釜之魂釜飯專門店 (淘大商場) (已結業)

係九龍灣放工後，朋友約左我去淘大食飯，我地想食日本野，見到哩間餐廳人頭湧湧, 餐牌上都有岩食既野，一於等下位先，大概等左15分鐘左右既時間終於安排到坐位比我地入去，我同朋友預先係出面巳經睇好食咩，所以可以即刻叫店員落單，叫左兩串鹽燒牛舌，一個鰻魚飯同一碗豬軟骨稻庭烏冬，我地加$18蚊升級埋套餐，除左配埋飲品仲有個餐前小食同麵豉湯。今晚小食係青瓜鰻魚粒，酸酸地，作為餐前小食好開胃。麵豉湯同傳統的唔同，餐廳加入左蘿蔔、洋蔥片同海帶一起煮，令口感多元化。燒牛舌厚身，燒到軟軟地食落味道唔錯。豬軟骨稻庭烏冬既豬軟骨夠哂琳身，烏冬本身薄同幼身，食落彈牙滑溜。期待既金魂鰻魚上枱，香氣四溢，鰻魚甜美ok,下面既飯好多，我用碗仔同朋友share食都畢到起碼三碗飯出黎，食完太飽，我地就叫個焦糖波蘿解解膩，波蘿燒過仲保留到好多汁，外層有層薄薄的焦糖，脆口、甜美，為這餐飯劃上美味的句號。