元朗泗記

營業中

休息中

是咁的，由於有好多朋友住係元朗，所以間唔中會去元朗食野，所以都知道果邊有唔少好野食。有時見客去到元朗，無理由食高檔好西，所以都要搵啲高質飽肚野食。一般食蒸飯都會食鳳爪排骨飯，呢間啲排骨醃得夠晒入味，肉質都滑，又有排骨位啲咬口，好好食。鳳爪就普通酒樓級數。至緊要啲飯入面有好香嘅排骨油香，好好食。土魷肉餅飯，土魷都夠香。小食方面呢，就有呢個牛肉球，好鬼大粒。肉質方面就比較爽口，同出面蒸牛肉球唔同。呢個皮蛋酸薑好好食，我次次食都會叫一碟。皮蛋入貨好靚，次次食都係流心皮蛋，陣皮蛋味仲好濃。佢有個食法推介，就係落沙糖同喼汁，酸酸甜甜同皮蛋陣味好夾。酸薑就普通野。次次都唔同，今次粉葛赤小豆煲鯪魚，好濃味。我見附近街坊會攞個熱水壺買湯，似乎真係有班fans。寫左咁多，其實係推介佢個飯。啲飯粒粒分明，好彈口，好有米香，唔係好多地方有佢地水準。而最驚喜係佢地個豉油，佢地自已溝出黎，食落甜甜地，果質地好似枇杷膏咁。就咁豉油撈飯都好好食。有樣野要提一提，就係間鋪好乾淨，估佢唔到。