Hungry Korean (D2 Place) (已結業)

話說下午有d野黎荔枝角搞，咁午餐都係荔枝角食啦，本身做晒功課諗住去1樓既某間冰室食，但真係太多人排緊隊，驚等太耐誤左時間，行左D2 2-3層其他餐廳1係都係排晒隊，1係就比較貴既西餐，行行下見到呢間韓式餐廳有位，睇落價錢唔算好貴就入去試下個午餐啦。其實坐底左10分鐘都開始好多人入左黎，食緊野既時候已經坐爆仲有人開始排隊，始終工業區附近太多上班族都好正常。今日試下個泡菜豬肉豆腐，跟1碗白飯，豬肉切得比較細同碎，調味ok少少辣，辣中帶點甜都好韓式味道，有少許泡菜撈埋，份量唔多不過醬汁味道夠重撈飯1流，另外跟左3塊豆腐都好夠滑。跟餐加12蚊有野飲，揀左個凍梅實茶，少少酸，加12蚊貴左少少。雖則話食個午餐74蚊其實唔算平，但比起附近餐廳黎講都算係平民了，想食下韓國野都係幾好既選擇。