陽光餐廳

營業中

休息中

今晚食完一肚氣。餐牌見到係全日快餐$47，凍飲加$3。點知落單後，見到阿姐張相手寫單無每銀碼係$47，覺得奇怪問阿姐。阿姐話：臨近年尾唔會印過啲餐牌其實9點後會加價到$53，叫飲品仲要另外加$6，阿姐仲大大聲話，牆上啲餐牌有寫住，係喎，原來細細粒字寫咗喺旁邊。$59我俾得起，但咁樣俾人坑，真係一肚氣。再睇openrice其他食評，原來已經唔係第一次。奉勸大家去食嘅話，千萬要睇清楚張單，因為真係好陰濕，不過最好都係唔好去食啦

叫咗幾次呢個茄子斑腩飯，茄子同斑腩嘅份量都唔少，而飯量都充足，味道正常，絕對足夠醫肚快靚正，同埋佢嘅汁都夠多，撈埋埋啲飯一齊食，雖然有啲肥但真係好正，如果夜晚又諗唔到食咩又唔想煩快靚正嘅話不妨可以叫吓呢間嘅外賣

我原本唔想打呢篇食評嘅我好驚佢紅左之後， 我以後要排長龍先食到不過呢間茶記的性價比之高， 令我忍唔住都要出個post 讚下佢！味道好！價錢實惠！海鮮生猛！無嘢可以再講！睇食物相啦😆環境就唔影啦！ 真係好舊的茶記咁樣囉～ 😂

最近都想搵比較懷舊既茶餐廳，我工作關係成日四圍去，正好可以周圍搵野食啦～ 食美食幾時都咁開心架😋😋 其實我都經過左幾次先幫襯架，因為起初外表門面無乜特別，但每次經過都見幾多人食野，我諗應該味道唔差既，我都習慣性上網睇評分，呢間餐廳唔高唔低咁啦～我認為都可以一試，而且發言開24小時，興趣大d啦～ 我成日都24小時日夜交替咁🤣🤣搵多間食宵夜既選擇，今日食左佢個早餐3個餸46蚊+2蚊熱飲，雞翼唔錯，牛就麻麻，太陽蛋正常😆😆，茶走😋好飲，湯底睇到都知無乜番茄味，有姜味，4x幾蚊黎講有點失望

叫咗五樣嘢食1）走地雞2）灼蝦 大隻既3）黑椒牛仔粒4）蝦仁炒蛋5）炸蠔餅最抵讚，就係蝦仁炒蛋炒到個蛋好香好有獲氣 撈飯真係好好食啲蝦有膏都大隻配埋個豉油係靈魂雖然小貴 但都值得一食☺️加埋個湯係蓮藕煲章魚湯 唔係咁多餐廳飲到🥹

之前響影片分享網站見到韓國名人白鍾元老師來港介紹見佢食得津津有味,就即刻想試9點黎到,但都仲全場滿席 可見水準應該唔會差 ,令人期待入到去環境就普通舊式茶記,都幾迫下叫左招牌走地雞 ,  蠔餅 , 白灼蝦 同 黑椒牛仔粒 白灼蝦叫左斤半,隻隻都好大隻  好多膏  之後黎左招牌走地雞, 有雞味....但唔滑 都算好味既黑椒牛仔粒 有少少炒蜆風味 有少少鑊氣味 都唔錯最後蠔餅 依個就真係一般般 蠔好水 蛋無味 總結:可能食依D小菜環境 氣氛重要過食物質數; 見到白老師食得咁開心 ? 食完後令我懷疑係未有旅行加乘餐廳整體味道唔差,最值得一提既係野飲無一樣好飲 位置亦都僻僻地 所以經過一試無妨 專登去就見仁見智啦~

聽過呢間餐廳好多次，係一啲叔叔平時晏晝嘅飯堂，今年中秋忽發奇想嚟呢度食，估唔到平民餐廳都有海鮮，都有魚圖係食咗一半先醒起要影，所以啲餸嘅份量有啲少，原本係大啲啲佢啲餸全部都幾好食，當然同大酒樓冇得比，但佢價錢非常親民，七個餸加埋都只係$500左右，絕對係親民之選。但要挑剔嘅係，佢進食環境真係一般，始終係平民餐廳，坐得比較迫，全程要攬住個袋食。仲有，唔好以為係平民餐廳就任坐唔嬲，呢間餐廳嘅光顧率真係好高，食飽其實都係會俾人催交枱，厲害嘅係，呢間餐廳二十四小時營業，見佢食完一round又一round，喺土瓜灣小街嚟講，絕對係好好生意，亦都證明係一間好食，性價比高嘅餐廳。

每一台都有酒精搓手液，員工仍然有帶口罩，地方企理乾淨，唔會癡粒粒，老闆會同客人傾偈，對自己出品有信心出左名就自然加價，原本冇乜期望，但係原來真係隱世茶餐廳，仲好食過西貢海鮮店分量充足，夠晒新鮮足斤大蝦蝦，夠新鮮，夠大隻 ，夠足量炸蠔好味絕對有驚喜，分量充足，一口接一口真係好味烏頭蒸得啱啱好，夠大條新鮮蟹，老闆即時打電話去買有兩隻量，夠哂野味招牌走地雞半隻幾好味但係比較細隻冇乜肉食可能下次叫一隻會比較多肉

本身諗進近近地食個茶記做下午茶一入到去就早到2個阿姐 坐威系到到叫左好耐都冇人理我🥲🤤😪😪最後終於落左單，又等左15分鐘🫠好拉開始食 哇？啲飯咸到呢 成杯凍檸茶都五夠飲 但份量就好多好夠食，不過真系冇下次

幫襯了這間店舖多年，出品穩定，今次點選了1）豆豉雞（雞件比較重雪藏味）2）回鍋肉（味道比較一般，太一點兒過鹹）3）腰果肉丁（味道不錯）但不要期望太高，純粹街坊茶餐廳點一般選擇，不過每次都必須要留意，店舖知經營手法，每次買單包括堂食外賣，收費同餐牌的總收費，通常都會有出入，可能係無心之失，但係經過多次幫襯，覺得提醒大家必須要留意店舖的經營手法。歸納經驗1）每次收多錢與加一無關，因為茶餐廳沒有加一服務要求2）與外賣盒無關，因為每次都已經計好數目，計算好外賣盒3）通常答案都係話食菜貴咗，餐牌改唔切等理由4）每次都要鬥志鬥力，身心疲累5）就算係男性老闆或者女性收銀員，結果都係一樣，所以奉勸大家小心D , 對自己冇壞

這間餐廳在一條很偏僻的街道，十分之不起眼，而且隔離有車房在附近，平時真的沒有什麼特別事，也不會特別途經這裏。今日經過見到，就試一下吧。內裏的裝修格局也十分之暗，低調。不過人少，位置十分之多的選擇。我們一行兩個人選擇了一個卡位，坐得都幾舒服。早餐選擇不多都係有三個選擇，於是就見到一個叫雞絲蘑菇的早餐，因為平時好少見到有雞絲的選擇，於是就揀黎試吓啦。上菜速度都真係好快，但係一嚟到，個樣貌就唔太吸引，因為顏色十分之簡單不夠鮮艷。雞絲係用雞皮帶有雞皮的有點肥嘅雞肉，味道就正常，冇乜味道。我初初以為佢係會用雞胸肉嗰隻雞絲，冇諗過係用肥嘅雞肉，所以覺得早餐來講會有少少太過肥膩。多士煎蛋，多士係脆嘅，但係係凍嘅，我唔知道佢點樣做到脆而凍，應該係新鮮整出嚟，但係佢一啲都唔熱，非常之特別！呢間嘢嘅整體環境味道都係中規中矩。但價錢好抵食。

好少黎呢頭食早餐，今日近近地黎陽光試下佢d早餐先。陽光真係好多選擇，我記得上次黎食下午茶，牆上的選擇多到我睇左好耐，揀又揀左好耐😅今次早餐就寫哂係幾張餐牌度，都係有好多選擇，而且係不同款式嘅。呢度d客仔主要係車行工作嘅人同街坊，有咁多唔同嘅選擇都會黎食多幾次😝今日揀左蘑菇雞絲通心粉配火腿熟蛋多士，飲奶茶。好多蘑菇，好多雞絲，好多通心粉😝真係夠哂飽，奶茶可以多返少少奶，今朝已經係大滿足，飽哂😎

陽光此餐廳地點在士瓜灣，為食🐽經常都去，主打晚上食海鮮，種類繁多，煮法最好是蒸，出來的味道比較優勝。淡水魚，有好幾拾種，最愛食三刀，金古笋殻，細倫，如果食泥猛魚，就有兩大大條。海蝦，多數食開邊蒸，排放整齊，蝦鮮味濃厚。鮑魚，果皮蒸最正，大大隻，又甜又滑，又有鮑魚香。蟹，最愛食羔蟹，但唔係時時有，喜歡以豉油皇炒，要少咸。蟹羔味衝天，蟹肉鮮嫩。鮮魷，多數椒鹽炸，脆卜卜，味道可口，這是另一種野味嘅煮法，跟平常食開的不一樣。其他小菜跟一般茶餐廳相同！不過，價錢平！包飲品及飯。

呢日下午茶時間因為工作需要嚟到土瓜灣譚公道。見肚餓就走咗入去呢間陽光餐廳諗住食啲嘢。餐廳裝修一般茶記格局，環境清潔度亦只屬一般，地下、餐牌等亦都唔算乾淨。不過見入邊都有幾多茶客，心諗嘢食應該唔錯所以都系決定繼續喺度食。下午茶餐都有幾多選擇。點咗一份干燒伊麵，配一杯熱鴛鴦，一共$32。干燒伊麵，上好顏色都唔錯。入邊有少少冬菇絲、芽菜及韮王做配料，不過味道亦只屬一般。熱鴛鴦顏色唔錯，奶茶同咖啡嘅比例，亦都幾好，都夠味，屬於正常貨色。

呢度一到7點後就開始排隊，因為可能係全港最平的小炒餐廳，2人套餐，3個送加白加例湯餐飲都係128，平均一碟小菜唔駛40！3人套餐都係178左右，仲有好多款揀，波蘿咕嚕肉，蒸肉餅，咩都有！真係平到你唔信！仲要係夠鑊氣，好味！特別推介海鮮，蒸魚炒蟹比得上西貢，亦比市價至少平3成，但一樣咁好食！好新鮮！冬天會有羊腩煲同醉雞煲，200蚊樓下大大煲，可以打埋邊爐，亦可考慮一試！環境就係平民街坊啲，但算係乾淨企理，仲有電視睇。