牛摩 (屯門時代廣場南翼)

營業中

休息中

見天氣凍，就決定同朋友去牛摩擦打吓邊爐。餐廳環境都頗大，卡位為主。裝修編日本風，仲有一個位係比啲人掛繪馬， 好得意。今次就揀咗佢個Level 1牛肌腹個餐。湯底我就揀咗壽喜燒，而朋友就揀咗昆布鰹魚清湯。壽喜燒湯底仲配搭一隻蛋俾你沾蛋汁食肉，唔錯。我哋嗌最平嗰個肉餐，啲牛肉質素都幾好，脂肪同肉嘅比例都平衡，而質地亦都唔會好嚡口。而雞肉就好出色，一啲都唔會有陣雪味，仲要件件雞件都好嫩滑好好食。呢個餐仲包咗出去自取多種火鍋配料，同平時一樣都會有唔同嘅丸仲有蔬果。今次好想讚吓佢嘅蔬果，尤其芋頭、南瓜、蕃茄同粟米，全部都好甜，加埋壽喜燒湯汁，真係好好食。最特別係呢間會有一啲壽司選擇，當中仲有三文魚壽司，質素都唔錯。而佢嘅甜品都幾抵讚，有藍莓芝士蛋糕、朱古力/吉士泡芙，吉士/朱古力糯米糍，全部都唔係頹整，食得出係有心機整，口感同味道都好好。另外亦都有一個位俾你整雪糕加配料，雪糕有朱古力味同低脂牛奶味，兩隻款都偏向沙冰質感，清爽得來唔會有負擔，好啱打完邊爐食。成餐都食得好飽好滿足，如果一個人嚟打邊爐，牛摩係一個好選擇，因為可以一人一鍋同多配料同甜品選擇。