同心泰國菜館 (已結業)

到九龍城除咗去清真牛肉館朝聖之外，泰國菜必定係第二站，因為淨係食牛肉館好多時都係未夠飽嘅！同心係我哋嘅必然選擇之一，因為一次邂逅佢嘅鴨肉湯河而從此戀上，噚晚又去咗搵佢嘞，點知賣晒喎？成十點，我哋真係夜咗啲嘞！不過其他嘢都好好食嘅，今次我哋就叫咗： 豬頸肉生菜包： 豬頸肉整得有啲燶邊，又多肉汁又惹味，正！包唔包生菜都咁掂！同心嘅生菜包有好多香料，乾蔥，辣椒，又酸又辣，辣椒遇上酸味更辣，所以就算叫小辣都有番咁上下，要有食辣嘅心理準備先好叫！ 鴨肉生菜包：係，又係生菜包，因為冇湯河食，食鴨惟一選擇，餐牌上面寫就寫鴨肉，不過有鴨什喺入面！味道都幾好但係好辣，啲料硬咗啲，下次都係食湯河算嘞！ 蝦醬炒飯：第一次食，甜甜哋，肥肉都唔係太漏，蛋絲亦整得頗有心機，下次可以 encore！ 龍眼冰：呢間都算又甜又濃嘞，龍眼大粒，食落唔會冇晒味，次次都叫，因為好飲又可以用嚟解辣！九龍城食泰菜真係好抵！大吃大喝不過一百蚊位，今晚又飽餐一頓都係百零蚊！所以成日嚟！