夏雪 (已結業)

聽朋友話呢間野幾好食, 所以同男朋友試下!一上到去, 當時無咩人, 帶位果個就帶我地2個坐一張4人台, 先點左2客壽司, 1個蟹子沙律同1個蜆肉麵豉湯, 個蟹子沙律一d都唔凍, 麵豉湯d蜆肉有沙既! 每次一食完就即刻過黎執野, 最過份就係連碗湯都未飲完, 仲有一大半, 佢都夠膽死走過黎問收得未, 我當然答佢未得, 都未飲完! 跟住再點多個豬扒鍋, 食到一半時, 由於開始多人黎食飯, 可能有幾班3-4人既客人, 其中一個侍應就走埋黎問我介唔介意轉台, 但, 當時我個鍋已經食到一半, 有咩理由叫我呢個時候轉台家?? 我亦都答佢我介意, 結果佢就再向我隔離台果2個人埋手, 因為佢地d送岩岩黎, 佢地就轉左台, 跟住有2班4個人既客人上黎, 當我食完個豬扒鍋時, 呢頭食完, 果頭就已經有侍應走埋黎話幫一幫我地執野先, 勁想趕客走咁, 喂, 有無問下我仲有無野叫先?? 本身我仲諗住叫野食, 根本都未飽, 就算我食完哂, 都唔係即刻做埋呢d動作黎趕客走呀? 唔通坐多陣都唔得呀? 結果, 就即刻發火叫佢埋單, 個侍應就唔敢出聲, 連張單都只係敢比我男朋友埋! 我覺得唔識安排客人坐位既就去學下喇!