京香閣 (已結業)

同屋企人食過一次覺得唔錯，今晚又同朋友黎食下先，佢係小籠包同片皮鴨嘅fans，呢度有得任食真係好啱佢呀，哈哈。放題餐送嘅一次性餐湯，係蟲草花花膠燉雞湯，雖然係雞湯，但清清地又幾好飲喎，好怕啲杰撻撻嘅燉湯，呢個幾對胃呀。朋友揀乾燒汁大虎蝦餐（$228/位），個汁辣辣地好開胃，蝦鮮甜爽口，正喎。自己揀左芝士龍蝦餐（$268/位），濃濃的芝士汁配上鮮味龍蝦，真係食到舐舐脷。片皮鴨區，師傅不停出鴨，唔使搶㗎。好正，自己包可以多醬多配料，唔使怕淨返啲皮無鴨肉。好好味，一口氣食左四卷！小籠包同糯米燒賣，熱辣辣即蒸㗎。小籠包太正了，皮薄多汁，勁係要encore啦。除左點心，仲有好多冷盤同熱盤任食，個人勁推菜苗同水煮牛肉。甜品中呢個雪糕脆麻花有驚喜呀！雪糕係椰子味，又甜又香仲有椰子肉，太好味食左幾球。高力豆沙軟綿綿都好正，蕾沙湯丸煙韌香口值得食，豆沙窩餅就一般啦。仲有薑汁湯丸同酒釀丸子，前者勁薑，後者酒釀味超濃，兩樣都好對胃，又係要食幾碗，哈哈。仲有好多野食無一一影相了，平均差不多要300個人，如果喜歡食中菜，個人覺得抵食嘅，款式多味道好又唔使就住就住，仲有汽水豆漿任飲添㗎。