皇室甜品 (眾安街)

營業中

休息中

【荃灣區】【皇室甜品】又係一間食咗好多次嘅餐廳，自從喺美國返嚟之後我係跑少咗好多十八區餐廳。又或者咁講，我係根本冇跑，一味慢活人生，感受退休生活，日日除咗宅喺屋企就係返工。所以，呢啲真係好「倉底」嘅體驗都要被我搬出嚟用。不過又咁講，間嘢都唔差嘅，而且附近選擇又唔多，我抽兩次嘅用餐體驗出嚟講吓啦。第一次想講嘅係我自己去食嘅，首先係 $56 嘅「原盅椰皇燉蛋白雙丸」，所謂雙丸即係芝麻湯丸同埋芋圓，有得揀凍或者熱，我揀凍。佢味道唔差啦，正正常常，價錢亦都合理，冇咩好挑剔亦都冇咩特別要抽出嚟講。反而之後買咗杯 $10 嘅「椰皇水」清清哋幾好飲，女性唔係處於經期嘅話不妨試吓。我食嗰時埋單係 $66，據我所知好似加過價，大家留意。點解我會知佢加咗價因為我之後都有再 keep 住去嘛，咁跟住想講一次同朋友去食嘅，佢叫咗個 $40 嘅「有丸相聚」，有芋丸、香芋雪糕、小丸子、仙草凍，佢都冇乜感覺，四草嘢，一分錢一分貨，正正常常我覺得就可以啦。我自己諗唔到食乜，叫咗個都係 $40 嘅「香蕉船配三球雪糕」，雪糕可以揀三隻味，我揀咗香芋、曲奇同埋綠茶。味道唔差啦，香蕉船呢啲相對穩陣嘅甜品，一般都唔會有咩大甩漏