M8 Cafe&Pub

營業中

休息中

小小的入口行過差點睇唔到，酒吧有 lunch 食？最緊要有冒險精神，衝呀！別有洞天在閣樓，地方寬闊空曠，雖然瀰漫著酒吧的氣味。意想不到有硬鏢又有電腦鏢掟喎，不過一收工就速逃紅磡區，都唔係留係附近玩架囉。餐牌寫住意大利麵，大陸咩！捍衛廣東話、繁體字，係意大利粉。午餐都係西式快餐類，雞牛豬、飯意粉薯菜啦。第一次幫襯 lunch 同時又係最後一次，之後都唔再做 lunch 喇，黃昏 6 點先開門，緣起緣滅聚散無常！羅宋湯，濃郁茄膏味道，酸甜味強烈而不辣，自己加辣椒仔汁，刺激可口多了。巴西雞扒伴炸帶子配蒜蓉汁跟薯菜，炸薯條乾爭爭得個殼，滾上大量茄汁求其食晒去。即食炸帶子，橙色的麵包糠都幾可怕，硬掘掘刮嘴的外層，裡面雪白無味帶子肉，似魚肉多過帶子，真係茄汁侍候啦！雞扒雪藏味濃烈，同事吃不消，就等我食埋去啦！靠晒您喇，辣椒仔！肉質都非常滑溜多汁，係有少少腥腥地啫。芝士黑椒焗牛脷意粉，都唔覺有焗過，失望。全熟彈彈意粉無過腍過粉，掛上甜甜微辣黑椒汁，熱燙燙一氣呵成啜晒倒肚，好滿足啊！份量偏細呢，食 3 啖無晒。牛脷烹調得出色喎，不鞋無脷胎，非常軟棉，不嗅不羶，好食！

酒吧內有小食真的不足為其，最驚喜既係有我至愛既蒜泥白肉食，而且麻辣味好香又不會太辣，老闆話還可以加辣呢～還有好多蒜泥，正正正！還有另一推介，香濃芝士焗薯角，薯角重薯仔味，芝士好香濃，啱晒愛芝士一族！

門口只從窄窄的小樓梯上，樓梯轉三小圈才到，下午茶，焗豬排飯，即叫即焗，上檯時，還見碟邊不斷起小泡，熱力十足，今天溫度急降幾度，但吃完還有些少流汗，表面微微焦黑的茄醬，味道不太酸，有幾片紅蘿蔔，豬排比較薄身，份量不多，只有兩小塊，飯經過少炒，頗乾身，奶茶味道不太濃，尚可，無論如何，廿八元，此貨色，底呀！ 唯不好的是，有客人在隔離檯吸煙。