楓雅廊咖啡閣 (已結業)

今日o黎食lunch buffet，唔貴，$98一位，恒生BIA仲有8折添。都算有幾多o野食，魚生有三文同八爪魚，三文魚都算幾甜。冷盤仲有生蠔(一般啦)，同少少菜蔬沙律；值得一提o既係呢度有兩款幾特別o既dressing：南瓜味同橙味，以前從未試過，特別得o黎都幾好味。呢度D熱盤比較強，居然有瀨賴尿蝦，不過略嫌唔夠大隻；仲有D幾大隻o既螺添。另外有日式鐵板燒，燒o既應該係銀雪魚，都算幾香幾滑。臨近buffet尾段，見到有D迷李荷葉桶飯，餡料有D似糯米雞，味道都唔錯。甜品一環就比較弱D，居然連cheesecake都冇，比較唔錯o既只有coffee mousse同椰汁布甸，另外仲有TCBY軟雪糕。總括o黎講唔算係好正o既buffet，但以呢個價錢都幾抵食。