風味館海鮮私房菜 (已結業)

去九龍城做節 因為就返老人家 九龍城比較方便 大家都想食雞煲小炒 所以選擇了這一家新開的小店 正正在爺爺屋企樓下。門口外面放有很多游水海鮮 還看到有新張優惠雞煲 竟然$38蚊！！唔洗諗 先點了雞煲 因為實在太優惠。雞煲大大窩 感覺有點似豉椒炒雞件 惹味香口 BB辣 但好特別既係有新鮮胡椒一齊煮 咬落口卜一聲 胡椒的辣慢慢浸出來 好刺激！雞件啖啖肉 雖然冇平時雞煲淥淥下咁過癮 但性價比實在高。試下招牌菜 古早醬油黑义燒 一個字 正！义燒係女生剋星～肥义。但確實肥得黎唔油膩 肥膏滑 肉質嫩。而且非常入味 香濃醬油味 送飯之選！避風塘茄子～睇佢顏色以為燶左 食落應該係炸醬撈左老抽。茄子特別之處是釀左鯪魚肉 幾有心思。炸蒜辣椒夠曬香口。金銀蛋菠菜 清清淡淡 菠菜翠綠唔會過熟 湯底幾清 咸蛋皮蛋份量毫不吝嗇。風味館小菜選擇都好多 而且有不同款的懷舊小菜 所以成為阿爺新寵。