魂燒 (已易手) 新餐廳

太子不嬲多野食，今日就去左朋友介紹既魂燒居食屋。經得朋友介紹，食物質素應該唔差掛。今日就試試佢係咪真材實料先。呢間居食屋，雖然鋪面唔算大，可以選擇露天或者鋪入面進食。咁我地唔食煙既，就緊係選擇喺鋪入面食喇，貪佢有冷氣丫嘛。鋪內都有唔少小擺設，有日本風味。亦有幾支日本吟嚷。叫左兩串串燒，翠玉瓜同秋葵。其實燒得唔錯，岩岩夠火喉，不過我就唔太好燒菜。主菜黎喇，呢個王牌原版海膽蛋黃飯，係必食推介。雖然邪惡，但佢蛋黃漿堅係有蛋香而唔油膩，日本蛋果然係唔同啲。海膽唔使講，一個字，新鮮好味! 冇後悔叫呢個飯。根住叫埋呢個邪惡2号鵝肝極上牛小排飯，點解鵝肝可以咁入口即溶既，點解牛肉可以咁軟熟唔韌既, 成碗飯油香出晒黎，真係肥幾磅都濟。丫，提提你地，牛肉份量幾多下，抵食。叫左一隻大虎蝦，唔使講都知大。加左少少辣粉燒，好惹味呀～最黎連殼都損埋。蝦頭有膏但唔多而蝦肉夠實，係新鮮既。最後當然要叫埋甜品喇，平時唔多食既南瓜雪糕。估唔到食落口感非常豐富，好似食緊南瓜蓉，又好似雪榚咁。最緊要唔太甜，仲好大個，都值得一推架。估唔到我呢位朋友介紹又唔錯喎，既抵食，又好味，位置又方便。番卓幾會大增呀

今日黎到太子食好西, 之前聽講過呢間店食蟹黃飯好出名, 於是一於去試下先, 呀唷………好唔開心呀, 今日無得食呀, 要去到7月先有呀, 嗚嗚嗚…… 哈哈, 橫掂都黎左為有食下第二個啦, 我叫左個秘製海膽飯$118,這個也是限量的, 嘩嘩嘩………..唔比三個嘩都唔得呀, 哈哈. 竟然成板海膽放係我面前, OMG!! 首先我將日本蛋黃&飯攪拌後, 再將飯&海膽, 加少許WASABI放左紫菜上卷埋, 一啖咬落去, WAO正呀, 海膽夠哂鮮, 連自己都唔記得左本來黎係諗住食蟹黃飯, 哈哈^^ 下次再黎食過先. 之後我仲叫左燒三文魚腩$38, 呢個都好正, 入口即溶之外, 仲外脆內軟, 好香口, 唔會鯹.

好耐無食過燒野食啦，見幾日本屋酒屋feel，決定一試。地方雖小，但裝飾引人矚目，野食都多選擇。秘製海膽飯 $118日本雞蛋真係好好食，芥末味道新鮮，連埋海膽食一流。極上牛小排鵝肝飯 $148本身想叫蟹黃飯，但甘岩無貨，轉左牛小排。成板海膽本身已覺邪惡，呢個簡直邪惡度滿分。鵝肝煎得夠香，完全無so味👍🏻。牛肉脂肪分佈均勻，加d七味粉會更好食，只係油左小小，但真係幾正。燒特大虎蝦 $68辣得過引，蝦頭好食，肉夠彈牙。啖啖肉🤤燒秋葵 燒翠肉瓜 $18平時食燒野好驚會燒得過濃，但燒得剛好，食左甘多邪惡野，食返d蔬果類都幾好。南瓜雪糕 $58呢個幾驚喜，口感似食緊南瓜蓉，食極都仲有，份量比想像中多。雪得夠凍，即使食哂雪糕，南瓜殼仍然冒出雪煙。飽飽離場，希望下次黎會有蟹蓋飯食。哈哈～

今日同朋友來到太子食鰻魚飯，呢間係朋友話上次食過好食，今次叫我來試吓。一坐低就見到面前有點菜紙，內有好多串燒，和牛，海鮮等多種小食。另外仲有套餐都係128幾低食。我最後選左自家製汁醬鰻魚飯，我本身都喜愛食鰻魚，覺得佢談談肉又無魚骨。呢碗鰻魚飯嘅鰻魚的確是厚身肉實，鰻魚被燒汁溶化，食落更滋味。加上甜粟米作伴令食慾增加不少。如果有另上燒汁就更加完美，因唔夠攪飯吃。另外朋友叫左海膽飯，海膽是一板的都有好多，顏色鮮豔新鮮，入口溶化，好似食蟹糕味道。呢個飯有甜醬汁，不喜歡吃白飯的話可加些醬汁攪飯，或一些海膽加些飯一起吃，都好滋味。另外付加了幾片紫菜，如果你喜愛食手卷飯，都可以自己制的。飲品方面有各種氣水和支裝飲品。唯獨一種是店長推出巨峰提子乳酪。我就試呢款飲品。味道確實巨峰提子味道，果味十足，清甜解喝。

今日行經太子，發現有間日式拉麵館，裝修到好似日本街頭拉麵檔一樣。都幾有日本感覺。呢間店鋪名都改得非常日本化，叫魂燒。食物方便都好有水準。直得一去再去嘅地方。我今次和朋友就選左鰻魚飯和秘製海膽飯，再加三隻燒生蠔。先講吓呢碗鰻魚飯：半條肥味鰻魚加上秘製醬汁，令鰻魚更野味，鰻魚無骨淡淡肉。珍珠米飯配上鰻魚汁再加上鮮甜粟米，配合得相當好吃。另外個秘製海膽飯：海膽新鮮，入口溶化。珍珠米飯香軟加上一隻生雞蛋，我將生雞蛋攪勻再與海膽一起吃，又有另一番滋味。我地仲食左非常味美燒生蠔，有芝士，燒汁，蒜蓉。呢三隻生蠔特別大隻，每隻都好有蠔味，配上不同制法有不同效果，好似燒汁燒生蠔，醬汁味濃令生蠔味更上一層。香蒜味令生蠔更特出，芝士味濃郁。呢三隻生蠔令我一試難忘。我仲試左杯巨峰提子乳酸，看落似一杯雪碧，但飲落去有巨峰提子味道，甜甜地好飲。

之前見到好多雜誌都來報導, 但都未有時間來, 今日終於黎到啦, YEAH!! 事隔咁耐依然係咁多人, 都仲要等位TIM, 証明品質仲KEEP到. 呢到裝修都幾特別架, 好似係由3間舖而成的, 相信係越做越大, 2間分別係廚房同外賣部, 1間係坐位, 仲有2層TIM, 好日本FEEL, 咁啱仲要有幾個日本人係到食野, 哈哈…..不過坐上面要小心少少, 哈哈…..雖然店子小小, 但坐落去都幾舒服, 我叫左個極上牛小排鵝肝飯$148, 嘩….一上枱大大碗成座山咁, 鵝肝有2大舊, 大廚將鵝肝煎得很香, 外脆內軟, 入口即溶, WAO….正呀, 而牛小排亦用自家制醬汁炒香, 正…..送飯一流, 所以我成碗食哂, 哈哈……..我仲叫左一串西京汁燒安格斯一口牛$32, 都幾大粒下架, 好有口感, 一D都唔硬, 一咬落去滿口牛肉汁, 正!!

今日陪個friend去太子買嘢，出左地鐵站之後見到呢間餐廳，裝修好特別！好似古代嘅草屋，感覺好吸引，見有啲肚餓就入去試一試！我哋叫咗一個秘制海膽飯（$118)，海膽份量十足，而且好新鮮，食落好鮮甜，配上撈左日本蛋黃嘅飯真係完美嘅選擇，海膽迷必食另外叫咗一個頂級安格斯牛扒飯（$120)，牛扒係用佢哋嘅秘製醬汁烹調，肉質鮮嫩，而且份量十足！呢間小店無論係裝潢定係食物準備，也明顯花咗唔少心思，相當有誠意，值得推介！

對吃貨來說，最痛苦莫過於“有得睇冇得食”。 早排朋友來魂燒食海膽飯，send咗張相俾我.......心思思咗一排，今晚終於有機會 拉埋朋友一齊來朝聖喇!今日天氣超熱， 好彩一入到去就有淡淡嘅涼風。相信大家都試過，明明室外好熱但入到商場就超凍，咁樣好易感冒。 呢部冷氣唔會開得好大，涼涼地咁樣比較舒服。-秘製海膽飯海膽鮮甜，完全唔會腥， 仲要成板咁上，非常豪爽。將蛋黃同飯撈勻令個飯都好滑溜，118蚊絕對物超所值，必食!-頂級安格斯牛扒飯 牛扒肉質鮮嫩，整得啱啱好，唔會太韌。秘製醬汁亦帶出左牛肉鮮甜，值得一試!-極上牛小排鵝肝拉麵雖然麵質同正统拉麵店有距離， 但平時嘅拉麵店就冇咁特別嘅配料可以揀。158蚊一碗麵，竟然有三片鵝肝， 有咁高質素嘅配料，湯底又鮮甜， 可以一試。-鹿兒島a4和牛拉麵和牛拉面質素亦唔錯， 食得出同普通肥牛唔一樣，呢個真係試咗先知!-燒芝士蠔燒生蠔方面，可以揀芝士、蒜香或者汁燒。 我哋揀咗重口味嘅芝士。蠔嘅鮮味中和咗芝士嘅鹹味， 雖然大約30蚊一隻唔算好平，但係物有所值。可惜嘅係今次食唔到限量嘅蟹黃飯，唯有等下次再嚟碰下運氣。

偶爾都會係openrice 搜尋下隱世食店，睇左魂燒嘅食物相之後一直念念不忘，今日終於約到朋友去試。店鋪面積不大，的確有點擠迫，但勝在有冷氣供應。極上牛小排鵝肝拉麵$158拉麵成日食，但鵝肝拉麵真係第一次試。鵝肝煎香左，油脂香醇，口感柔潤，真係極品！鵝肝嘅油香仲滲到湯底之中，令人齒頰留香。鹿兒島A4和牛拉麵$98拉麵質素當然不能跟其他專售拉麵的拉麵店同日而語，但也是用心之作，整體不過不失。頂級安格斯牛扒飯$120和牛十分出色，調味恰到好處，挺惹味的，被朋友食晒咁濟！秘製海膽飯$118是夜的精髓所在，萬眾期待的海膽飯！成板咁上，非常豪氣！蛋黃拌飯，再撈埋海膽一齊食，綿密黏稠嘅口感一流呀！燒生蠔（芝士）$92肥美鮮甜，雖然價格不低，但物有所值。下次經過太子，可以一試。

一早聽聞魂燒海膽飯的大名，收完工當然要同朋友去食餐好啦～環境方面，都尚算舒適，尤其在炎熱的夏天中有陣陣冷氣嘆，都算唔錯！我地叫左一個秘製海膽飯（$118），果然是這裏主打，海膽鮮甜，在舌尖化開的口感，配上蛋黃與飯，真是色香味俱全！係超級邪惡的選擇呢～另外，我們吃了「頂級安格斯牛扒飯」（$120），都是令人一試難忘的呢！牛肉肉質鮮嫩，咬開有一陣juicy的肉汁流出，真係肥瘦適中，超級推介呀～試完飯，當然要食拉面啦～湯底清甜，單是肉類的份量物超所所值！「極上牛小排鵝肝拉麵」（$158），以這個價錢，吃到鵝肝，簡直是抵到爛啦！加上湯底有鵝肝的味道，非常不錯呀！「鹿兒島A4和牛拉麵」（$98）都是不錯的選擇～ 牛肉鮮嫩，配上鮮甜的湯底一流！小食方面，我們吃了一個芝士燒生蠔（$92），芝士味道濃郁，與蠔鹹鹹的口感十分相配！食完之後都覺得唔夠喉，想一點再點呢！總括而言，食物質素十分不錯！但很可惜這次試不了蟹黃飯，因為它是限量的，希望下次有機會吃到呢！

行過見到舖頭貼滿咗佢哋嘅招牌食物 一心諗住試下蟹黃飯 點知店員話已經售罄了唔緊要啦 仲有大把嘢好嘢食 今次食唔到唯有下次元祖豚肉拉麵$62用心制作食品主打自家制豬骨湯底飲下個湯先 奶白色嘅湯底 非常濃郁嘅豬骨香味 湯底用咗豬骨餚15小時以上 唔怪得知咁好味啦叉燒切得非常薄 肉質偏肥 但食落完全冇油利嘅感覺 入口即溶串燒同燒物都好有水準 燒一口和牛$35燒雞腎(三串)$38燒三文魚腩$38一口和牛 肉質豐富 燒得唔乾雞腎非常爽口 配合海鹽 另有一番風味三文魚腩外皮香脆魚油豐富 多肉少骨 店舖收兩點 只接受現金

自問我是海膽狂迷 對海膽嘅著迷 真係冇辦法抵擋秘製海膽飯(限售)$118日本蛋黃、多種食法、邪惡選擇原板海膽 夠曬豪氣 又不失霸氣海膽顏色金黃 充滿光澤 非常新鮮 鮮甜吉穿隻蛋黃 蛋汁滲透在每粒飯上 蛋味香濃 食指大動海膽嘅甘香鮮甜 配上juicy嘅蛋漿 加啲wasabi 同日本豉油 呢個組合簡直天衣無縫其實旁邊仲有幾塊紫菜 亦可包住食 又有別一番風味美味嘅食物當然要留到最後慢慢歎 一匙羹嘅海膽 放入口入面 開心到暈 感覺太幸福了店舖門面有啲似日本居酒屋 但呢間係居食屋 冇酒飲㗎有露天或室內坐位 座位雖少 但有種舒適溫馨嘅感覺餐廳食物選擇多 下次約埋三五知己試埋其他先

落雨濕濕又冇帶遮，時間尚早又未食飯，就黎左呢間魂燒到食飯順便避雨入到去，有冷氣涼浸浸，爽呀 本身想食串燒，但見到有海膽飯就食佢啦!嗌左杯日本巨峰提子乳酸: 有淡淡既提子味同乳酸味，再加soda。呢杯野唔太甜，好解渴原板海膽飯: 上到檯已經覺得海膽好多，試左小小，海膽好鮮甜，冇苦澀味。將紫菜包白飯加wasabi同海膽，食落紫菜chok chok聲，加上wasabi掉下味，一口氣食左六舊，半碗飯。剩底既白飯加蛋加豉油，用左日本雞旦，旦味好濃，就算唔食海膽就咁食蛋飯都好好食。最尾食埋海膽，完尾既終結個人覺得$118有咁多種味覺享受真係好抵，下次試埋個蟹黃飯

要係旺角搵野食一d都唔難，每條街都有好多餐廳，今日原本要去始創買護膚品，途經聞到好香既燒烤味，搞到我個肚咕嚕咕嚕......店內唔大，只放了一張長方形bar 枱，不過原來樓上仲有位的，門口亦擺放2張4人枱，不過完全無冷氣的，炎熱既夏天底下有點難受燒鰻魚（半條）$68我覺得可以再落多d鰻魚汁黎燒會更好味，而且呢條鰻魚既幼骨比較多，有小許失望車厘茄 $18呢幾粒車厘茄超大粒，又好清甜燒翠肉瓜 $18我第一次見咁大片既翠肉瓜，之前食親都係垂直切，呢間係打斜切的，所以比較大片而且好juicy海鹽五花腩串 $19雖然見到肥肉既比例幾大，但完全唔會好油膩，而且肉質好爽，又易咬燒虎蝦 $25燒得好入味不過有d細隻, 所以下次我一定要叫特大虎蝦先得

見到Facebook之前人哋介紹嘅蟹膏飯，想試好耐，今日終於去咗試啦，鋪頭好細，店內未有位所以我哋坐咗響出邊、30幾度無冷氣有啲辛苦有啲熱。叫咗一個蟹膏飯，一個和牛飯，燒牛舌心，蒜蓉燒扇貝。燒牛舌心比較硬同超薄冇乜口感有啲失望主角蟹膏飯冇想像中鮮甜中規中矩冇特別驚喜蒜蓉燒扇貝非常失望，粒肉得五毫子咁大！完全冇鮮味可以唔使叫。和牛飯唔記得影相，牛比較少只得薄薄幾片、打邊爐牛肉咁厚、味道係好食既、鬆軟又香唔錯。比較失望、未必會再嚟