百份百餐廳 (平田商場)

營業中

休息中

百分百餐廳素質向來以3隻字形容：過得去。以一間餐廳標準，未至於去到不得不食嘅地步。呢間百分百餐廳連住麵包店，幾方便居民。首先，四川麻辣牛肉飯，調味剛好唔太鹹，但食落係有辣味，如果唔特別食辣椒籽，其實接受得到，算小小辣。牛肉有香味，飯粒分開一粒粒，唔會痴住一舊咁。碟飯黎到個陣雖然未至於有鑊氣，但都熱。另外雞排蕃茄煎蛋意粉，湯底得蕃茄色，蕃茄渣，但冇蕃茄味，頂多係有色水嘅清湯意粉。意粉如果個湯底冇味，其實等於食冇味意粉。雞排煎得唔錯，皮脆肉嫩，咬落有口感。煎蛋就表現麻麻，普通太陽蛋漏汁。以整體表現講，被湯底拉低分數，算合格而已。我叫左份牛油煉奶多士，牛油係一片個種，即係菠蘿油個種。黎到個陣未融，因為飽唔算熱，但食落飽是脆皮，算不俗。飲品就叫左杏霜同凍華田。華田算濃郁，幾好味，可惜杏霜係花奶味，我唔太鍾意。服務態度良好，舉手一陣都有人過黎落單，衛生算乾淨。我會繼續試呢間餐廳唔同飯菜，但暫時俾我印象係一般，可以一試。