景逸軒 (已結業)

喺皇室堡嘅酒樓都唔少，同朋友晚飯，隨便揀間，於是乎就嚟咗景逸軒。可能係平日嘅關係，晚飯時間都唔係好多人。呢度嘅裝修相信係作婚宴之用，所以環境舒適；而且場地寬尚，晚飯hea吓都唔錯。小菜價錢約$100，但選擇唔算多。不過兩個人食，冇所謂啦！素鵝腐皮卷腐皮卷咗好幾層，都算脆，餡料豐富，有紅蘿蔔、西芹及木耳絲等素菜，頗有咬口。點少許醋味道較佳。燒腩仔微暖，肉雖淋，但冇嘜層次感同肉味；皮唔夠脆，亦唔夠香味。可能之前喺龍皇食過好有水準嘅燒腩仔，所以真係有啲比下去。粟米班塊呢道菜唔錯，班塊有薄薄嘅炸粉，少許脆得嚟又感受到班塊嘅肉質。粟米汁粉量啱啱好，每件班塊都可以沾到汁，送飯一流。整體嚟講都算ok，不過酒樓嘅小菜始終欠缺鑊氣；但環境舒適，兩者互相balance吓。值得一提係呢度作普通晚飯還可，作為婚宴場地則有待改善，事關洗手間同新娘房感覺麻麻，同區有好多同級酒樓比呢度更好。