粵來順 (已結業)

今晚我們喺旺角附近做完嘢之後諗著去喺登打士街已經有一段時間無嚟嘅「粵來順」食晚飯，但一去到就見到店外同之前一樣都係有好多人排隊等位，由於今次我們係臨時決定，無預早訂位，所以我們都要同其他人客一齊等位，但喺等位嘅時候見到喺牆上貼著一份報章，認真一睇，原來係他們最近得到「2018米芝蓮推介食肆」，所以就算要等咗好耐先有位，我們都會想繼續等落去！我們叫咗木瓜燉花旗參湯嘅湯底味道好甘甜濃郁，而且感覺好滋潤，最啱喺而家呢啲咁乾燥嘅天氣飲！冰梅欖豉骨嘅肉質極之鬆化軟滑，完全唔會有好硬實實嘅感覺，而且好離骨，至於醬汁嘅味道酸酸甜甜相當醒胃，而且好入味！金沙涼瓜片嘅涼瓜片相當甘甜爽脆，外層係甘香濃郁嘅金沙鹹蛋黃，食落味道非常夾，真係創意十足！沙薑煎焗鷄係用一個燒到熱辣辣嘅煲仔嚟盛載著上碟，聽店員話首先將啲鷄肉煎香咗之後再焗，所以香濃嘅沙薑味滲透晒啲鷄肉入面，而且肉質好軟滑，完全唔會有「嚡」嘅感覺，真係好正呀！豉汁蒸魚雲蒸嘅時間火候控制得恰到好處，而且魚雲係新鮮即劏，所以肉質非常鮮甜嫩滑！總括：雖然已經有一段時間無嚟，但師傅仍然可以保持著水準，所以他們得到「2018米芝蓮推介食肆」嘅榮譽，係值得嘅！