東京築地拉麵 (已結業)

呢間分店位於雅蘭中心地庫，喺旺角站E1出口大約步行五分鐘就到，所以都好方便。店舖唔算好大，但座位都非常舒適。首先就試咗前菜帶子群邊同胡麻冷菠菜，帶子群邊非常爽口，作為前菜好合適。而我就非常中意胡麻冷菠菜，濃濃嘅胡麻醬淋喺冷菠菜上面，食每一啖菠菜嘅時侯都會食到好濃嘅芝麻香味。菠菜同胡麻醬都配合得好好，係一道非常開胃嘅前菜。之後我地再試左濃厚雞白湯拉麵同埋魚介沾麵。雞白湯拉麵嘅湯底非常濃郁，飲落去會飲到鮮雞嘅香甜。拉麵嘅軟硬度適中，唔會太稔又唔會太硬。而雞叉燒同豚肉叉燒都好嫰滑，整體黎講都好好食。魚介沾麵非常特別，麵質好彈牙，而醬汁係用豚骨同乾魚熬成，所以真係好濃郁。麵上面塊炙燒黑豚肉油脂分布均勻，食落去絕對唔會太油淋淋。小食方面，我地試左燒雞肉免治串，口感好特別，食落去會食到少少雞軟骨，而醬汁亦同串燒好夾。最後飲左日式柚子冰，柚子冰好足料，會飲到啖啖柚子肉，但又唔會太甜，夏天飲會feel到好清涼，亦同食物非常之夾。