金牌小龍 (已結業)

最近多左出街食飯,因為無咁多人亦唔駛等位,呢一晚就揀左係isquare既金牌小籠。同樣地,平日晚上唔駛等位,兩個人亦被安排四人卡位。小籠包一客有五隻,都係$40幾一籠,熱辣辣,加上皮薄多汁,以尖沙咀區既上海菜質素可謂非常抵食。酸辣湯麵,酸辣度適中,麵既份量都唔少,奈何好易索晒d湯,以致有d似乾撈麵咁,同埋由於唔夠湯,所以食落個麵會有d淡。蟹肉扒西蘭花,蟹肉就唔係好多,清清淡淡之選係ok既。紅油菜肉雲吞,不過不失,略嫌辣椒油唔夠香。食完之後想叫個甜品,揀咗豆沙鍋餅,不過侍應就話今日未能供應所以就算數了。順帶一提,我哋坐嘅卡位係最入既位置,食飯其間一直都會有收碗碟既車推黎推去,會keep住發出嘈音,如果坐呢邊嘅位置就需要注意。總括而言,好推介呢度嘅小籠包,其他食物就中規中矩,但以尖沙咀上海菜計,金牌小龍比上海婆婆嗰啲原來係平d,不過小菜款式就會比較少。