SUKIYA すき家

營業中

休息中

佢有青魚早餐,都幾抵食,同埋之前屋企人響樂富食過,我試咗一啖味道唔錯呢！所以今日特登陪家人嚟食過早餐。今次叫咗牛肉青魚餐,開頭先用味噌湯加飯嚟食，試下牛肉（ 比吉野家還要肥） 最後試青魚。竟然我件青魚好鹹，跟住我家人再試我嗰件青魚，同佢件味道有出入。。。。。 唔知點解我嗰件咁喊。另外呢個係牛肉青魚早餐，上漏咗牛肉，通知職員就好快畀返我哋。 可能新開冇耐， 偶然有錯誤呢個可以理解，但係青魚一件偏鹹就有啲古怪，期待有進步空間會再嚟嘗試。補充一句，餐具油冧冧， 希望可以提供熱水浸一浸

今日行過青衣城見到Sukiya冇咩人排隊，就排隊入去食。當時係早上10:15，叫完餐都正正常常，點知再望下四邊漏發覺出事。所有人都坐低咗，都點左餐但係就冇嘢食，係成間餐廳啲人都等緊餐。職員係有3、4個既但好似廚房冇嘢出。再過多10分鐘啲人開始鼓譟，有d人甚至喺度鬧。再過多一陣，開始有餐出，但奇怪比我遲入嚟嘅人都有餐，其他客又開始鼓譟。我再俾啲耐性睇多陣，睇吓會唔會有餐出俾我，我再等多10分鐘都係冇，俾我遲入嚟嘅客食完下一批人客都有餐出，其實當中我已經吹過啲職員幾次但係都冇用，啲職員都走來走去好似好辛苦，但係無餐出又唔跟order次序出餐就點都係有問題，係人手唔夠定係廚房唔夠人我就唔知。最後等咗差唔多35分鐘我頂唔順我就取消咗單就走。其實真係唔夠人或暫廚房有嘢壞應該cut 人龍，因為我走嘅時候仲有好多人喺度排隊，我唔敢想像佢哋要等幾耐先可以有餐出到俾佢地。成件事冇人同我解釋發生咩事，早餐來來去去都係嗰幾款，我嗌果樣早餐要特別精心調製，或者要長啲時間準備我唔信囉，所以我會好長時間唔會再幫襯佢，成個體驗好差。

星期日4位食早餐，要排半個鐘，齊人先可以入座。日式早餐味道ok, 人多，但服務都ok, 叫職員會好快有回應。出餐係慢啲，出左一個餐，等左好耐先出其他餐（變左第一個餐凍晒）味道正常，唔會太有驚喜，但以價錢來講，性價比算高👍👍

門口個店員又話食物齊了，已經等左35分鐘先有得攞，但我回到家先發現少左個蜆肉味噌湯，想打落分店，但張收據同openrice 都無舖頭電話，點算好???🤦🏻‍♀️🤦🏻‍♀️

作為窮人恩物，好開心終於青衣城開咗間牛丼，由公布開業到真係開業差唔多過咗半年時間，終於尋日開咗。平時日日都好夜收工，所以可以買嘅食物選擇其實好少，今日收工即刻趕過嚟買牛丼，9:33到，估唔到外賣已經截咗單，間嘢係10點閂門，堂食9:30截單我覺得合理，但係外賣都咁早截單實在不合理，而且當時店內仲有好多人喺度食緊飯，店員亦都幫緊其他人執外賣，除咗我之外門口有好幾個客人都係因為截咗單，所以冇得叫外賣失望而回，實在可惜。雖然門口嘅店員非常有禮貌，但係9:30後其實仲係人來人往，好多人落地鐵經過想買外賣，咁快閂門實在有啲不近人情，希望可以調整外賣截單時間。

Sukiya 終於開到嚟青衣，今日首天營業，決定去踩場。香蔥溫泉蛋牛丼［L］（$48）香蔥清爽配上微辣醬；溫泉蛋係日本產，原隻上枱自己打落碗，流心有蛋味但唔算濃；牛肉係美國牛，肉質尚算軟，有少少咬口但唔韌，肥瘦適中，牛味一般，但牛汁夠味；飯底係日本產100%越光米，粒粒分明。溫泉蛋燒肉丼［L］（$47）燒肉牛同樣係美國牛，以燒肉醬汁烹煮（不要誤會，並不是明火燒肉），微甜帶咸，更適合撈飯。PS：開幕當日起，凡選購主餐（堂食或外賣），將獲贈限量開幕紀念環保購物袋一個。