係撈埋落肉餅裏面蒸，只係放喺肉餅上面，所以魷魚味唔係咁入到落啲肉餅度。鹹魚雞粒炒飯 ($39) : 本身唸住叫三個靚仔，但唸唸下每個靚仔都應該十蚊到，不如叫個炒粉麵仲抵食重跟埋例湯 ; 是日例湯係蓮藕章魚眉豆湯，好大碗之剩味道唔錯，成碗飲哂都無口渴既情況出現 ; 鹹魚雞粒炒飯雖然咸香味差少少，不過都夠獲氣同份量，好老實依家可以見到三字頭既炒粉麵重要跟湯真係好難得

係馬鞍山想食茶餐廳小菜既時候，就會諗起金滿園。位置係福安裡面，好多人都未必知，第一次都係朋友帶我食既。碟頭飯價錢仲有三十幾蚊連飲品，仲要有鑊氣大大碟抄得入味識食都寧願走遠少少去食

天氣凉咗，想食D暖胃嘢。本來最好係打邊爐食火鍋，但已經打咗幾日，好悶。今日轉為食羊腩煲。金满園係馬鞍山性價比最高的餐廳。我地直情叫佢做「飯堂」。一到星期六日或假期晚飯超多人。但太子爺記性超好，唔使派飛，全靠個腦記，但從未試過記錯。今日主角羊腩煲，大大煲，好多舊。舊舊都好入味好冧，好正。仲有生菜跟。都不過二百蚊多D。抵食！小朋唔多食羊腩，所以叫碟粟米肉片飯同碟京都豬排飯，大大碟又多餸，仲有大碗例湯。都不過三十來個，完勝大型連鎖快餐店。哩度開一壶茶只收1蚊，唔理幾多人飲，都係1蚊。

今晚一家人去完圖書館已經相當肚餓，諗住去試下阿仔成日要求食的金滿園，點知企滿人等位，阿仔又固執病發作死都唔肯去第二間食，唯有一直等，好彩頭先借左兩本書比兩隻小鬼邊睇邊等！其實呢間金滿園我地以前都成日幫襯外賣，但好似從來無堂食！有時返屋企經過都會見佢好似今日咁人山人海，如果我無個固執精係度嘈住哂，其實我唔會企係度等半小時！其他人為咩呢？我們一邊等當然一邊睇定食咩，一坐低就落單！呢間店係家庭式經營，太子臉上經常掛住親切的笑容，而且D人話佢好勁，排隊唔洗比號碼，佢完全記得你係第幾個！終於有得坐，坐位逼逼地，係店內近門口位置，但都坐得自在，店內不大，但都有幾張大枱，佢仲開到門外都擺枱添！不過你黎得呢度都唔係求環境啦！今次叫左個2人餐($138+17)，唔要湯加$17可以要多個小菜，白飯($7)係另叫的，個飯都大，裝到一座山咁！上菜速度都算快了，先黎左個菜心炒肉片，D菜好新鮮不過無切開比較大條，小朋友食就要幫下佢，肉片份量相對少d，夠鑊氣！另外粟米班塊多汁，魚塊都炸得好，同樣讚！咕嚕雞球味道都好！開胃食飯！唔知係因為太好味定因為太餓，食左3個白飯和3個小菜大家都未飽，於是叫多碟蕃茄牛肉飯。加單都

元旦日黎馬鞍山金滿園食晚飯，六點九黎到，已經坐滿人，外面亦企滿人等。呢度個大太子爺好犀利，你黎到同佢講幾位，佢就記得，從來吾派飛，吾寫低。😳最終等左九個字先入座。等左咁耐，已商量好叫咩食，一入去就落單。天氣咁凍，其實差不多每一枱都叫羊腩煲，中/大煲會跟菜。好似係$228，真係份量十足，應該超過廿舊大大舊羊腩。再加上腐乳，正! 食食下太子爺仲問要吾要多D腐乳，真係識做。另外叫左兩個碟頭飯仲送例湯。埋單$316，四個人都食吾晒要打包。抵食！

金滿園（馬鞍山）胡椒豬肚雞煲（$118）呢個胡椒豬肚雞煲好香好香，上到枱大家都流哂口水，個湯有好濃胡椒味，所以都幾辣，夠哂醒胃，豬肚份量都幾多，但雞就得幾件，唔係好夠食。不過跟雞煲就包一大碟生菜同豬潤，生菜吸收哂個湯既精華，好鬼正！呢間茶餐廳都係做街坊生意，價錢都幾抵，係劣食之都馬鞍山已經屹立多年，但每晚仍然有一大堆人要等位，可見佢有幾抵食，質素雖然唔係最好，但街坊食慣左就營造出濃厚既人情味！

係馬鞍山運動場打完波, 近近地就過黎整兩味~ 琵琶豆腐 - 外形好似炸鯪魚球, 好惹味, 芡汁又岩岩好! 檸檬蒸烏頭 - 魚肉唔新鮮, 有啲霉, 仲有啲腥 咖喱牛腩煲 - 咖喱汁好水, 成煲得好少牛腩, 又細舊, 相反薯仔就勁多勁大舊 芥蘭炒牛肉 - 芥蘭夠爽口, 牛肉夠林, 但無乜味

又是夜歸的一天, 不過今次就唔係響深圳返, 係中環返. 早一個站落巴士, 尋食地點就即時改為福安花園. 要係馬鞍山找一間local一點既食肆, 一定要離開兩個大商場. 最近, 發現福安花園呢一個福地. 一個好新界feel既舊式商場, 在外面, local人自己開既食肆林立. 先後試過了一輝, 鴻福, 同麵包城. 如同樓下既食友所說, 若不是local人, 真的沒有人想得到, 福安花園商場既內室, 仲有可愛的非連鎖, local 食肆.呢間茶餐廳, 晚飯時段供應小菜, 而且好似茶樓咁, 首先問你飲乜野茶. 之後, 給我的菜牌全是小菜套餐. 老闆仔看見我得一個人才另外俾一張碟頭飯, 炒粉麵既牌俾我.研究了一會, 終於決定了叫一個豉椒牛肉飯. 出來時, 發覺份量上, 未夠食. 再來多一客沙拉骨. 豉椒牛肉飯, 就是好簡單的, 一碟碟頭飯加上個豉椒牛肉汁. 味道雖有濃香的豉味, 但總覺得好hea, 茨汁多, 豉味過重, 淋得又不均勻. 不過作為一個普通既碟頭飯, 普通咁食. 其實是可取的. 其後, 是我加叫的沙拉骨, 平常食開, 是炸好的排骨, 再用沙律醬, 熱炒撈一撈. 說起來, 呢個沙拉骨

七個人去, 叫左六碟小菜, 另加白飯同湯, 啲嘢食ok架, 絶對差唔過酒樓, 但又平過酒樓好多~八珍豆腐煲 - 正, 首選呀, 啲豆腐好香好滑, 其他配菜又多咖喱牛腩煲 - 啲牛腩好入味, 又林, 好ok呀滑蛋蝦仁 - 啲蝦仁好大隻, 好味白切雞 - 正, 好有雞味菜心肉片 - ok啦, 不過不失西蘭花牛肉 - 啲牛肉 ... 好似少左啲囉

就係黎樓下食囉.剛看完 batman, 小丑雖然已死, 但他的演出超水準, 可惜, 可惜.看完咁鬼暴力既戲都仲有胃口食飯!六點正來到,未係太多人, 但過了一會, 未完亞視新聞已又爆棚.今天叫了肉片炒通菜及 枇杷豆腐.中湯係鳳爪豬肉南瓜, 清清地.枇杷豆腐略咸.ok la.肉片炒通菜叫不要太油, 又炒得好鬼清, 司傅功力可見一班.

同媽打完太極,好鬼餓,朋友波叔介紹下,幫襯金滿園.星期日下午六點. 已爆滿!!!! 六點!!!!有電視,看新聞, 爽~叫了四人餐, $158, 三送一湯再 送半隻白怇切雞.但湯不岩飲, 可以加十元, 轉做其他送;即變成$168四送再另送半隻切雞.四送叫了鎮江骨,蒸釀豆腐,粉絲什菜煲,及薑葱班腩煲叫了三碗飯, 五蚊碗即十五蚊.雞先上, 好熱, 滑, 蒸到岩岩好, 正.鎮江骨其實係豬扒, 冇所謂, 好香醋味, 流口水,正正.粉絲什菜煲一般, 好熱, 上檯仲滾, 兩分鐘後才滾完,超熱~南乳味,沒驚喜也沒任何問題.薑葱班腩煲略咸.蒸釀豆腐最後上, 豆腐滑, 全晚最好味!!!埋單183, 仲想點?唔怪得出面排晒隊.

又是另一間開在馬鞍山市中心區邊垂地方的食肆；而食肆開在商場很旮旯的位置，而且這裡九曲十三彎，不熟悉的街坊絕不過來，故亦是相熟的街坊才會過來幫襯。首次幫襯是獨自一人過來午膳，是一客烏頭的蒸魚套餐，食味不錯，加上老火湯水，就拍板跟街坊朋友過來一試。地方細小，適逢週未幫襯，好在早半小時已經進佔店內，否則在之後未夠七時已經全店滿座。亦是小炒為主，而主打是鎮店的鹽焗雞當然都是指定菜式，雜菜煲、紅燒班腩及通菜牛肉。美其名是鹽焗雞，實則上是鹽水雞，半只的份量稱足，雞味及鹹度足夠，不愧為頭牌之作，雜菜煲、紅燒班腩及通菜牛肉都是一般水準，可說小炒鑊氣不夠，從炒製出來獻汁頗多又不算燙咀了無關系。青紅蘿蔔例湯仍是一貫的滋味，算是可取。價錢這裡真的經濟非常，可能跟店舖開在居屋商場還要是旮旯的位置，租金成本較平有關；招呼不能說窩心，但有姐都是有叫即應，盡力幫忙。可能檯子數目小，出菜時間夠快，假期光顧一張餐檯可多做幾轉，似乎這點跟這區的其他食肆不同，故幫襯這餐晚飯時間比平常快得多，這點亦算是值得光顧之處，亦是這類店的生存之道。後記：馬鞍山市中心區尤以主體商場的中式食肆菜式味道其實很多都跟這裡差不多，中規中矩，但價