老馮茶居 (海寶花園)

【大埔區】【老馮茶居】過到嚟大埔，呢區一向都人傑地靈，食肆多得嚟質素都可以。因此適逢過開嚟呢邊睇醫生，就去埋食嘢。呢排我食嘅嘢都係冇乜得揀，攪到我揀起嘢食上嚟都好似有功能障礙咁，不過我好在自動篩走大集團，好好多喇。而茶餐廳我嗰排又唔係話好想食之下，見到呢間食點心嘅好似有位，就貢咗入去。調咗個卡位嚟坐先發現隔離枱條友有陣怪味，費事煩唯有坐過啲。出嚟飲茶就梗係揀飲咩茶先，我就好簡單，老奉實係飲壽眉架喇，唔使煩。叫咗幾樣點心，首先係 $18 嘅「金牌炸芋角」，好少地方食到喇而家，佢都整得唔錯。之後 $28 嘅「老馮流沙芋泥包」寫到好似招牌菜咁又點？啲流沙都唔流出嚟嘅，把鬼咩。食落又唔係話好好食，又唔流沙，實冇下次。之後 $30 嘅「鮑汁柚皮鴨腳扎」，有柚皮嘅我都係第一次食，效果唔差。見到 $33 嘅「老馮小籠包」上面啲錫紙兜就嬲，好彩冇穿皮。然而，唔知點解係不設茶錢同加一架喎，就咁四個點心收我 $109，吖又嬲佢唔落喎咁。。。（地址：大埔安慈路 1 號海寶花園 14 號地舖）#1amfoodie #foodie #hkfoodie #thatfoodiething #hkfood #food