開心餅店

營業中

休息中

其實好早就聽講 Happy Roller 嘅卷蛋好食，但一直冇機會試。最近難得去開旺角，就即刻嚟試下。佢地嘅門市就係「開心餅店」，「開心餅店」可以話係藏係旺角嘅寶藏傳統小店！只睇店面真係睇唔出佢地有賣同佢地表面有啲違和感嘅卷蛋。「開心餅店」距離朗豪坊唔遠，行大概 4 分鐘就到！店面就係傳統港式餅店嘅樣，雖然佢地門口嘅雪櫃有一啲港式嘅傳統卷蛋，但個啲並唔係我地要揾嘅，因為老闆將我地要揾嘅卷蛋放左係佢地廚房入面嘅雪櫃，所以我地係睇唔到嘅。門口嘅雪櫃有一個黑色板，個度寫左「今天現貨」，你就可以知道佢地個日有賣咩口味嘅卷蛋啦！揀好口味之後直接同老闆講就ok！但要注意嘅係，佢地只收現金，仲有每個禮拜二都唔賣卷蛋嘅。佢地依款卷蛋用左 0 卡稀少糖製作，少油少糖嘅。好多人話佢地嘅麻薯卷蛋好食，所以我最後就揀左「黑芝麻花生麻薯生乳卷蛋」。黑芝麻花生麻薯生乳卷蛋 - 甜度剛好！蛋糕口感濕潤，黑芝麻味幾濃，花生餡都唔甜，另外仲有細細粒嘅花生碎，提升左整體嘅口感，重點係入面嘅麻薯好軟！就算食唔曬，放係雪櫃整整一晚，第二日再食，麻薯嘅口感都冇太大嘅差別，唔會變到好硬。