Samso Korean Restaurant

營業中

休息中

痴線未試過有間餐廳會走嚟問我仲有幾耐食完走門口有人等位應該繁忙時段，但自問食嘢算快，個陣計埋上菜時間半個鐘多少少就無啦啦走過嚟咁樣問我，服務態度真係好差真心有問題

店𥚃面明明有枱，只係放餐具，但都要一個人嘅客人讓出枱俾三位嘅客人，點解你唔執枱，反而要我起身讓枱？三位嘅係客，一位嘅唔係客咩😡如果店舖滿座我無話可說，明明就有兩張吉枱，唔想做生意你執左佢丫麻後尾梗係起身走人啦，附近咁多韓國餐廳根本唔需要受你氣，到我食完再行過舖頭，根本就已經再無新客，入面得3個人，即刻根本就唔存在人客太多無位嘅情況，根本就係餐廳懶，唔想執咁多枱，又或者睇唔起你一個人黎幫襯，總之就無下次

服務態度差1。 明明有位，但堅持唔執枱要人係門口等15分鐘。等左15分鐘見張枱執好左5分鐘都唔叫入座就再行入去啦，又趕返我出黎！我行到門口1分鐘唔駛又叫返我入去！！好似玩人咁。。。係咪想扮到有人流排隊製造假象？？2。 全店有2枱已經完成餐飯，但就淨係叫兩人枱嘅客人走，係真係直接乜都唔問直接遞張單過黎講句385就走左去。1男1女兩個侍應都係咁樣，兩人食飯對佢地黎講就係唔駛尊重咁！啲野幾好食都無用啦，服務咁垃圾，又話經濟差！

之前行過一、兩次覺得間餐廳好似有啲簡陋，所以冇入到去。一個月前再經過，終於俾個機會自己試吓，點知一食就變咗佢嘅常客，一個星期總會心思思去一兩次食晏。無論係石鍋拌飯、泡菜湯定牛骨湯都好好味。正如其他食評所寫，餐廳應該係由韓國一家人開嘅自家店，所以係口味非常地道嘅韓國菜。韓國大叔同阿仔（我估）嘅招呼很親切。今日試咗佢嘅大白菜豬骨湯，我個人覺得仲好味過喺首爾聖水洞嗰間排晒隊嘅人氣餐廳！只要唔嫌環境太過小店，非常值得大家試吓！我都會搵個機會同朋友嚟食晚飯，試吓佢哋嘅烤肉。

今日小朋友想食韓國料理，誤打誤撞嚟到呢間韓國小店，因為怕熱氣，所以無點到燒肉，於是點咗水冷麵同埋牛肋湯，竟然冷麵超彈牙，帶少少酸味，特別開胃，天氣熱一流！牛肋湯非常惹味，連小朋友都極之喜歡，牛肉煙韌得嚟唔會韌，帶少少好微微既辣，真係非常好味！下次一定要試下燒肉，眼見枱枱都點，而且店員會幫手燒，非常貼心的服務👍🏻

由韓國人主理既尖沙咀韓國菜小店！一入到去幾檯客都係韓國人，聽住佢地講野，成件事好似去左韓國咁😂一去到仲有小菜食住先大蔥五花肉 五花肉好粉嫩，食落滑嫩🤤包埋生菜泡菜，滿足我依隻食肉獸😂仲有專人燒肉，由擺爐到燒肉都好企理乾淨，好正❗️人蔘雞湯淡淡人蔘味，唔會重味到令人抗拒😆見到成隻雞係入面好足料，好滑～同埋入面有少少米！好似食粥咁😎泡菜煎餅 好好味！推薦依個好香口好脆唔油，泡菜唔會太辣，趁熱食個下好味到我地叫多個海鮮煎餅😚海鮮煎餅 滿滿既魷魚同韭菜，同樣煎得乾脆，但本豬偏好泡茶煎餅既味道韓式粉絲 入面有牛牛，仲有彈牙既粉絲😌配埋雜菜，炒得幾香

見到個個都俾好評，所以專登去試下，但係又覺得唔係咁好食今次食午餐，叫咗一個烤牛肉同埋一個牛肋骨湯烤牛肉係醃好咗嘅，其實個牛本身已經有好多油，點知佢係快烤板上面又放咗好多油，搞到成件事超級油，而且間舖頭其實冇抽風系統，雖然只有我哋一台喺度燒肉，但係已經成間舖頭都好重油煙，唔敢想像如果抬台都叫燒肉嘅話,舖頭入面會有幾咁煙霧瀰漫牛肉嘅味道係傳統帶甜味嘅醬汁，不過牛肉有啲筋肉質唔算特別好，質素只係一般，唔推薦另外個牛肋骨湯畀我感覺唔係好正宗，因為佢加咗蛋花，而且只有好重嘅胡椒味，而牛肉嚟講唔係牛肋骨，係普通牛腩我唔推薦

今日去咗Samso韓國餐廳，食咗燒豬腩肉，豆腐麵，牛雜湯，餐廳樓面同廚師都係韓國人，全部菜式充滿正宗韓國風味，正到爆值得一提嘅係職員雖然係韓國人，但會流利廣東話，幫忙烤肉及指導我地點樣食啲菜式先最好味，讚！最後忍唔住，再打包咗兩隻醬油蟹同屋企人分享，屋企人都讚不絕口

似真係由韓國一家人開 依家講起香港正宗韓國嘢我首先會諗起呢到 亦有想回頭幫襯🥹餐廳開咗半年有多 無論ig定OpenRice嘅食評都唔多睇嚟小店真係冇揾過人賣廣告😂自己實測完表示推薦🤍𝗦𝗮𝗺𝘀𝗼 𝗦𝗲𝘁($𝟱𝟮𝟬) | 𝗥𝗮𝘁𝗶𝗻𝗴: 𝟴/𝟭𝟬呢到夠曬兩個人食 所以人均$260 唔收加一！套餐已經包括五花肉 大蔥五花肉 泡菜豆腐湯 炒飯 大蔥沙律 燒酒任添嘅生菜 蒜頭 大蔥絲 小碟店員會幫你燒好啲五花肉 再用剩低嘅油炒菜炒飯五花肉未到十分驚艷 但質素算唔錯好鍾意個大蔥沙律! 喺香港好似比較少見夾埋落肉同蒜到 包生菜一齊食係超 級 香🙌🏻湯同炒飯都唔係wow一聲嘅水平 但就係好温馨好小店嘅味道整體係抵食 店員so nice 有飛咗去韓國嘅feel🥹/小店仲有賣好多家常韓國料理小炒 醬油蟹嗰啲都有 有機會會再翻去試下

無意中係ig 碌到啲廣告，見到個燒豬腩肉忍唔住要黎試下，餐廳當時有一台韓國大叔食緊飯，大大聲講哂韓文即刻變到好似去左韓國咁。叫左個餐，有2份腩肉，泡菜湯，大葱沙律，炒飯加支燒酒都係$520好抵食阿豬媽幫我地燒好腩肉，仲將啲小菜一齊翻熱，生菜+腩肉+熱泡菜+大蔥沙律超好味，係真係韓國味道，係香港真係無乜餐廳會咁整。食到7788就會開返火用豬油再加啲小菜炒飯，大佬呀香到顛呀，仲戒咩澱粉質呀食啦😂😂而且佢哋仲要唔使加一嫁，小菜仲要任食呀痴線，要幫襯多啲

雖然這家舖頭咪好多人寫食評，相對神秘，但係見到係正宗韓國人開，所以吸引我哋一試記得要用WhatsApp book位，我哋係選擇星期六7:30嘅時間，好多人Walk in都失望而回，因為每台食嘅時間都比較耐，而且舖頭比較細， 冇book位應該好難食到我哋點咗套餐，乜都有啲三個女仔，夾埋大概八百幾蚊左右首先會包好多韓國前菜，大大碟，點完餐有人幫手燒肉同炒飯，我覺得幾有風味，比較好食係豬腩肉同埋牛肉。食得好飽，雖然我比較鍾意食日式燒肉覺得啲質量好啲，但係今次有啲我對韓國燒肉改觀左

餐廳位於香港尖沙咀的韓國街，是一個以韓國美食為主的小區域。這裡有很多韓國餐廳，有好多出色的韓國餐廳林立。今次試了這家以韓國薯仔排骨湯為主的餐廳🥔🍲1.韓國海鮮煎餅 韓國水海鮮煎餅，將麵粉、蛋加入海鮮和蔬菜，再用平底鍋加熱，倒入混合物，煎至兩面金黃色。韓國海鮮煎餅口感酥脆，裡面鮮甜多汁，每口都係香蔥口感，配上特製的辣椒醬或醋醬，更加美味。2. 韓國薯仔排骨湯湯汁濃郁香甜，排骨肉質鮮嫩多汁，薯仔和蔬菜則能帶來豐富的口感和營養價值。食到最後加了一個公仔麵，吸收湯，超好食

Lunch time食過一次人蔘雞湯同埋排骨湯都非常之好食Lunch set連埋飯同埋伴餐都只係$70-80韓國街嘅餐廳大部份都係得泡菜煎餅 餃子年糕湯嗰啲 HK比較少韓國餐廳有咁多款傳統韓國湯飯選擇個人來講本身唔係太鍾意香港嘅韓國嘢 因為覺得低成本 而且味道普通（例如部隊鍋）但係呢間傳統韓國家庭餐廳令我改觀！我覺得佢所有湯都係比足真材實料 好用心去煮啲飯都係珍珠米而且伴餐小菜俾得非常大方 好好食 泡菜食得出係自己醃 好有誠意而且貌似係韓國家庭經營 小店好值得支持最近念念不忘 再去試咗佢個set dinner老實講dinner價錢比較進取 但係比起其他韓國街嘅韓國餐廳 都係差唔多Bbq燒肉 阿豬媽會喺你身邊幫你燒 加埋大䓤蒜片生菜咁食 set仲包埋燒酒 真係好有韓國嘅感覺最後仲有泡菜湯 同埋燒完五花肉嘅油再加泡菜炒嘅飯 真係卡路里炸彈 但係真係令平時唔係食好多飯嘅我 忍唔住一食再食我地仲會想試佢餐牌其他嘢㗎～社交媒體網站冇咩foodie介紹 可能因為小店冇咩值得打卡 都冇咩好特別嘅賣點唔係打手 我都係第一次打食評 因為我真心希望佢做得住 已經推介左比幾個朋友了回頭率100%

喺尖東搵個地方食late lunch，無意中經過呢一間小店，俾menu個人參雞吸引咗決定入嚟試試。下午三點得兩台客，食食吓有一班呀豬媽入咗黎，即刻變得好地道。午餐一人前都仲有四碟配菜，人蔘雞足料，整體味道不錯。順帶一提，收銀韓妹說得一口流利廣東話，厲害👍🏼

Lunch time 時間諗住食下韓國菜，見到附近開左間新嘅韓國餐廳。OpenRice 冇食評， 連menu 都未upload。間店細細間，唔係好大，應該唔係連鎖店，但門口個韓國媽媽好親切，咁就入左去食，支持下小店。簡左白菜排骨湯$80 尖沙咀雖然有好多韓國餐廳，但比較少有排骨湯。出餐好快，有四碟前菜，個餐跟白飯，好豐富！同韓國食到嘅排骨湯一樣咁好食😋而且，尼間係唔使加一架！！！ 係尖沙咀食韓國菜，唔使加一嘅餐廳已經好少啦，送咁多小菜，真係好抵食啊！ 臨走嘅時候，同店員講快啲upload返menu上OpenRice! 俾多啲人食到！