新潮樓 (已結業)

呢日去九展睇show, 順便食埋晚飯。太耐冇食過潮州嘢，見到呢間主打食潮州嘢嘅餐廳，即刻入去試吓先。餐牌有單點，亦有四人至八人餐，我哋人少少，單點咗以下幾款菜式。竹苼北菇燉菜膽（$48）- 燉湯味道清甜，有竹笙，北菇同菜，清清地，幾好飲呀。下次如果人多啲，可以試吓胡椒豬肚湯。蠔仔肉碎粥（$108）- 份量算多，蠔仔同肉碎都勁足料，配埋蝦乾，味道好豐富，唔錯。薑蔥霸王雞半隻（$138）- 勁多薑蔥，好入味，雞肉肉質嫩滑肥美，味道幾好。粉絲雜菜煲（98）- 粉絲雜菜煲整得好味香口，入面有白菜，菜心，小棠菜，西蘭花，菇菌同粉絲，健康又好味。餐廳環境闊落好坐，啱晒一大班人食飯傾偈。食物質素唔錯，價錢合理。