米線陣 (已結業)

今晚同男朋友想食米線，將軍澳站無乜米線店可以選擇，所以就去將軍澳中心嘅米線陣喇。星期日晚7點幾中嚟到，竟然無人等位可以直接入去。原先想叫兩個皇牌套餐，但份量好似太多，所以最後叫咗一個皇牌套餐，再單叫多一碗米線就啱啱好。今次叫咗:皇牌套餐:大汗豬扒擔擔米線、蒜泥白肉、特大凍奶茶 ($72,特大飲料要另加$4)單叫:鮮茄雞肉蟹棒烏冬（我轉咗米線）($44)今次嘅食物好快就送上檯喇。先講我碗鮮茄雞肉蟹棒米線，今次有少少失望，碗米線唔太熱，只係處於溫暖嘅狀態，如果可以再熱啲就更好。可以讚嘅地方係啲雞肉好滑，而且唔會碎濕濕。至於湯底，都夠茄味嘅，都見到有啲茄碎響度。至於男朋友嘅皇牌套餐，先講大汗豬扒擔擔米線，塊豬扒係分碟上，咁就唔會浸濕哂，無咗脆卜卜嘅口感，而且食嘅時候係好熱，唔會凍哂。至於個擔擔湯底，有好香嘅花生味，而且唔算辣，感覺上比我碗米線好食。(果然隔離飯比較香)。唯一要改善嘅都係唔夠熱。跟餐嘅蒜泥白肉係一人份量，有花生墊底，不過蒜泥唔算多，可以再多啲就好。特大凍奶茶要加4蚊，果然好大杯，兩個人飲就剛剛好。(到俾錢時先知，原來米線陣係屬於大家樂集團嘅)