津一 (已結業)

同先生喺荃豐買完嘢順便買外賣返屋企做晚餐，行過見到呢間新開張嘅外賣小店，店面乾淨企理，仲有我至愛嘅雞絲粉皮，當然唔能夠放過。食物方面選擇唔算多，但勝在抵食，仲有復活節推介，更加化算。滷水拼盤有滷水蛋、雞翼、豬耳、金錢肚同牛𦟌，非常豐富。雞翼大大隻，夠哂入味，滷水汁非常香，鹹淡適中，而且唔會有雪味。牛𦟌炆得軟腍， 但又唔會失去口感，滷水味香濃而且冇臊味，唔錯。雞絲粉皮份量多而且好足料，雞絲俾得夠大方，醬汁比例亦剛好唔會好膩，配上爽滑嘅粉皮同新鮮嘅青瓜絲，清新開胃。炸醬麵係店員推介，話係必食之一，味道果然唔錯，麵底清爽，配上香濃嘅自家製炸醬，非常惹味。飲品方面非常有驚喜，特別係果茶，加入洛神花，味道酸酸甜甜，清爽解湯，非常推薦！疫情之下市道唔好仍然敢於追夢已經係勇氣可嘉，更難得嘅係食物係食得出嘅用心，而且店員亦好友善，值得支持。