御前上茶 (已結業)

呢間御前上茶終於都開了，梗係即刻去試下啦！剛剛好有張2人枱，唔駛等位，真係太好了。睇左個餐牌好耐，最終決定食御前雙色盛合&御前雙色蕨餅，可以一次試晒抹茶同焙茶的味道。 Wow，呢個就係御前雙色盛合，賣相已經值得一讚，好有日本風味，用木製的器皿放滿抹茶焙茶扭紋雪糕，粒粒飽滿的紅豆，白雪雪的小丸子同抹茶凍。而下面放左啲乾冰，令到個甜品keep住凍。抹茶焙茶扭紋雪糕好香茶味，而且好滑，味道又唔苦澀。紅豆大而腍，好香甜，而小丸子就軟糯煙韌但抹茶凍就好濃抹茶味而且好爽口！四者混埋一齊食，口感同味道都好豐富，值得一試！ 而另一款甜品係御前雙色蕨餅，蕨餅好煙韌軟糯，面頭黏滿抹茶粉同焙茶粉兩種口味，而且點上抹茶醬同焙茶醬黎食。抹茶蕨餅點抹茶醬，就更濃更香抹茶味，而點焙茶醬，抹茶味依然香濃，但會甜啲。焙茶蕨餅點抹茶醬，就令到蕨餅沒咁甜，而且添上一陣抹茶香，但點焙茶醬就好香甜。今日可以食到呢間的甜品真的好開心！