黃記煌三汁燜鍋 (已結業)

今日打風留咗係屋企全日，所以 bae suggest 夜晚出街去尖沙咀黃記煌。打風都唔少人，一睇就知有個靚仔哥哥好細心咁介紹個 menu 比我地聽。燜鍋有海鮮，牛肉，豬肉，連牛蛙都有，食完燜鍋仲可以打邊爐! 我地呢啲貪心嘅小朋友就梗係自選啦，揀咗牛小排，魚塊，廣島蠔，白蝦。我地仲叫咗兩個前菜，夫妻肺片同冰鎮秋葵。夫妻肺片好惹味不過鐘意食辣嘅我會想再辣少少，可 request 加辣！冰鎮秋葵好驚喜，未見過餐廳會比啲咁大條嘅秋葵，仲要一啲渣都無！靚仔哥哥拎咗個好得意嘅紅色六寶盒嚟，每一格都放咗燜鍋嘅配菜。跟住佢就好細心咁遂層放啲配菜，仲鋪得好靚添，再加埋個用薯粉整嘅秘製醬汁，燜咗差唔多十五分鐘，就已經好香噴噴啦啲牛小排好冧，好好食!! 魚，蝦同埋蠔都好新鮮，個醬汁咁濃都可以食到啲海鮮嘅鮮味，真係好驚喜食完燜鍋，我地就加湯打邊爐，叫咗我最愛嘅響鈴，聖子同埋好新奇嘅鵝肝墨魚丸。聖子好大隻好新鮮，鵝肝墨魚丸好彈牙我都估唔到我地兩個人可以食晒咁多野，可能因為有靚仔哥哥幫我哋鋪鍋，成件事好賞心悅目，胃口都好埋！ 下次一定要帶啲 sis 嚟！