大中華飯店 (已搬遷) 新店位置

今日同朋友慶祝生日，見四五年冇嚟過，掛住佢個豬手就嚟食嘢，叫咗個豬手，咁耐冇食都仲係好食嘅，然後我哋嘅惡夢就開始了。呢度呀洗碟碟餸都$100起跳，叫咗個蒜蓉節瓜蝦乾炒粉絲，佢放個碟落嚟嘅時候，我哋全台人係O咗嘴，好似一Pat垃圾🤢，食落去，都係一Pat嘢咁，剩係得鹽味同埋節瓜味。再叫咗個蒜蓉西蘭花，直頭就係用水滾熟咗個西蘭花仲要滾過龍，再加啲蒜蓉落去🫣。至於$110嘅小炒王，係十分之普通有普通嘅完全冇鑊氣，但係好在啲蝦乾同埋腰果係有味嘅。豉椒炒田雞，落到嚟一邊係田雞一邊係配菜，完全係好似太極盤咁樣分開晒，見到個樣已經冇乜期望，咬落去係好重腥味嘅。墨魚餅食得出佢個墨魚係好有口感，但係佢連基本煎嘅感覺都冇，更加唔好講有少少燶嘅感覺。避風塘雞翼算係咁多個餸之中比較好食嘅。椒鹽九肚魚到不過不失。有嚟過都知道呢間嘢係冇乜服務嘅，而家閒閒哋一碟菜都要$100，再加上佢咁嘅食物質素，本人覺得佢十分之冇誠意。