饞。台式食堂

營業中

休息中

同個囡去尖沙咀行完博物館，附近揾食真係有啲難度，唔係價錢高企，就係唔適合小朋友食。本來諗住去K11 Musea foodcourt是但食，竟然無意間發現轉角有間食台灣野「饞.台式食堂」，走木系格調小清新格調、環境寬敞，仲有我地最喜愛既台式手搖茶，價錢仲相當親民添。🥢牛肉三寶麵🍜湯底可選麻香、紅燒、葱燒，而麵可選陽春麵或刀削麵。我就揀左麻香湯底刀削麵，個湯有十分輕微麻辣，仲有好濃香料味；牛三寶包括牛腩、牛筋、牛肚，份量都幾多鋪滿成碗麵。牛腩滷得好入味好稔軟，牛筋就Q彈軟滑，仲有好多塊完整既金錢肚，足料。🥢塔香鹽酥雞飯🍛阿囡至愛既食物，用上無骨雞腿肉，啖啖肉好滋味，雞件睇落好似好乾好深色，但咬落炸粉鬆脆，雞塊有好香既醬油和五香粉味，十分入味。套餐可配白飯或滷肉飯。🥢炸物拼盤包括有花枝丸、甜不辣、府城蝦卷、QQ球四款小食。花枝丸夠彈牙，煎香後好惹味。甜不辣就很有嚼勁，甜甜地似麵筋口感都幾得意；QQ球即炸蕃薯波，有兩種甜薯，紫薯比較香甜、黃蕃就清新啲，都好好味。最後一人一杯茉香珍珠和蜂蜜金桔檸檬，好經典既台式飲品🥤，卻永不過時，大大杯夠解渇，幾時都咁好飲。