椰林閣餐廳 (已結業)

好耐冇黎過椰林閣食，今日同朋友行街經過，就黎食下下午茶，下午茶時段比午餐價錢真係平好多，而且下午茶餐嘅選擇都幾多。黎到剛剛好係兩點開始下午茶，人客比較多，冇哂卡位坐，而且要同其他人搭檯，不過都明白，繁忙時段都冇辦法。坐低之後就問侍應攞下午茶嘅餐牌睇，有茶點、炒粉麵飯、焗類、湯麵類、意粉同飯類，都好多種類選擇。最後我叫左迷你野菌芝士焗長通粉，朋友叫左黑椒汁牛仔柳意粉，套餐連熱飲，我地都飲熱檸檬茶。朋友嘅意粉都上得幾快，黑椒牛仔柳睇落都唔錯，仲有d紅蘿蔔配菜，朋友話味道可以，不過可能係下午茶餐，所以份量真係唔多。至於我嘅迷你野菌芝士焗長通粉，份量真係幾迷你，而且碟邊嘅通粉焗到乾左，不過味道都唔錯，芝士味幾濃幾香。總括來講，餐廳嘅食物價錢都可以接受。