金滿膳燒味餐室 (已結業)

又到食飯時間，返工冇飯帶，每日諗午飯食咩好到係一個難題呢架！唔想諗咁多，一於就去飯堂搞掂佢就算，但叫得飯堂，當然要有返咁上下水準先入到飯堂名單啦！要好味，夠飽，抵食，快，呢4個條件。金滿膳就係其中一間，餐廳係今年6月份先開的，位於牛頭角仁安大廈地下。午飯時間得一個鐘，過嚟食完再返公司都唔多時，所以我同事都係叫碟頭飯食。雞扒蛋飯 $50，大大碟白飯，配塊雞扒，加隻燶邊半生熟太陽蛋撈豉油，好味😋又飽肚，加埋杯提神凍奶茶。招牌脆皮燒腩仔飯 $48燒腩仔皮脆肉嫩，肥瘦分別，一層肥一層瘦，鬆軟脆口2種口感回味無窮，白飯撈埋鼓油，味道豐富，加杯消滯凍檸茶。