華輝餐廳 (已結業)

黎食下午茶因為見佢既蘋果批同雞批超多推介。但因為行完山肚餓，雞批蘋果批又無下午茶餐，所以先叫下午茶餐打算食完找數先去買雞批外賣。朋友叫左牛柳絲炒河（$38），我叫焗海鮮飯（$38）。牛柳絲炒河實在一般茶餐廳水準以下，奉勸大家別試 ；焗海鮮飯味道雖然一般，但算抵食多餸夠飽肚。食到中途，見隔離枱既雞翼薯條（$38）賣相相當唔錯又多薯條，唔怪得價錢同炒粉麺一樣，寫低記住或者下次有機會可以試試。朋友食完炒河就叫蘋果批，點知已經賣曬，只剩迷你雞批，大個切開既雞批都賣曬，所以靚姐主動叫我地想要雞批就咪等埋單要叫定，無幾耐重自動幫我地攞埋黎，強調否則遲少少就賣曬。到我地 5點零出去埋單，靚姐所言非虛果然所有批都已經賣曬。夜晚 9點幾肚裡個焗海鮮飯雖然未落隔，但悶悶地心思思都忍唔住要叮熱個雞批，叮唔使一分鐘已經香噴噴。。。咬一啖果然皮薄餡靚，批皮鬆化牛油香，裡面充滿有雞味既雞肉，$14 完全值回票價，大埔名物名不虛傳 雖然牛河勁伏，但雞批同靚姐親切既服務完全可以扳回分數，所以個笑分同味道 4星主要俾靚姐同雞批既，好似牛河呢d唔開心既野呢個時勢要儘量抹左佢。