秋香 (黃金海岸商場) (已結業)

今次去到黃金海岸分店，環境光猛啲同樓底超高，平日晚市都差唔多full house。另有outdoor位同朋友飲返杯食下串燒都唔錯呢！點咗晚市二人前套餐，內容物都幾豐富，有前菜、刺身三點盛、二人前炸物、串燒盛、煲仔飯及甜品。我地衝住佢嘅鹽燒白鱔煲仔飯嚟，食落都無令我地失望，質素有保持到！白鱔爽彈，邊位帶少少焦脆，但要小心細骨～而煲仔飯調味一流，每粒米飯都裹滿醬汁，拌勻埋蛋黃增添了濕潤感，夾雜蔥花同少少飯焦食落好香。套餐其他食物都唔錯，刺身三點盛有三文魚、油甘魚同帶子，每款都切得幾厚身。炸物有唐揚炸雞、廣島蠔、吉列炸蝦。炸蝦超巨型，廣島蠔都幾鮮甜。串燒有和牛粒、手羽先、波板豚肉串、大啡菇、秋葵、菠蘿，特別鍾意波板豚肉串，好特別！最後仲有一客甜品，當晚滿足了！