來佬餐館 (已搬遷) 新店位置

尋日星期五Happy Friday，幾個同事諗住去老蘭飲杯野輕鬆下，Charmaine提議去食點心，我以為某某餐廳有新野出，原來佢講緊來佬餐館，未試過，都可以試下！去到來佬，人不是太多，店員安排我地坐地下果層。我好鍾意來佬既裝修，好有屋企感覺。睇餐牌，我地三個女仔樣樣都想試，但一籠點心都要三四十蚊，好貴，我地唯有就住嗌，叫左蘿蔔糕，黑松露上素餃、菠菜餃、春卷、鳳爪、叉燒腸粉、麻辣餃同埋個名好特別既”蟲草花鮮竹卷” (其實都叫左幾多，嘿嘿) 。我地最欣賞餃的質素，皮薄而且足料，唔似一般酒樓咁。同個職員傾開計，佢仲話真係入貨自己包自己做，即叫即蒸。我地心諗，難怪咁貴。講真，三十幾蚊一碟點心，都幾肉赤，不過要在宵夜時段食到有質素既點心，都唔係到到有，所以我地話一個月先食一次。特別推介︰來佬菠菜餃又真係幾好味，因為裡面真係啖啖鮮菠菜，仲有未見過全綠色的餃子，好特別，讚！意見︰價錢有少許貴，勝在層數多，不太嘈，可以好好咁傾下計，飲杯茶，食個包。