熊貓烘焙

營業中

休息中

同朋友去灣仔一帶覓食，走之前不如買返啲「手信」畀屋企人啦！我哋去咗之前好hit嘅熊貓烘焙，買佢好出名嘅「陽光牛奶撻」～點解呢個撻會喺鋪頭嘅招牌美食？皆因佢個樣零舍不同，生得比平時食開嘅蛋撻高啲，有差不多6cm高！撻皮用上牛油曲奇撻皮，酥皮派嘅朋友就未必好啱食啦。入面嘅蛋漿牛奶香味逼人，好滑溜，食完都好飽肚。價錢方面，每個盛惠$16蚊，唔算好親民，但未食過絕對可以試一次。除咗牛奶撻，店舖入面仲有好特別嘅德式檸檬撻，直徑大約11cm，好大個，盛惠$36。呢兩款撻都有固定嘅出爐時間，顧客亦可以事前預訂，咁就唔使驚買唔到～當日所見，街坊反應都相當熱烈，好多人都一次預訂好多個，同家人朋友分享！幸運嘅係，每次出爐嘅蛋撻數目都唔少，見到職員不斷起模入盒，而且出爐時間密，所以即日去都唔驚買唔到。