栢檔去骨海南雞飯 (已結業)

前一日找不到這間飲食雜誌推介的海南雞飯店，第二日心思思再來這區踩場，做定功課之後，終於找到。其實這裡的地方係比較淺窄的，座位坐得不太舒服，好似呢日咁，就要搭枱先有得坐，張枱又唔係咁大張，好彩呢度的海南雞飯餐可以彌補呢方面嘅不足啫。因為係星期日，所以無午餐供應，唯有兩公婆一人一個海南雞飯餐啦。喜歡呢度嘅例湯，呢日嘅款式係「南瓜紅蘿蔔粟米豬骨湯」，材料都幾足，最好係佢真正係無落味精，但有真正由南瓜和粟米等材料帶出來的甜味，好飲！至於主菜嘅「去骨海南雞飯」，油飯有些不知名的配料落落去，煮得很軟熟呢！D雞就夠晒嫰滑，即使係雞胸都唔會嚡，分量方面大概有九至十件左右，甚為足夠。醬汁方面呢，呢度嘅醬汁都幾正宗，有齊甜豉油、薑蔥同辣醬。呢度的牆有一個特色，就係有好多來吃過飯的明星藝人的題字和簽名，好似毛舜筠、吳鎮宇、姜大衛、黃貫中等等，其實仲有好多、好多，不能盡錄。除左呢樣之外，我覺得仲有一個幾得意嘅特色，就係呢度d海南雞飯係會話埋俾客人聽佢會有幾多件雞（9-10件）同埋乜嘢位（例如雞髀、雞胸、雞翼等），等人客可以一目了然。咁又幾貨真價實，童叟無欺喎，唔錯唔錯！